ଶ୍ରୀନଗର,୧୭।୪: କରୋନା ଭାଇରସକୁ ନେଇ ସାରା ବିଶ୍ୱ ଚିନ୍ତାରେ ପଡିଯାଇଛି। ଭାରତ ଏହି ସମୟରେ ବିଶ୍ୱର ବିଭିନ୍ନ ଦେଶକୁ ଔଷଧ ଯୋଗାଉଥିବା ବେଳେ ପାକିସ୍ତାନ କିନ୍ତୁ ଆତଙ୍କବାଦଠାରୁ ଦୂରେଇ ଯାଇନି ବୋଲି ଶୁକ୍ରବାର ପ୍ରକାଶ କରିଛନ୍ତି ଭାରତୀୟ ସେନାମୁଖ୍ୟ ମନୋଜ ମୁକୁନ୍ଦ ନରାଓ୍ବଣେ। ଏହି ସମୟରେ ପାକିସ୍ତାନ ବିଶ୍ୱକୁ ଆତଙ୍କବାଦ ଯୋଗାଉଛି ବୋଲି ସେ କହିଛନ୍ତି। ସୂଚନାଯୋଗ୍ୟ, ୨ ଦିନିଆ ଜମ୍ମୁ-କଶ୍ମୀର ଗସ୍ତରେ ସେ ଶୁକ୍ରବାର ସେଠାରେ ପହଞ୍ଚିଛନ୍ତି। ଏହି ସମୟରେ ସେ ବିଭିନ୍ନ ସେନା ପ୍ରତିଷ୍ଠାନ ଗସ୍ତ କରିବା ସହ ଭାରତୀୟ ଯବାନଙ୍କୁ ଉତ୍ସାହିତ କରିଛନ୍ତି। ଏହାପୂର୍ବରୁ ସେ ଗୁରୁବାର କଶ୍ମୀର ପହଞ୍ଚି ସେଠାରେ ସୁରକ୍ଷା ବ୍ୟବସ୍ଥାର ଯାଞ୍ଚ କରିଥିଲେ। ପାକିସ୍ତାନରେ ଏବେ କରୋନା ସଂକ୍ରମିତଙ୍କ ସଂଖ୍ୟା ବଢି ଚାଲିଥିବା ବେଳେ ସେ କିନ୍ତୁ ତା’ର ପୂର୍ବ ପ୍ରକୃତି ଛାଡି ପାରୁନାହିଁ। ଏବେବି ଭାରତ ସୀମାରେ ସେ ଅସ୍ତ୍ରବିରତି ଉଲ୍ଲଂଘନ କରୁଥିବା ଦେଖାଯାଇଛି।
