ଭବାନୀପାଟଣା, ୨୫।୪ (ଡି.ଏନ.ଏ.)- କଳାହାଣ୍ଡି ଜିଲାରେ କରୋନା ମୁକାବିଲା ପାଇଁ ଭବାନୀପାଟଣା ସହର ନିକଟସ୍ଥ ବାନ୍ଦପଲାସ୍ଥିତ ସରକାରୀ ଯାନ୍ତ୍ରିକ ମହାବିଦ୍ୟାଳୟଠାରେ କୋଭିଡ ହସ୍ପିଟାଲ ଶୁକ୍ରବାରଠାରୁ ଆରମ୍ଭ ହୋଇଛି। ଏହାକୁ ରାଜ୍ୟ ସରକାରଙ୍କ ତରଫରୁ ଜିଲା ପ୍ରଶାସନ ପରିଚାଳନା କରୁଥିବା ବେଳେ ଓଡିଶା ଖଣି ନିଗମ ଏହି କୋଭିଡ ହସ୍ପିଟାଲ ପାଇଁ ଆର୍ଥତ୍କ ସହାୟତା ପ୍ରଦାନ କରିଛି । ୨୦୦ ଶଯ୍ୟା ବିଶିଷ୍ଟ ଏହି କୋଭିଡ ହସ୍ପିଟାଲରେ ୬ଟି ଭେଣ୍ଟିଲେଟର ସୁବିଧା ଥିବା ଆଇସିୟୁ ରହିଛି । କୋଭିଡ ସନ୍ଦିଗ୍ଧମାନଙ୍କୁ ରଖାଯିବା ପାଇଁ ୭୦ଟି ସଙ୍ଗରୋଧ କୋଠରି ରହିଛି । ସେଠାରେ ମାଗଣା ଚିକିତ୍ସା ସୁବିଧା ଯୋଗାଇ ଦିଆଯିବ । କୋଭିଡ ହସ୍ପିଟାଲରେ ଡାକ୍ତର ଓ ସ୍ବାସ୍ଥ୍ୟ କର୍ମଚାରୀମାନଙ୍କ ରହିବା ଓ ଖାଇବା ବ୍ୟବସ୍ଥା ରହିଛି । ବର୍ତ୍ତମାନ ଏହି ହସ୍ପିଟାଲରେ ୧୭ଜଣ ଡାକ୍ତର ଅଛନ୍ତି । ସେମାନଙ୍କ ମଧ୍ୟରୁ ୫ଜଣ ଡାକ୍ତର ଆଇସିୟୁ ପରିଚାଳନା ତାଲିମପ୍ରାପ୍ତ। ୫୧ଜଣ ଷ୍ଟାଫ ନର୍ସ କାର୍ଯ୍ୟ କରୁଛନ୍ତି । ସେମାନଙ୍କ ମଧ୍ୟରୁ ୧୦ଜଣ ଷ୍ଟାଫ ନର୍ସ ଆଇସିୟୁ ପରିଚାଳନା ତାଲିମ ନେଇଛନ୍ତି । ୯ଜଣ ଫାର୍ମାସିଷ୍ଟ ଅଛନ୍ତି । ସେମାନଙ୍କ ମଧ୍ୟରୁ ଜଣେ ଫାର୍ମାସିଷ୍ଟ ଆଇସିୟୁ ତାଲିମ ପାଇଛନ୍ତି । ୮ଜଣ ଲ୍ୟାବ ଟେକ୍ନିସିଆନ, ଜଣେ ମାଇକ୍ରୋ ବାଇଲୋଜିଷ୍ଟ ଏବଂ ତାଙ୍କୁ ସହଯୋଗ କରିବା ପାଇଁ ସ୍ବାସ୍ଥ୍ୟ କର୍ମଚାରୀ, ସିକ୍ୟୁରିଟି, ସୁଇପର୍ ଅଛନ୍ତି । ଭବିଷ୍ୟତରେ ଆବଶ୍ୟକତା ଅନୁଯାୟୀ ବିଭିନ୍ନ ପଦବୀ ପୂରଣ କରାଯିବ । ଏହି କୋଭିଡ ହସ୍ପିଟାଲର ଅଧିକାରୀ ଭାବରେ କଳାହାଣ୍ଡି ଦକ୍ଷିଣ ବନଖଣ୍ଡ ଡିଏଫଓ ଟି. ଅଶୋକ କୁମାର ଓ ଅଧିକୃତ ମେଡିକାଲ ଅଫିସର ଭାବରେ ଡ. ନିହାରେନ୍ଦ୍ର ପଣ୍ଡାଙ୍କୁ କୋଭିଡ ହସ୍ପିଟାଲର ସମସ୍ତ ପ୍ରଶାସନିକ ପରିଚାଳନା ଦାୟିତ୍ୱ ପ୍ରଦାନ କରାଯାଇଥିବା ଜିଲା ପ୍ରଶାସନ ପକ୍ଷରୁ ଏକ ପ୍ରେସ ବିଜ୍ଞପ୍ତିରେ ପ୍ରକାଶ କରାଯାଇଛି।
