କ୍ରିକେଟର ସବୁଠୁ ବଡ ପ୍ଲାଟଫର୍ମ ହେଉଛି ଟେଷ୍ଟ କ୍ରିକେଟ। ତେବେ କ୍ରିକେଟର ସବୁଠୁ ରୋମାଞ୍ଚକ ମ୍ୟାଚ୍ ଭାରତ ଏବଂ ପାକିସ୍ତାନ ମଧ୍ୟରେ ଖେଳାଯାଏ। ଟେଷ୍ଟ ହେଉ କି ଏକଦିବସୀୟ ଉଭୟ ଦେଶ ମଧ୍ୟରେ ମ୍ୟାଚ୍ ଚାଲିରେ ସାରା ବିଶ୍ୱର ନଜର ରହିଥାଏ। ଏମିତି ୩ ଜଣ କ୍ରିକେଟର ଅଛନ୍ତି, ଯେଉଁମାନେ ଭାରତ ଏବଂ ପାକିସ୍ତାନ ଉଭୟ ଦେଶ ପାଇଁ ଅନ୍ତର୍ଜାତୀୟ ମ୍ୟାଚ୍ ଖେଳିଛନ୍ତି।
ଅବଦୁଲ ହଫିଜ କାର୍ଦ୍ଦାର
ଅବିଭାଜିତ ଭାରତର ଲାହୋରରେ ଜନ୍ମ ହୋଇଥିଲେ ଅବଦୁଲ ହଫିଜ କାର୍ଦ୍ଦାର। ଇଂଲଣ୍ଡ ବିପକ୍ଷରେ ଟେଷ୍ଟ ଖେଳୁଥିବା ଟିମ ଇଣ୍ଡିଆରେ ବି ସାମିଲ ଥିଲେ। ତେବେ ମହମ୍ମଦ ଜିନ୍ନାଙ୍କ ସମର୍ଥକ କାର୍ଦ୍ଦାର ଦେଶ ବିଭାଜନବେଳେ ପାକିସ୍ତାନ ପଟେ ରହିଯାଇଥିବାବେଳେ ପରେ ତାଙ୍କୁ ପାକିସ୍ତାନ ଦଳର ଦାୟିତ୍ୱ ଅର୍ପଣ କରାଯାଇଥିଲା। ୧୯୫୨-୫୩ରେ କାର୍ଦ୍ଦାର ତାଙ୍କ ଟିମ ସହ ଭାରତ ଗସ୍ତ କରିବା ସହିତ ଲାଲା ଅମରନାଥଙ୍କ ଟିମ ବିପକ୍ଷରେ ଟେଷ୍ଟ ମ୍ୟାଚ ଖେଳିଥିଲା। ଦିଲ୍ଲୀ ଓ ବମ୍ବେ ଟେଷ୍ଟ ଜିତି ଭାରତ ନିଜ ନାମରେ ସିରିଜ କରିଥିବାବେଳେ ଲକ୍ଷ୍ନୌ ଟେଷ୍ଟରେ ପାକିସ୍ତାନ ବିଜୟୀ ହୋଇଥିଲା।
ଅମିର ଇଲ୍ଲାହି
ସେହିପରି ଅନ୍ୟ ଜଣେ କ୍ରିକେଟର ହେଲେ ଅମିର ଇଲ୍ଲାହି। ଅବିଭାଜିତ ଭାରତର ଲାହୋରରେ ଜନ୍ମିତ ଇଲାହି ଭାରତ ପାଇଁ ଗୋଟିଏ ଟେଷ୍ଟ ମ୍ୟାଚ ଖେଳିଥିଲେ। ୧୯୫୨-୫୩ରେ ପାକିସ୍ତାନକୁ ଟେଷ୍ଟ ଟିମ୍ ମାନ୍ୟତା ମିଳିବା ପରେ ସେ ପାକିସ୍ତାନ ପାଇଁ ଖେଳିଥିଲେ।
ଗୁଲ ମହମ୍ମଦ
ଗୁଲ ମହମ୍ମଦ ମଧ୍ୟ ପାକିସ୍ତାନର ଲାହୋରରେ ଜନ୍ମଗ୍ରହଣ କରିଥିଲେ। ବାମହାତୀ ଆକ୍ରମକ ବ୍ୟାଟ୍ସମ୍ୟାନ ଗୁଲ ୧୯୫୨-୫୩ରେ ଭାରତ ପକ୍ଷରୁ ପାକିସ୍ତାନ ବିପକ୍ଷରେ ୨ଟି ଟେଷ୍ଟ ମ୍ୟାଚ୍ ଖେଳିଥିଲେ। ପରେ ୧୯୫୫ ମସିହାରେ ସେ ପାକିସ୍ତାନର ନାଗରିକତ୍ବ ଗ୍ରହଣ କରିବା ପରେ ପାକିସ୍ତାନ ଦଳ ପାଇଁ ଖେଳିଥିଲେ। କ୍ରିକେଟ କ୍ୟାରିୟର ସମାପ୍ତ ହେବା ପରେ ସେ ପାକ କ୍ରିକେଟ ପ୍ରଶାସନରେ ରହିବା ସହ ପ୍ରଥମେ କୋଚ ଓ ପରେ ଗଦ୍ଦାଫି ଷ୍ଟାଡିୟମର ନିର୍ଦ୍ଦେଶକ ମଣ୍ଡଳିରେ ଦୀର୍ଘ ବର୍ଷ ଧରି ରହିଥିଲେ।
