ବଲାଙ୍ଗୀର,୧୪ା୫: ବଲାଙ୍ଗୀର ରେଲ୍ୱେ ଷ୍ଟେଶନରେ ଗୁରୁବାର ମଧ୍ୟାହ୍ନରେ ତାମିଲନାଡୁର ତିରୁପୁରରୁ ଆସୁଥିବା ଶ୍ରମିକ ସ୍ପେଶାଲ ଟ୍ରେନ୍ ପହଞ୍ଚିବ। ଏହି ଟ୍ରେନରେ ଆସୁଥିବା ପ୍ରବାସୀଙ୍କ ସୁବିଧାଜନକ ଆଗମନ ଓ ପ୍ରତ୍ୟାଗମନ ପାଇଁ ବଲାଙ୍ଗୀର ଜିଲା ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇ ସହରର କେତେକ ନିର୍ଦ୍ଦିଷ୍ଟ ଅଞ୍ଚଳରେ କର୍ଫ୍ୟୁ ଜାରି କରାଯାଇଛି। ସକାଳ ୯ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଏହି କର୍ଫ୍ୟୁ ବଳବତ୍ତର ରହିବ। ରେଲ୍ୱେ ଷ୍ଟେଶନ, ସାଲେପାଲି ଗାଁ, ରେଲୱେ ଷ୍ଟେଶନରୁ ସାଲେପାଲି, ଆରଟିଓ ଅଫିସ ରିଙ୍ଗ ରୋଡ୍ ଦେଇ ଟିଟିଲାଗଡ଼ ରୋଡ୍, ଆରଟିଓ ଛକରୁ ମହିଳା ମହାବିଦ୍ୟାଳୟ ଛକ ଦେଇ କଲେଜ ଛକ, ରେଲ୍ୱେ ଷ୍ଟେଶନ ଛକରୁ ସୁଦପଡା ଦେଇ ବେହେରାପାଲି ରେଲୱେ ଓଭର ବ୍ରିଜ, ବେହେରାପାଲି ଛକରୁ ଏନ୍ଏଚ ଅଫିସ ଛକରେ କର୍ଫ୍ୟୁ ଓ ୧୪୪ ଧାରା ଜାରି କରାଯାଇଛି। ପୋଲିସ ବାହିନୀ ସମସ୍ତ ଅଞ୍ଚଳକୁ ସୁରକ୍ଷା ବଳୟ ରଖିଛନ୍ତି। ଜିଲାପାଳ, ଏସ୍ପି ଓ ଅନ୍ୟ ଅଧିକାରୀମାନେ ସମସ୍ତ ବ୍ୟବସ୍ଥା ତଦାରଖ କରୁଛନ୍ତି । ଅପରାହ୍ନରେ ଆଉ ଏକ ଶ୍ରମିକ ସ୍ପେଶାଲ ଟ୍ରେନ୍ ଆସି ବଲାଙ୍ଗୀର ରେଲ୍ୱେ ଷ୍ଟେଶନରେ ପହଞ୍ଚିବ। ତେବେ ଏନେଇ ସ୍ପଷ୍ଟ ସମୟ ଜଣାପଡ଼ିନାହିଁ । ଏହି ଟ୍ରେନ ଆସିବା ସ୍ପଷ୍ଟ ହେଲେ କର୍ଫ୍ୟୁ ଅବଧି ବଢ଼ିପାରେ ବୋଲି ଅନୁମାନ କରାଯାଉଛି ।
