ବ୍ରହ୍ମପୁର ଅଫିସ,୧୪ା୨- ନ୍ୟାୟ ପରିଷଦ (ଜୁଡିସିଆଲ ଏକାଡେମୀ) ସଦସ୍ୟା ଓ ସଦସ୍ୟମାନେ ଗୁରୁବାର ବ୍ରହ୍ମପୁରରେ ପହଞ୍ଚିଥିଲେ। ୧୫ ଜିଲାର ୨୬ ଜଣିଆ ଟିମ୍ ପ୍ରଥମେ ସୁଧାର ଗୃହରେ ରହୁଥିବା ବାଳ ଅପରାଧୀମାନଙ୍କୁ ଭେଟିଥିଲେ। ସେଠାରେ ସେମାନଙ୍କର ରହଣି, ଖାଦ୍ୟପେୟ, ସ୍ବାସ୍ଥ୍ୟାବସ୍ଥା ଓ ସେମାନଙ୍କ ନାମରେ ଥିବା ମାମଲାଗୁଡିକର ଅଗ୍ରଗତି ସମ୍ପର୍କରେ ଆଲୋଚନା କରିଥିଲେ। ଏପରିକି ସେମାନେ ସମାଜର ମୁଖ୍ୟସ୍ରୋତକୁ କିପରି ଫେରି ଆସିବେ ସେ ନେଇ ଆଲୋଚନା କରିଥିଲେ ବୋଲି ଗଞ୍ଜାମ ଜିଲା ସଦସ୍ୟା ସରିତ୍ରୀ କୁମାରୀ ପଟ୍ଟନାୟକ ସୂଚନା ଦେଇଛନ୍ତି। ପରେ ସେମାନେ କେନ୍ଦ୍ରୀୟ ନାରୀ ସେବା ସଦନ ଯାଇଥିଲେ। ସେଠାରେ ରହୁଥିବା ଯୁବତୀ ଓ ମହିଳାଙ୍କୁ ଭେଟି ବିଭିନ୍ନ ସମସ୍ୟା ସମ୍ପର୍କରେ ବୁଝିଥିଲେ। ଶେଷରେ ଗୋଷାଣୀନୂଆଗଁାରେ ଥିବା ଶିଶୁ ଯତ୍ନ ଏବଂ ସୁରକ୍ଷା କେନ୍ଦ୍ର (ଉତ୍କଳ ବାଳାଶ୍ରମ) ପରିଦର୍ଶନରେ ଯାଇଥିଲେ। କେଉଁ ପରିବେଶ ଓ ପରିସ୍ଥିତିରେ ଅନ୍ତେବାସୀମାନେ ଉତ୍କଳ ବାଳାଶ୍ରମରେ ରହୁଛନ୍ତି, ସେମାନଙ୍କୁ ଠିକ୍ ଭାବେ ଖାଦ୍ୟ ଦିଆଯାଉଛି କି ନାହିଁ ଓ ଅନ୍ତେବାସୀଙ୍କ ସ୍ବାସ୍ଥ୍ୟାବସ୍ଥା ସମ୍ପର୍କରେ ମଧ୍ୟ ଏହି କମିଟି ବୁଝିଥିଲେ। ଗଞ୍ଜାମ, ଗଜପତି, ବଲାଙ୍ଗୀର, ସମ୍ବଲପୁର, ପୁରୀ, କୋରାପୁଟ, ଖୋର୍ଦ୍ଧା, ମୟୂରଭଞ୍ଜ, କେନ୍ଦ୍ରାପଡା, ଝାରସୁଗୁଡା, ଯାଜପୁର, ଦେବଗଡ, ବରଗଡ, ବାଲେଶ୍ୱର ଓ ଅନୁଗୋଳ ଜିଲାରୁ ସଭ୍ୟା ଓ ସଭ୍ୟମାନେ ଆସିଥିଲେ। ୩ ଅନୁଷ୍ଠାନ ପରିଦର୍ଶନ କରି ସେଠାକାର ରିପୋର୍ଟ ସରକାରଙ୍କ ନିକଟକୁ ପଠାଯିବ ବୋଲି କହିଛନ୍ତି। ସମସ୍ତ ସଭ୍ୟା ଓ ସଭ୍ୟମାନେ କଟକ ସ୍ଥିତ ଜୁଡିସିଆଲ ଏକାଡେମୀ ଆଣ୍ଡ ଟ୍ରେନିଂ ସେଣ୍ଟରରୁ ଆସିଛନ୍ତି ବୋଲି ସରିତ୍ରୀ କହିଥିଲେ।
