ବାଲିଆ,୩୧।୭: ଫନୀ ବାତ୍ୟା ହେବାର ଇତିମଧ୍ୟରେ ୩ ମାସ ବିତିଲାଣି, ଅଥଚ ଏ ପର୍ଯ୍ୟନ୍ତ ବିପନ୍ନଙ୍କ ଦୁର୍ଦ୍ଦଶା ଦୂର ହୋଇନାହିଁ। ଅଦ୍ୟାବଧି ଜଣେ ହେଲେ ବାତ୍ୟା ବିପନ୍ନ ଘରଭଙ୍ଗା ସହାୟତା ପାଇନାହାନ୍ତି। ଫଳରେ ବାଧ୍ୟହୋଇ ସେମାନେ ପରଘରେ ମୁଣ୍ଡ ଗୁଞ୍ଜିଛନ୍ତି। ବିରିଡ଼ି ବ୍ଲକ ଅଢଙ୍ଗଗଡ଼ ପଞ୍ଚାୟତରେ ଏଭଳି ଦୃଶ୍ୟ ଦେଖିବାକୁ ମିଳିଛି। ଏହି ପଞ୍ଚାୟତ ୪ ନଂ. ଓ୍ବାର୍ଡର ସୀତାରୀ ବେଗମ। ସ୍ବାମୀ ଓ ୩ ପିଲାଙ୍କୁ ନେଇ ତାଙ୍କ ପରିବାର। ଏକ ମାଟି କାନ୍ତ ଓ ଚାଳ ଛପର ଘରେ ସେ ରହୁଥିଲେ। ମେ ୩ ଫନୀ ବାତ୍ୟାରେ ତାଙ୍କ ଘର ସମ୍ପୂର୍ଣ୍ଣ ଭାଙ୍ଗି ମାଟିରେ ମିଶିଯାଇଥିଲା। ସେହିଦିନଠାରୁ ସିତାରୀଙ୍କ ପରିବାର ଗ୍ରାମର ଜଣଙ୍କ ଘରେ ରହି ଆସୁଛନ୍ତି। ବାତ୍ୟା ପରେ ତାଙ୍କୁ କେବଳ ୨୫ କେଜି ଚାଉଳ ଓ ୫୦୦ ଟଙ୍କା ମିଳିଥିଲା। ଘରଭଙ୍ଗା ତଦନ୍ତ କରାଯାଇଥିଲେ ମଧ୍ୟ ଏପର୍ଯ୍ୟନ୍ତ ସରକାରୀ ସହାୟତା ମିଳିନାହିଁ। ତାଙ୍କ ସ୍ବାମୀ ଜଣେ ଦିନ ମଜୁରିଆ। ପ୍ରତିଦିନ ଯାହା ମଜୁରି ପାଆନ୍ତି ସେଥିରେ ୫ ପ୍ରାଣୀ ଚଳିବା କଷ୍ଟକର ହୋଇଥାଏ। ପାଖରେ ସମ୍ବଳ ନ ଥିବାରୁ ବାତ୍ୟା ସମୟରେ ମାଟିରେ ଲୋଟିପଡିଥିବା ଘର ସଜାଡି ପାରୁନାହାନ୍ତି। ମୁଣ୍ଡ ଗୁଞ୍ଜିବାକୁ ଚାଳିଆ ଖଣ୍ଡେ କରିପାରୁ ନ ଥିବାରୁ ସେ ସରକାରୀ ସହାୟତାକୁ ଚାହିଁ ରହିଛନ୍ତି।
