ଭରତପୁର କୋଇଲାଖଣି ଦୁର୍ଘଟଣା ପରେ ଏନ୍‌ଟିପିସି ବିଦ୍ୟୁତ୍‌ ପ୍ରକଳ୍ପରେ କୋଇଲା ସଙ୍କଟ: ବନ୍ଦ ୟୁନିଟ୍‌ ସଂଖ୍ୟା ୪କୁ ବୃଦ୍ଧି
4:00 pmAugust 3, 2019June 4, 2020 / 21

ତାଳଚେର,୩।୮(ନି.ପ୍ର.): ଅନୁଗୋଳ ଜିଲା ଭରତପୁର କୋଇଲାଖଣି ଦୁର୍ଘଟଣା ପରେ ୩ ହଜାର ମେଗାୱାଟ ବିଶିଷ୍ଟ ମହାରତ୍ନ କମ୍ପାନୀ କଣିହଁାସ୍ଥିତ ଏନ୍‌ଟିପିସି ବିଦ୍ୟୁତ୍‌ ପ୍ରକଳ୍ପରେ କୋଇଲା ସଙ୍କଟ ଦିନକୁ ଦିନ ବଢ଼ିବାରେ ଲାଗଛି। କୋଇଲା ଅଭାବରୁ ବିଭାଗୀୟ କର୍ତ୍ତୃପକ୍ଷ ଶନିବାର ପୁଣି ଆଉ ଏକ ୟୁନିଟକୁ ବନ୍ଦ କରିଦେଇଛନ୍ତି। ତେବେ ଏହାକୁ ମିଶାଇ ବନ୍ଦ ୟୁନିଟ ସଂଖ୍ୟା ୪କୁ ବୃଦ୍ଧି ପାଇଛି।
ସୂଚନାଯୋଗ୍ୟ, କଣିହଁାରେ ୩ ହଜାର ମେଗାୱାଟ(୫ଶହ ମେଗାୱାଟ ବିଶିଷ୍ଟ ୬ଗୋଟି) ୟୁନିଟ ରହିଥିବା ବେଳେ ପ୍ରକଳ୍ପ ପାଇଁ ପ୍ରତିଦିନ ୫୫ ହଜାର ମେଟ୍ରିକ୍‌ ଟନ୍‌ କୋଇଲା ଆବଶ୍ୟକ ହୋଇଥାଏ। ମାତ୍ର କୋଇଲା ଷ୍ଟକ୍‌ ନ ଥିବା ସହ ଆବଶ୍ୟକ ପରିମାଣର ମିଳୁ ନ ଥିବାରୁ କର୍ତ୍ତୃପକ୍ଷ ଏଭଳି ନିଷ୍ପତ୍ତି ନେଇଛନ୍ତି। ଏ ନେଇ ଗତ ୨୯ ତାରିଖରୁ ୧, ୪ ଓ ୫ ୟୁନିଟକୁ ବନ୍ଦ କରିଦିଆଯାଇଥିଲେ ମଧ୍ୟ ୩ଟି ୟୁନିଟ ଚାଲୁ ରହିଥିଲା। ମାତ୍ର ୨ ନଂ. ୟୁନିଟକୁ ଶନିବାର ବନ୍ଦ କରିଦିଆଯାଇଛି। ଷ୍ଟକ୍‌ରେ ଥିବା ୪ ହଜାର ମେଟ୍ରିକ ଟନ୍‌ କୋଇଲାରେ ଗୋଟିଏ ୟୁନିଟ ଚାଲିବା ସମ୍ଭବପର ନୁହେଁ। ତେଣୁ ଆବଶ୍ୟକ ପରିମାଣରେ କୋଇଲା ନ ମିଳିଲେ ଆଗାମୀ ଦିନରେ ଅନ୍ୟ ୟୁନିଟକୁ ବନ୍ଦ କରାଯିବ ବୋଲି ଜଣାପଡ଼ିଛି। ଏ ନେଇ ବିଦ୍ୟୁତ୍‌ ଉପତ୍ାଦନ କ୍ରମଶଃ ହ୍ରାସ ପାଇବାରେ ଲାଗିଛି ।