ସଜନାଗଡ଼, ୩।୧(ଡି.ଏନ.ଏ.)-ବିନା ଅନୁମତିରେ ବାଲେଶ୍ୱର ଜିଲା ନୀଳଗିରି ବ୍ଲକ ଜଡ଼ିଦା ପଞ୍ଚାୟତ ରାଧାମାଧବ ଜୀଉ ହାଇସ୍କୁଲ ପରିସରରେ ଥିବା ୨୦ରୁ ଊର୍ଦ୍ଧ୍ୱ ମୂଲ୍ୟବାନ ଗଛ କାଟି ନିଆଯାଇଛି। ପ୍ରଧାନଶିକ୍ଷକ ଗୁରୁବାର ବିଦ୍ୟାଳୟରେ ପହଞ୍ଚତ୍ ଗଛ କଟା ହୋଇଥିବା ଦେଖି ନୀଳଗିରି ବିଇଓ ଏବଂ ନୀଳଗିରି ରେଞ୍ଜରଙ୍କୁ ଲିଖିତ ଭାବେ ଅଭିଯୋଗ କରିଛନ୍ତି। ଏ ସମ୍ପର୍କରେ ନୀଳଗିରି ରେଞ୍ଜର ରୁଦ୍ରାନନ୍ଦ ବାରିକ ତଦନ୍ତ କରିବେ ବୋଲି ସୂଚନା ଦେଇଛନ୍ତି।
ରାଧାମାଧବଜୀଉ ହାଇସ୍କୁଲର ପାଚେରି ନିର୍ମାଣ ପାଇଁ ଜଡ଼ିଦା ପଞ୍ଚାୟତ ପକ୍ଷରୁ ଏସ୍ଏଫ୍ସି ଯୋଜନାରେ ଆନୁମାନିକ ୩ଲକ୍ଷ ଟଙ୍କା ମଞ୍ଜୁର କରାଯାଇଥିଲା। ପାଚେରି ନିର୍ମାଣ ସ୍ଥାନରେ ପ୍ରାୟ ୨୦ରୁ ଊର୍ଦ୍ଧ୍ୱ ନିମ୍ବଗଛ ସମେତ ବହୁ ମୂଲ୍ୟବାନ ଗଛ ଥିବାରୁ ପ୍ରଧାନଶିକ୍ଷକ ସୁଧାଂଶୁ ପାଢ଼ୀ ଗଛକଟା ବାବଦରେ ଏକ ନୋଟିସ୍ ଜାରି କରିଥିଲେ। ସ୍କୁଲ ପରିଚାଳନା କମିଟି ଚୂଡ଼ାନ୍ତ ବୈଠକରେ ପ୍ରଧାନଶିକ୍ଷକ ନୋଟିସ ଜାରି କରିଥିଲେ। ୩ତାରିଖରେ ସ୍କୁଲ ପରିଚାଳନା କମିଟିର ନିଷ୍ପତ୍ତି ପରେ ଗଛଗୁଡିକୁ କାଟିବା ପାଇଁ ବନବିଭାଗର ଅନୁମତି ନେଲା ପରେ ଗଛ କଟାଯାଇଥାନ୍ତା। ମାତ୍ର କେତେକ ଦୁର୍ବୃତ୍ତ ରାତିଅଧିଆ ଜେସିବି ଲଗାଇ ବୁଧବାର ବଡ଼ ବଡ଼ ନିମ୍ବଗଛ ସମେତ ବହୁ ମୂଲ୍ୟବାନ ଗଛକୁ ଉପାଡ଼ି କିଛି ଗଛକୁ ଘଟଣାସ୍ଥଳରୁ ନେଇଯାଇଛନ୍ତି। ପାଚେରି ନିର୍ମାଣ ଲାଗି ସମ୍ପୃକ୍ତ କାର୍ଯ୍ୟନିର୍ବାହୀ ଅଧିକାରୀଙ୍କ ନାମରେ କାର୍ଯ୍ୟାଦେଶ ଥିବା ବେଳେ ଗଛକଟା ବାବଦରେ ସେ କିଛି ଜାଣି ନ ଥିବାର ପ୍ରକାଶ କରିଛନ୍ତି। ଏହାର ଉଚ୍ଚସ୍ତରୀୟ ତଦନ୍ତ ଦାବି ହୋଇଛି।
