ଛତ୍ରପୁର, ୨୩।୫(ଡି.ଏନ୍.ଏ.): ଗଞ୍ଜାମ ଜିଲା ପ୍ରଶାସନ ପକ୍ଷରୁ ସ୍କୁଲ ପିଲାମାନଙ୍କ ପାଠପଢ଼ା ନିମନ୍ତେ ଗତବର୍ଷ ଠାରୁ ମଧୁ ଆପ୍ ଆରମ୍ଭ ହୋଇଛି। ଏହାକୁ ଭିଡିଓ କନ୍ଫରେନ୍ସିଂ ଜରିଆରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶୁଭାରମ୍ଭ କରିଥିଲେ। ଗଞ୍ଜାମ ଜିଲାର ହାଇସ୍କୁଲ ଶିକ୍ଷକଙ୍କ ଦ୍ୱାରା ବିଭିନ୍ନ ପାଠ୍ୟ ବିଷୟ ଉପରେ ସ୍ବତନ୍ତ୍ର ପାଠ ପଢ଼ାକୁ ଭିଡିଓ ରେକଡିଂ କରାଯାଇ ପରେ ତାହାକୁ ମଧୁ ଆପ୍ରେ ଛଡ଼ାଯାଉଛି। ଯେକୌଣସି ପାଠ୍ୟ ବିଷୟରେ ପିଲାମାନେ ଏହି ମଧୁ ଆପ୍ ଜରିଆରେ ପାଠ ପଢ଼ିପାରୁଛନ୍ତି। ବିଶେଷକରି ଗଣିତ, ବିଜ୍ଞାନ ଓ ଇଂରାଜୀ ପାଠ୍ୟ ବିଷୟରେ ମୋବାଇଲ ଦ୍ୱାରା ଏହି ଆପ୍ରେ ପଢ଼ି ପିଲାମାନେ ବେଶ୍ ଉପକୃତ ହୋଇପାରୁଛନ୍ତି। ଏହି ଆପ୍ରୁ ମିଳିଥିବା ତଥ୍ୟରୁ ଏହା ସ୍ପଷ୍ଟ ହୋଇଛି। ଏବେ କରୋନା ନେଇ ଲକ୍ଡାଉନ ଯୋଗୁ ସ୍କୁଲ ବନ୍ଦ ରହିଛି। ତେଣୁ ଏହି ସମୟରେ ଉକ୍ତ ଆପ୍ର ଚାହିଦା ଅଧିକ ବଢିଯାଇଛିକ୍।
ମିଳିଥିବା ତଥ୍ୟ ଅନୁଯାୟୀ, ବର୍ତମାନ ସୁଦ୍ଧା ୨ ଲକ୍ଷ ୪ ହଜାର ସ୍କୁଲ ପିଲା ମୋବାଇଲରେ ଏହି ଆପ୍କୁ ଡାଉନ୍ଲୋଡ୍ କରିସାରିଲେଣି। ଅପରପକ୍ଷରେ ୧ ଲକ୍ଷ ୧ ହଜାର ସ୍କୁଲ ପିଲା ଆକ୍ଟିଭ ଅଛନ୍ତି ଏବଂ ଏହି ଆପ୍ ଜରିଆରେ ପାଠ ପଢୁଛନ୍ତି। ଲକ୍ଡାଉନ ସମୟରେ ଦୈନିକ ୭୦ ହଜାର ସ୍କୁଲ ପିଲା ଏହି ଆପ୍କୁ ପାଠ ପଢ଼ା ପାଇଁ ବ୍ୟବହାର କରୁଛନ୍ତି। ଶନିବାର ଏ ସମ୍ପର୍କରେ ଗଞ୍ଜାମ ଜିଲାପାଳ ବିଜୟ ଅମୃତା କୁଲାଙ୍ଗେ ଟୁଇଟ୍କରି ସୂଚନା ଦେଇଛନ୍ତି ।
