ନୂଆଦିଲ୍ଲୀ,୨୦।୧୨(ପି.ଟି.): ଜର୍ମାନୀର କଲୋନେଠାରେ ଚାଲିଥିବା ବକ୍ସିଂ ବିଶ୍ୱକପରେ ଶନିବାର ବିଶ୍ୱ ଚାମ୍ପିୟନଶିପ୍ ରୌପ୍ୟ ବିଜେତା ଭାରତର ଅମିତ ପଙ୍ଘାଲ ୫୨ କେ.ଜି. ବର୍ଗରେ ସ୍ବର୍ଣ୍ଣ ପଦକ ହାସଲ କରିଛନ୍ତି। ସେହିପରି +୯୧ କେ.ଜି. ବର୍ଗରେ ସତୀଶ କୁମାର ରୌପ୍ୟ ପଦକ ଜିତିଛନ୍ତି।
ଫାଇନାଲ ବାଉଟ୍ରେ ଅବତୀର୍ଣ୍ଣ ନ ହୋଇ ପଙ୍ଘାଲ ସ୍ବର୍ଣ୍ଣ ଜିତିଛନ୍ତି। କାରଣ ଜର୍ମାନୀର ଅର୍ଗିଷ୍ଟି ଟେରଟେରିୟାନ ତାଙ୍କୁ ଓ୍ବାକ୍ଓଭର ଦେଇଥିଲେ। ଅନ୍ୟପଟେ ଫ୍ରାନ୍ସର ଜାମିଲି ଡିନି ମେଇଣ୍ଡେଜଙ୍କୁ ସେମିଫାଇନାଲରେ ପରାସ୍ତ କରିଥିବା ସତୀଶ ଇଞ୍ଜୁରି କାରଣରୁ ଫାଇନାଲ ବାଉଟ୍ରେ ଅବତୀର୍ଣ୍ଣ ହୋଇ ନ ଥିଲେ ଓ ତାଙ୍କୁ ରୌପ୍ୟରେ ସନ୍ତୁଷ୍ଟ ହେବାକୁ ପଡିଛି। ଫଳରେ ଜର୍ମାନୀର ନେଲେଭିଏ ଟିଆଫାକ୍ ସ୍ବର୍ଣ୍ଣ ପଦକ ପାଇଛନ୍ତି।
ସେହିପରି ମହିଳା ବିଭାଗରେ ଭାରତର ସାକ୍ଷୀ ଓ ମନୀଷା ୫୭ କେ.ଜି. ବର୍ଗ ଫାଇନାଲରେ ପରସ୍ପରକୁ ଭେଟିବେ। ସେମିରେ ମନୀଷା ଦୁଇଥର ବିଶ୍ୱ ଚାମ୍ପିୟନଶିପ୍ ରୌପ୍ୟ ପଦକ ବିଜୟିନୀ ନିଜ ଦେଶରେ ସୋନିଆ ଲାଥରଙ୍କୁ ୫-୦ରେ ହରାଇଥିଲେ। ସେହିପରି ସାକ୍ଷୀ ସେମିରେ ଜର୍ମାନୀର ରାମୋନା ଗ୍ରାଫ୍ଙ୍କୁ ୪-୧ରେ ହରାଇ ଫାଇନାଲକୁ ଉଠିଥିଲେ। ତେବେ ଏସିଆନ ଗେମ୍ସ ବ୍ରୋଞ୍ଜ୍ ପଦକ ବିଜୟିନୀ ପୂଜା ରାଏ ବ୍ରୋଞ୍ଜ ପଦକ ପାଇଛନ୍ତି। ସେହିପରି ହୁସାମୁଦ୍ଦିନ ଓ ଗୌରବ ସୋଲାଙ୍କି ପୁରୁଷ ୫୭ କେ.ଜି. ବର୍ଗରେ ବ୍ରୋଞ୍ଜ ପଦକ ଜିତିଛନ୍ତି। ଏହି ଇଭେଣ୍ଟରେ ଭାରତ ସମେତ ବେଲଜିୟମ, କ୍ରୋଏସିଆ, ଫ୍ରାନ୍ସ, ମୋଲଡୋଭା, ନେଦରଲାଣ୍ଡ୍ସ, ପୋଲାଣ୍ଡ ଓ ୟୁକ୍ରେନ୍ର ବକ୍ସରମାନେ ଅଂଶଗ୍ରହଣ କରିଛନ୍ତି।
