ଭଞ୍ଜନଗର,୨୮।୩(ଡି.ଏନ.ଏ): କରୋନା ଭୂତାଣୁ ସଂକ୍ରମଣ ରୋକିବାକୁ ଦେଶରେ ଲକ୍ଡାଉନ୍ ଘୋଷଣା କରାଯାଇଛି। ଏପରି ସ୍ଥିତିରେ ଭଞ୍ଜନଗର ଅଞ୍ଚଳର ଶତାଧିକ ଦାଦନ ଶ୍ରମିକ ଅନ୍ୟ ରାଜ୍ୟରେ ଫସି ରହିଛନ୍ତି। ଓଡ଼ିଆମାନେ ଯେଭଳି ସୁରକ୍ଷିତ ରହିବେ ସେ ନେଇ ମୁଖ୍ୟମନ୍ତ୍ରୀ ଅନ୍ୟ ରାଜ୍ୟର ମୁଖ୍ୟମନ୍ତ୍ରୀମାନଙ୍କ ସମେତ ପ୍ରବାସୀ ଓଡ଼ିଆଙ୍କ ସହାୟତା ମାଗିଛନ୍ତି। ସୁରଟରେ ଫସି ରହିଥିବା ଶତାଧିକ ଓଡ଼ିଆ ବହୁ ଅସୁବିଧାରେ ଅଛନ୍ତି। ଶନିବାର ସନ୍ଧ୍ୟାରେ ଶତାଧିକ ଯୁବକ ସେଠାରୁ ଓଡ଼ିଶାକୁ ଚାଲିଚାଲି ଫେରିବା ପାଇଁ ଯୋଜନା କରୁଥିଲେ। ସେଠାକାର ପ୍ରବାସୀ ଓଡ଼ିଆ ସମାଜ ସଙ୍ଗଠନ ପକ୍ଷରୁ ଏସମ୍ପଅକ୍ତ ଯୁବକମାନଙ୍କୁ ଏପରି ନ କରିବାକୁ ପରାମର୍ଶ ଦିଆଯାଇଛି । ପ୍ରବାସୀ ଓଡ଼ିଆ ସଙ୍ଗଠନ ସହାୟତାରେ ସେଠାରେ ସେମାନଙ୍କ ରହିବା ବ୍ୟବସ୍ଥା କରାଯାଉଛି । କେତେକ ସ୍ଥାନରେ ରନ୍ଧାଖାଦ୍ୟ ମଧ୍ୟ ବଣ୍ଟନ କରାଯାଉଛି । ପ୍ରବାସୀ ଓଡ଼ିଆ ସମାଜର ସଭାପତି ପ୍ରଦୀପ ସାହୁ, ଶିବରାମ ନାୟକ, ପ୍ରଶାନ୍ତ ଆରୁଖ, ଜୟରାମ ଦଳେଇ, ସନ୍ତୋଷ କୁମାର ଦଳବେହେରା, ଟୁଲୁ ପାତ୍ର, ରୁନୁ ପ୍ରଧାନ ପ୍ରମୁଖ ଉକ୍ତ କାର୍ଯ୍ୟକ୍ରମ ତଦାରଖ କରୁଛନ୍ତି। ଅନ୍ୟପକ୍ଷରେ ଉତ୍ତରପ୍ରଦେଶରୁ ୧୫ଜଣ ଭଞ୍ଜନଗର ବ୍ଲକ ମୁଜାଗଡ଼ର ନିଧିଆପଲ୍ଲୀ ଆସି କୁରାଢ଼ି କାତି ବିକ୍ରି କରୁଥିଲେ। ସେମାନେ ଦୁର୍ଦ୍ଦିନରେ ଥିବା ବେଳେ ପଞ୍ଚାୟତ ପକ୍ଷରୁ ସହାୟତା ଯୋଗାଇ ଦେବାକୁ ନିବେଦନ କରିଛନ୍ତି । କେତେକ ସ୍ଥାନରେ ଲୋକେ ଚାଲି ଚଳାଇ ନିଜ ଭିଟାମାଟିକୁ ଫେରୁଥିବା ଦେଖାଯାଉଛି। କନ୍ଧମାଳ ଜିଲାର କିଛି ଲୋକ ଭୁବନେଶ୍ୱରରୁ ଆସି ଶନିବାର ଭଞ୍ଜନଗରରେ ପହଞ୍ଚିଛନ୍ତି । ଚାଲି ଚାଲି ରବିବାର ସେମାନେ ଗ୍ରାମରେ ପହଞ୍ଚିବେ ।
