କେନ୍ଦୁଝର/ଢେଙ୍କିକୋଟ, ୧୬ା୭ (ସ୍ବ.ପ୍ର.): ହରିଚନ୍ଦନପୁର ବ୍ଲକର ବିଭିନ୍ନ ସ୍ଥାନରେ ବୁଧବାର ଅପରାହ୍ନରେ ବଜ୍ରପାତ ଘଟି ଏକ ଦମ୍ପତି ସମେତ ୩ ଜଣଙ୍କ ମୃତ୍ୟୁ ହୋଇଥିବା ବେଳେ ଅନ୍ୟ ଜଣେ ଗୁରୁତର ଆହତ ହୋଇ ଚିକିତ୍ସାଧୀନ ଅଛନ୍ତି। ତାଙ୍କୁ ସ୍ଥାନୀୟ ଡାକ୍ତରଖାନାରେ ଭର୍ତ୍ତି କରାଯାଇଛି । ବୁଧବାର କେତେକ ମହିଳା ଓ ପୁରୁଷ ଚାଷୀ ବିଲକୁ କାମ କରିବାକୁ ଯାଇଥିଲେ। ହଠାତ ବର୍ଷା ହେବା ପରେ ବଜ୍ରପାତ ହେବାରୁ ବିଲରେ କାମ କରୁଥିବା ବଡଶିଆଡିମାଳ ଗ୍ରାମର ଚୈତନ୍ୟ ମହାନ୍ତ (୫୦) ଓ ତାଙ୍କ ସ୍ତ୍ରୀ ମୀନା ମହାନ୍ତ (୪୫) ଟଳି ପଡିଥିଲେ । ଖବର ପାଇ ଅଗ୍ନିସେବାବାହିନୀ ସେମାନଙ୍କୁ ଉଦ୍ଧାର କରି ହରିଚନ୍ଦନପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ନେଇଥିଲେ । ତେବେ ସେଠାରେ ଡାକ୍ତର ସେମାନଙ୍କୁ ମୃତ ଘୋଷଣା କରିଥିଲେ। ସେହିପରି ଠାକୁରପଡ଼ା ଗ୍ରାମରେ ଅପରାହ୍ନ ପ୍ରାୟ ୨ଟାରେ ବିଲରେ କାମ କରୁଥିବାବେଳେ ବର୍ଷା ହେବାରୁ କାମ କରୁଥିବା ମହିଳା ମାନେ ଘରକୁ ପଳାଇଯାଉଥିବା ବେଳେ ଜୟନ୍ତୀ ମହାନ୍ତ (୪୫) ଯାଇପାରି ନ ଥିଲେ। ଫଳରେ ବଜ୍ରପାତ ହେବାରୁ ତାଙ୍କୁ ହରିଚନ୍ଦନପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ନିଆଯାଇଥିଲା। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଅନ୍ୟ ଜଣେ କମଳାଙ୍ଗି ଗ୍ରାମର ଲାବଣ୍ୟବତୀ ମହାନ୍ତ ଆହତ ହୋଇ ହରିଚନ୍ଦନପୁର ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଚିକିତ୍ସାଧୀନ ଥିବା ଜଣାପଡିଛି। ପାଲିସ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରିବାସହ ଅପମୃତ୍ୟୁ ମାମଲା ରୁଜୁ କରି ଘଟଣାର ତଦନ୍ତ ଚଳାଇଛି।
