ଭୁବନେଶ୍ୱର, ୧୧ା୨(ବ୍ୟୁରେ): ପ୍ରେମିକାଙ୍କ ଶରୀରରେ ବନ୍ଧୁକ ଲଗାଇ ରୋମାନ୍ସ କରୁଥିଲେ ପ୍ରେମିକ। ଅଜାଣତରେ ଦବି ହୋଇଯାଇଥିଲା ଟ୍ରିଗର। ବନ୍ଧୁକର ଗୋଟିଏ ଗୁଳି ପ୍ରେମିକାଙ୍କ ଜଙ୍ଘରୁ ବାହାରି ଗୋଡ଼ର ଅନ୍ୟ ଏକ ଅଂଶରେ ପଶିଯାଇଥିଲା। ପ୍ରେମିକ ଜଣକ ଗୁରୁତର ଅବସ୍ଥାରେ ଯୁବତୀଙ୍କୁ ସ୍ଥାନୀୟ ଏକ ଘରୋଇ ହସ୍ପିଟାଲରେ ଭର୍ତ୍ତି କରିବା ପରେ ଘଟଣା ପଦାକୁ ଆସିଛି। ପ୍ରେମିକାଙ୍କ ସହ ଖେଳୁ ଖେଳୁ ଏଭଳି ଦୁର୍ଘଟଣା ଘଟିଲା ବୋଲି ପ୍ରେମିକ ଜଣକ କହିଥିବା ଡିସିପି ଅନୁପ କୁମାର ସାହୁ ଗଣମାଧ୍ୟମକୁ କହିଛନ୍ତି।
ଇନ୍ଫୋସିଟି ଥାନା ଅନ୍ତର୍ଗତ କାନନବିହାରସ୍ଥିତ ବଜରଙ୍ଗବିହାରରେ ସୋମବାର ମଧ୍ୟାହ୍ନରେ ଘଟିଥିବା ଏହି ଘଟଣାକୁ ନେଇ ଚର୍ଚ୍ଚା ଜୋର୍ ଧରିଛି। ପୋଲିସ ନିଜ ଆଡୁ ଆଇପିସି ଦଫା ୩୦୭ ଓ ୨୭ ଆମର୍ସ ଆକ୍ଟରେ ଏକ ମାମଲା (ନଂ-୨୨/୨୦) ରୁଜୁ କରି ତଦନ୍ତ ଆରମ୍ଭ କରିଛି। ପ୍ରାଥମିକ ତଦନ୍ତ ପରେ ଗୁଳିମାଡ଼ କରିଥିବା ପ୍ରେମିକ ତଥା ଯୁବତୀଙ୍କ ପୁରୁଷ ବନ୍ଧୁଙ୍କୁ ଗିରଫ କରାଯାଇଛି। ସେ ହେଲେ ଜଗତ୍ସିଂହପୁର ଜିଲା ଏରସମା ଅଞ୍ଚଳର ଆଶିଷ କୁମାର ନାୟକ। ସେ ଭୁବନେଶ୍ୱରର ଏକ ସରକାରୀ କଲେଜରେ ଯୁକ୍ତ୩ରେ ପଢ଼ୁଥିବା କହୁଥିବାବେଳେ ପୋଲିସ ଏହାର ସତ୍ୟାସତ୍ୟ ଯାଞ୍ଚ କରୁଛି। ମଙ୍ଗଳବାର ତାଙ୍କୁ କୋର୍ଟ ଚାଲାଣ କରାଯିବ ବୋଲି ଥାନାଧିକାରୀ ବିଶ୍ୱଜିତ୍ ମହାନ୍ତି କହିଛନ୍ତି। ତେବେ ଗୁଳିମାଡ଼ ପରେ ମୁଣ୍ଡ କିଛି କାମ ନ କରିବାରୁ ବନ୍ଧୁକ ଫିଙ୍ଗି ଦେଇଥିବା ଆଶିଷ ପୋଲିସକୁ କହିଥିଲେ। ଏହାପରେ ଏକ ଟିମ୍ ତାଙ୍କୁ ଧରି ଫିଙ୍ଗିଥିବା ସ୍ଥାନରେ ଖୋଜାଖୋଜି କରିଥିଲେ ମଧ୍ୟ ବନ୍ଧୁକ ମିଳିପାରିନି। ଫଳରେ ଘଟଣାକୁ ନେଇ ରହସ୍ୟ ସୃଷ୍ଟି ହୋଇଥିବାବେଳେ ପୋଲିସର ଚିନ୍ତା ବଢ଼ିଛି। ଡିସିପି ସାହୁ, ଜୋନ୍ ଏସିପି ତରୁଣ କୁମାର ଦାସ ଓ ଥାନାଧିକାରୀ ମହାନ୍ତି ଘଟଣାସ୍ଥଳରେ ପହଞ୍ଚତ୍ ତଦନ୍ତ କରିଛନ୍ତି। ଏପଟେ ଦୀର୍ଘ ସମୟ ଅସ୍ତ୍ରୋପଚାର ପରେ ଯୁବତୀଙ୍କ ଗୋଡ଼ରୁ ଗୁଳି ବାହାରିଛି। ଯୁବତୀ ଜଣକ ସୁସ୍ଥ ଥିବାବେଳେ ଚିକିତ୍ସା ପାଇଁ କମିଶନରେଟ ପୋଲିସ ପାଣ୍ଠିରୁ ତାଙ୍କୁ ୨୫ହଜାର ଟଙ୍କା ଦିଆଯାଇଥିବା ଡିସିପି ଟୁଇଟ୍ କରି ଜଣାଇଛନ୍ତି।
ଥାନା ଅଧିକାରୀ ମହାନ୍ତି କହିଛନ୍ତି, ଆହତ ଯୁବତୀଙ୍କ ଘର ବାଲେଶ୍ୱର ହୋଇଥିବାବେଳେ ସେ ଦୁଇବର୍ଷ ହେବ ଭୁବନେଶ୍ୱର ଆସି ଏକ ଘରୋଇ କଲେଜରେ ଫ୍ୟାଶନ ଡିଜାଇନ୍ ପାଠ ପଢୁଥିଲେ। ଏହି ସମୟରେ ଆଶିଷଙ୍କ ସହିତ ତାଙ୍କର ପ୍ରେମ ସମ୍ପର୍କ ଗଢି ଉଠିଥିଲା। ଦୁହେଁ ବଜରଙ୍ଗବିହାରରେ ଏକ ଫ୍ଲାଟ୍ରେ ଘରଭଡ଼ା ନେଇ ଲିଭ୍ ଇନ୍ ରିଲେଶନଶିପ୍ରେ ରହୁଥିଲେ। ଯୁବତୀଙ୍କ ଜଙ୍ଘ ଉପରେ ବନ୍ଧୁକ ଚଲାଇ ରେମାନ୍ସ କରୁଥିବା ସମୟରେ ଗୁଳି ଫୁଟି ଯାଇଥିଲା ବୋଲି ଅଭିଯୁକ୍ତ ଆଶିଷ ସ୍ବୀକାର କରିଥିବା ଥାନାଧିକାରୀ କହିଛନ୍ତି। ତେବେ ଗୁଳି ପଶିଯିବା ପରେ ଯୁବତୀଙ୍କ ଜଙ୍ଘରୁ ପ୍ରଚୁର ରକ୍ତସ୍ରାବ ହୋଇଥିଲା। ଫ୍ଲାଟ୍ରୁ ତାଙ୍କୁ ଗାଡ଼ିକୁ ନେବା ପର୍ଯ୍ୟନ୍ତ ରକ୍ତଛିଟା ତଳେ ପଡିଥିବା ତଦନ୍ତବେଳେ ଦେଖିବାକୁ ମିିଳିଥିଲା। ଆଶିଷଙ୍କ ନାମରେ ବୋମା ମାଡ଼ ସହ ବହୁ ମାମଲା ରହିଛି। ସମସ୍ତ ଘଟଣାର ତଦନ୍ତ କରାଯାଉଥିବା ସେ ସୂଚନା ଦେଇଛନ୍ତି।
