ଭଞ୍ଜନଗର,୧୮।୩(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର କବି ସମ୍ରାଟ ଉପେନ୍ଦ୍ର ଭଞ୍ଜ ଶିକ୍ଷକ ଶିକ୍ଷା ମହାବିଦ୍ୟାଳୟର ବାର୍ଷିକ ଉତ୍ସବ ବୁଧବାର ଅନୁଷ୍ଠିତ ହୋଇଯାଇଛି । ଏଥିରେ ଅଧକ୍ଷ ଡ ଦିଲ୍ଲୀପ କୁମାର ଖୁଣ୍ଟିଆ ଅଧ୍ୟକ୍ଷତା କରି ବିଦ୍ୟାଳୟର ସଫଳତା ସମ୍ପର୍କରେ କହିଥିଲେ । କଲେଜ ଛାତ୍ରୀଛାତ୍ରମାନେ ଜିଲା ଓ ରାଜ୍ୟସ୍ତରୀୟ ଅନେକ ପ୍ରତିଯୋଗୀତାରେ ଅଂଶଗ୍ରହଣ କରି ପୁରସ୍କୃତ ହେବାସହ କଲେଜ ପାଇଁ ଗୌରବ ଆଣିଛନ୍ତି । ଏଥିସହ ରାଜ୍ୟ ସରକାରଙ୍କ ସହଯୋଗରେ କଲେଜର ଅନେକ ବିକାଶ ହୋଇପାରିଛି ବୋଲି କହିଥିଲେ ।
ବିଡିଓ ଭାରତୀ ଦେବୀ ମୁଖ୍ୟ ଅତିଥି ଭାବେ ଯୋଗଦେଇ ଛାତ୍ରର ଅନ୍ତର୍ନିହିତ ଜ୍ଞାନକୁ ଲୋକ ଲୋଚନକୁ ଆଣିବାରେ ଶିକ୍ଷକମାନଙ୍କ ଭୂମିକା ଗୁରୁତ୍ୱପୂର୍ଣ୍ଣ ବୋଲି କହିଥିଲେ। ତେଣୁ ଗୁରୁ ଛାତ୍ରୀଛାତ୍ରମାନେ ଏଥିପ୍ରତି ଦୃଷ୍ଟି ଦେବାକୁ ସେ ଉପସ୍ଥିତ ଛାତ୍ରୀଛାତ୍ରଙ୍କୁ ଆହ୍ବାନ କରିଥିଲେ । ରେଭେନ୍ସା ବିଶ୍ୱବିଦ୍ୟାଳୟ କଟକର ଅବସରପ୍ରାପ୍ତ ପ୍ରଫେସର ଡ ଗୌରାଙ୍ଗ ଚରଣ ନନ୍ଦ ମୁଖ୍ୟବକ୍ତା ଭାବେ ଯୋଗଦେଇଥିଲେ । ପୂର୍ବତନ ବାଚସ୍ପତି ସୋମନାଥ ରଥ ଭଞ୍ଜନଗର ବିଏଡ କଲେଜ କରିବାରେ ମୁଖ୍ୟ ଭୂମିକା ନିର୍ବାହ କରିଥିଲେ । ତାଙ୍କରି ଯୋଗୁଁ ଏହି ଅଞ୍ଚଳରେ
ଶିକ୍ଷାର ବିକାଶ ହୋଇପାରିଛି । ଶିକ୍ଷା ବ୍ୟବସ୍ଥାରେ ଅନେକ ଜଟିଳ ପ୍ରକ୍ରିୟା ଅଛି। ସେଥିରୁ ବାହାରି ଶିକ୍ଷକମାନେ ଆଗକୁ ବଢ଼ିବାକୁ ପଡିବ ।
ଗୁରୁ ଛାତ୍ରୀଛାତ୍ରମାନେ ସେମାନଙ୍କ ଅନ୍ତର୍ନିହିତ କଳାର ବିକାଶ କରି ତାହାକୁ ଶ୍ରେଣୀ କକ୍ଷରେ ପ୍ରତିଫଳିତ କରିବାକୁ ପଡିବ। ଶିକ୍ଷକମାନେ ଜଟିଳ ଶିକ୍ଷା ପ୍ରକ୍ରିୟା ଏବଂ ସମାଜ ସହ ଯୋଡ଼ି ହୋଇ ଆଗକୁ ବଢ଼ିବାକୁ ପଡିବ । ଆଧୁନିକ ଶିକ୍ଷା ପ୍ରଣାଳୀରେ ଶିକ୍ଷକ ନିଜକୁ ଅଭ୍ୟସ୍ତ କରି ସମାଜ ସେବାରେ ବ୍ରତୀ ହେବା ଆବଶ୍ୟକ । କାର୍ଯ୍ୟ କ୍ଷେତ୍ରରେ ଅନେକ ଚାପ ଏବଂ ସମସ୍ୟା ଆସୁଛି । ଶିକ୍ଷକମାନେ ଦୃଷ୍ଟିକୋଣ ବଦଳାଇ ପ୍ରେରଣାଦାୟୀ ହେବା ଦରକାର ବୋଲି ମୁଖ୍ୟବକ୍ତା କହିଥିଲେ ।
ଆସିଷ୍ଟାଣ୍ଟ ଡାଇରେକ୍ଟର ପ୍ରଣୟ କୁମାର, ସରପଞ୍ଚ ଶିବରାମ ସାହୁ ସମ୍ମାନିତ ଅତିଥି ଭାବେ ଯୋଗ ଦେଇଥିଲେ। ଛାତ୍ର ସଂସଦ ଉପଦେଷ୍ଟା ସସ୍ମିତା ବେହେରା, ସଭାନେତ୍ରୀ ମୋନାଲିସା ମିଶ୍ର, ଉପ ସଭାପତି ଯଜ୍ଞଦତ୍ତ ପ୍ରଧାନ, ସାଧାରଣ ସମ୍ପାଦକ ସରୋଜ ସେଠୀ, ସହ ସମ୍ପାଦକ ଆନନ୍ଦ ରାଉତରାୟ ପ୍ରମୁଖ କାର୍ଯ୍ୟକ୍ରମକୁ ପରିଚାଳନା କରିବାରେ ସହଯୋଗ କରିଥିଲେ । ଏହି ଅବସରରେ ବିଭିନ୍ନ ବିଭାଗରେ କୃତିତ୍ୱ ଅର୍ଜନ କରିଥିବା କୃତୀ ଛାତ୍ରୀଛାତ୍ରଙ୍କୁ ପୁରସ୍କୃତ କରାଯାଇଥିଲା। ଶେଷରେ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ ହୋଇଥିଲା।
