ନୂଆଦିଲ୍ଲୀ,୭।୬: କରୋନ ସଂକ୍ରମଣ ଜନିତ ସମସ୍ୟା ଓ କଟକଣା କାରଣରୁ ବିଦେଶରେ ଫସି ରହିଥିବା ଭାରତୀୟମାନଙ୍କୁ ଦେଶକୁ ଫେରାଇ ଆଣିବା ପାଇଁ କେନ୍ଦ୍ର ସରକାର ଏକ ସ୍ବତନ୍ତ୍ର ଯୋଜନା ‘ବନ୍ଦେ ଭାରତ ମିଶନ’ର ଶୁଭାରମ୍ଭ କରିଛନ୍ତି। ଏହି ଯୋଜନାର ତୃତୀୟ ପର୍ଯ୍ୟାୟ ପାଇଁ ଏୟାର ଇଣ୍ଡିଆ ଟିକେଟ ବିକ୍ରି ନେଇ ଘୋଷଣା କରିଛି। ଆମେରିକା, ଇଂଲଣ୍ଡ, କାନାଡା, ବ୍ରିଟେନ ଓ ୟୁରୋପ ଭଳି ଦେଶରେ ଫସି ରହିଥିବା ଭାରତୀୟଙ୍କ ପାଇଁ ଏହି ଟିକେଟ ବିକ୍ରି ହେଉଥିବା ଏୟାର ଇଣ୍ଡିଆ ପକ୍ଷରୁ ସୂଚନା ରହିଛି । ଗତ ଶୁକ୍ରବାର ସନ୍ଧ୍ୟା ୫ଘଟିକାରେ କମ୍ପାନୀ ଟିକେଟ ବିକ୍ରି ଆରମ୍ଭ କରିଥିଲା। ବୁକିଂର ମାତ୍ର ୧୫ ଘଣ୍ଟା ମଧ୍ୟରେ ପ୍ରାୟ ୨୨ହଜାର ଟିକେଟ ବିକ୍ରି ହୋଇଥିବା କମ୍ପାନୀ ସୂଚନା ଦେଇଛି । ଆଗାମୀ ଦିନରେ ବିଦେଶର ଅନ୍ୟ ସବୁ ସ୍ଥାନରୁ ଭାରତୀୟଙ୍କୁ ସ୍ବଦେଶ ଫେରାଇ ଆଣିବା ବିଷୟରେ ଏହା ଆବଶ୍ୟକ ପଦକ୍ଷେପ ଗ୍ରହଣ କରିବ। କମ୍ପାନୀ ବର୍ତ୍ତମାନ ୟୁରୋପ, ଅଷ୍ଟ୍ରେଲିଆ, ଆଫ୍ରିକା, କାନାଡା, ଆମେରିକା, ବ୍ରିଟେନ ଓ ଇଂଲଣ୍ଡ ଭଳି ଦେଶକୁ ଆସନ୍ତା ୧୦ ତାରିଖରୁ ଜୁଲାଇ ୧ ମଧ୍ୟରେ ପ୍ରାୟତଃ ୩୦୦ସ୍ବତନ୍ତ୍ର ବିମାନ ଚଳାଇବ। ସରକାରଙ୍କର ବନ୍ଦେ ଭାରତ ମିଶନ ଯୋଜନା ଅଧୀନରେ ଏହି ସବୁ ଦେଶରୁ ସ୍ବତନ୍ତ୍ର ବିମାନ ଯୋଗେ ଭାରତୀୟମାନଙ୍କୁ ସ୍ବଦେଶ ଫେରାଇ ଅଣାଯିବ ବୋଲି ଏୟାର ଇଣ୍ଡିଆ ସୂଚନା ଦେଇଛି।
