ରାୟଗଡ଼(ଗଜପତି) ୧।୫(ଡି.ଏନ୍.ଏ.): ଗଜପତି ଜିଲା ରାୟଗଡ ବ୍ଲକ କାର୍ଯ୍ୟାଳୟକୁ ଲାଗି ରହିଥିବା ବାତ୍ୟା ଆଶ୍ରୟସ୍ଥଳି। ଯାହା ଏବେ ଅସାମାଜିକଙ୍କ ଆଡ୍ଡାସ୍ଥଳୀ ପାଲଟିଥିବା ନେଇ ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ଲକ୍ଷାଧିକ ଟଙ୍କା ବ୍ୟୟରେ ନିର୍ମିତ ହୋଇଥିବା ଏହି ଆଶ୍ରୟସ୍ଥଳୀଟି କାମରେ ଲାଗୁ ନ ଥିବାରୁ ଅସାମାଜିକ ବ୍ୟକ୍ତିମାନେ ଏଥିରେ ଆଡ୍ଡା ଜମାଉଛନ୍ତି। ଭ ସମୟରେ ସାମୁଦ୍ରିକ ଝଡ଼, ବନ୍ୟା ଓ ବାତ୍ୟା ସିଧାସଳଖ ରାୟଗଡ଼ ବ୍ଲକରେ ବ୍ୟାପକ କ୍ଷତି ଘଟାଇବା ସହ ଧନଜୀବନ ହାନି ଘଟାଏ। ଏଣୁ ପ୍ରାୟ ୧୦ ବର୍ଷ ପୂର୍ବେ ରାୟଗଡ଼ ବ୍ଲକରେ ବାତ୍ୟା ଆଶ୍ରୟସ୍ଥଳି ନିର୍ମାଣ କରାଯାଇଛି। ସାମୁଦ୍ରିକ ଝଡ଼ ବା ବାତ୍ୟା, ବନ୍ୟା ଆଦି ଦାଉରୁ ରକ୍ଷା ପାଇବା ପାଇ ସ୍ଥାନୀୟ ଲୋକଙ୍କୁ ଅସ୍ଥାୟୀ ଭାବେ ଥଇଥାନ କରାଇବା ପାଇଁ ନିର୍ମାଣ କରାଯାଇଥିବା ଏହି କୋଠା କୌଣସି କାମରେ ଲାଗୁନି। ବ୍ଲକ କର୍ତ୍ତୃପକ୍ଷଙ୍କ ଆନ୍ତରିକତାର ଅଭାବ ଯୋଗୁ ଏହା ଅଦରକାରୀ ହୋଇପଡିଛି ବୋଲି ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ଉକ୍ତ ଆଶ୍ରୟସ୍ଥଳୀର ଠିକ୍ ଭାବେ ରକ୍ଷଣାବେକ୍ଷଣ କରାଯାଉ ନ ଥିବାରୁ କେତେକ ଅସାମାଜିକ ବ୍ୟକ୍ତି ଏହାକୁ ଦଖଲ କରି ଏଠାରେ ମଦ୍ୟପାନ, ଗଞ୍ଜେଇ ଆଦି ନିଶା ଖାଇବା ସହ ଜୁଆଖେଳୁଥିବା ଅଭିଯୋଗ ହେଉଛି। ଫଳରେ ଏହି ଆଶ୍ରୟସ୍ଥଳୀଟି ପାନପୁଡିଆ ଛେପ ଦାଗ ସହ ଏହାର ଚାରିପଟେ ଅଳିଆ ଆବର୍ଜନା ଜମି ରହିଛି। ଏହି ବାତ୍ୟା ଆଶ୍ରୟସ୍ଥଳୀକୁ ଲାଗି ରହିଛି କସ୍ତୁରବା ଗାନ୍ଧୀ ଆବାସିକ ବିଦ୍ୟାଳୟ। ଏଠାରେ ଶତାଧିକ ଆଦିବାସୀ କିଶୋରୀମାନେ ରହି ଆସୁଛନ୍ତି। ଏହାଛଡ଼ା ପୋଲିସ ଥାନାର ପୋଲିସ ଥାନାର ଅତି ନିକଟବର୍ତ୍ତୀ ହୋଇଥିବା ସତ୍ତ୍ୱେ ଏଠାରେ ଚାଲିଥିବା ଅସାମାଜିକ କାର୍ଯ୍ୟକଳାପ ପ୍ରତି ପୋଲିସ ନଜର ପଡୁନି ବୋଲି ଲୋକେ ଅଭିଯୋଗ କରିଛନ୍ତି। କୌଣସି ସମୟରେ ଏଠାରେ ଅପ୍ରିତିକର ପରିସ୍ଥିତି ସୃଷ୍ଟି ହୋଇପାରେ। ଏଣୁ ପ୍ରଶାସନ ଏଥିପ୍ରତି ଦୃଷ୍ଟି ଦେବାକୁ ବୁଦ୍ଧିଜୀବୀମାନେ ଦାବି କରିଛନ୍ତି।
