ଐତିହାସିକ ୧୯୮୩ ବିଶ୍ୱକପ ବିଜୟ ପାଇଁ ଭାରତର ପୂର୍ବତନ କ୍ରିକେଟର ଯଶପାଲ ଶର୍ମାଙ୍କୁ ସ୍ମରଣ କରାଯିବ। ଯଶପାଲ ଏହି ଦିନ ଅର୍ଥାତ୍ ୧୧ ଅଗଷ୍ଟ ୧୯୫୪ରେ ପଞ୍ଜାବର ଲୁଧିଆନାରେ ଜନ୍ମଗ୍ରହଣ କରିଥିଲେ। ସେ ତାଙ୍କ କ୍ୟାରିୟରରେ ୩୭ଟି ଟେଷ୍ଟ ଏବଂ ୪୨ ଟି ଦିକିକିଆ ଖେଳିଥିଲେ। ସେ ୧୯୮୩ ବିଶ୍ୱକପର ହିରୋ ଥିଲେ କିନ୍ତୁ କ୍ୟାରିୟରର ଶେଷ ଟେଷ୍ଟ ଇନିଂସରେ ‘୦’ ପାଇଁ ତାଙ୍କୁ ଆଉଟ୍ କରାଯାଇଥିଲା। ସେ ନଭେମ୍ବର ୧୯୮୩ ରେ ଦିଲ୍ଲୀରେ ୱେଷ୍ଟଇଣ୍ଡିଜ ବିପକ୍ଷରେ ଶେଷ ଟେଷ୍ଟ ମ୍ୟାଚ ଖେଳିଥିଲେ। ଗତ ମାସରେ ଦିଲ୍ଲୀରେ ହୃଦଘାତ ହେତୁ ଯଶପାଲଙ୍କର ମୃତୁ୍ୟୁ ହୋଇଥିଲା।
ଯଶପାଲ ୧୯୮୩ ବିଶ୍ୱ ବିଜେତା ଭାରତୀୟ ଦଳର ସଦସ୍ୟ ଥିଲେ। ସେ ଭାରତ ପାଇଁ ୩୭ ଟି ଟେଷ୍ଟ ମ୍ୟାଚ ଖେଳି ମୋଟ ୧୬୦୬ ରନ ସ୍କୋର କରିଥିଲେ। ତାଙ୍କର ସର୍ବୋତ୍ତମ ସ୍କୋର ୧୪୦ ଥିଲା। ସେ ନିଜ ଟେଷ୍ଟ କ୍ୟାରିୟରରେ ମୋଟ ୨ ଶତକ ଏବଂ ୯ ଅର୍ଦ୍ଧଶତକ ହାସଲ କରିଥିଲେ। ତାଙ୍କର ଟେଷ୍ଟ ହାରାହାରି ଥିଲା ୩୩.୪୫। ଦିନିକିଆ କ୍ରିକେଟରେ ସେ ୪ଟି ଅର୍ଦ୍ଧଶତକ ସମେତ ହାରାହାରି ୨୮.୪୮ରେ ୪୨ ମ୍ୟାଚରେ ୮୮୩ ରନ ସ୍କୋର କରିଥିଲେ। ୨୦୦୩ ରୁ ୨୦୦୬ ପର୍ଯ୍ୟନ୍ତ ସେ ଭାରତୀୟ ଦଳର ଚୟନକର୍ତ୍ତା ମଧ୍ୟ ଥିଲେ।
ଚୟନକର୍ତ୍ତା ଥିବାବେଳେ ଦଳର ତତ୍କାଳୀନ କୋଚ ଗ୍ରେଗ ଚାପେଲଙ୍କ ବିରୋଧରେ ମଧ୍ୟ ସେ ସ୍ବର ଉତ୍ତୋଳନ କରିଥିଲେ। ସେ ଉତ୍ତରପ୍ରଦେଶ ଦଳର କୋଚ ପଦରେ ମଧ୍ୟ କାର୍ଯ୍ୟ କରିଥିଲେ। ସେ ସର୍ବଦା ୧୯୮୩ ବିଶ୍ୱକପର ହିରୋ ଭାବରେ ପରିଚିତ ହେବେ। ଡିସେମ୍ବର ୨୦୦୫ ପର୍ଯ୍ୟନ୍ତ ସେ ଚୟନକର୍ତ୍ତା ଭାବରେ କାର୍ଯ୍ୟ କରିଥିଲେ। ପରେ ତାଙ୍କୁ ୨୦୦୮ ରେ ପୁନର୍ବାର ଏହି ଦାୟିତ୍ୱ ଦିଆଗଲା। ଯଶପାଲ ବଲିଉଡର ଭେଟେରାନ ଅଭିନେତା ଦିଲୀପ କୁମାରଙ୍କର ଜଣେ ବଡ଼ ପ୍ରଶଂସକ ଥିଲେ। ସେ ଏହା ମଧ୍ୟ କହିଥିଲେ ଯେ ଦିଲୀପ ତାଙ୍କ କ୍ୟାରିୟର କରିବାରେ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛନ୍ତି। ଗ୍ରୁପ ପର୍ଯ୍ୟାୟ ମ୍ୟାଚରେ ଡିଫେଣ୍ଡିଂ ଚାମ୍ପିଅନ ୱେଷ୍ଟଇଣ୍ଡିଜ ବିପକ୍ଷରେ ୧୯୮୩ ବିଶ୍ୱକପରେ ଯଶପାଲ ୮୯ ରନର ଚମତ୍କାର ଇନିଂସ ଖେଳିଥିଲେ। ଏହି ମ୍ୟାଚ ପରେ ହିଁ ଲୋକମାନେ ଭାବିଥିଲେ ଯେ ଭାରତ ବିଶ୍ୱକପ ଜିତିପାରିବ, ଯାହା ମଧ୍ୟ ସତ ହୋଇଗଲା।
