ଜାମଟିକ୍ରା, ୨୬।୮ (ଡି.ଏନ୍.ଏ): ବରଗଡ଼ ଜିଲା କୁରୁଆଁ ପଁଚେତ୍ ବାଉଁସେନପାଲି ଗାଁର ଅଭିମନ୍ୟୁ ମିର୍ଦ୍ଧାକଁର ପୁଓ ଆଦିତ୍ୟ ମିର୍ଦ୍ଧା(୨୬)। ୨୦୧୭ରେ ତାକର ଡେବ୍ରି ଗୋଡ଼ରେ କର୍କଟ ରୋଗ୍ ହେଇଥିବାର ଜନାପଡ଼ିଥିଲା। ଡାକ୍ତର ଆଦିତ୍ୟର ଜୀବନ୍ ବଁଚାବାକେ ଯାଇ ତାକର ଗୋଡ଼୍ କାଟ୍ଲେ। ସେଦିନ୍ଠାନୁ ସେ ଭିନ୍ନକ୍ଷମ ପାଲଟିଯାଇଛନ୍। ହେଲେ କାହାରି ଉପରେ ବୋଝ୍ ହେବାର ବଦଲା ସେ ନିଜେ କମେଇ ଖାଏବାର ମଜବୁତ୍ ମନବଲ ରଖିଛନ୍। ହେଲେ ତାହାକୁ ଭାଏଗ୍ ସାଥ୍ ନାଇଁ ଦେବାର।
ସୂଚନା ଅନ୍ସାରେ ବାଉଁସେନପାଲିର ଅଭିମନ୍ୟୁ ମିର୍ଦ୍ଧାକଁର ପରିବାର କହେଲେ ମାଏକିନା.ଉର୍ବଶୀ, ଦୁଇ ପୁଓ ଆଦିଦ୍ୟ ଆର ଆଶିଷ। ଆଦିତ୍ୟ ବଡ଼ ହେଇଥିଲାବେଲେ ତାକର ସାନ ଭାଇ ଆଶିଷ ଏହେଦେ ଯୁକ୍ତ ତିନ୍ରେ ପାଠ୍ ପଢ଼ୁଛନ୍। ପରିବାରଟା ନିହାତି ଗରିବ୍ ହେଇଥିଲାବେଲେ ଅଭିମନ୍ୟୁ ଗୁଟେ ମିଲ୍ରେ ଶ୍ରମିକ୍ ହିସାବେ କାମ୍ କରୁଛନ୍। ସେନ୍ତା ଆଦିତ୍ୟ ଟ୍ରାକ୍ଟର ଆର ଧାନ କଟା ମେଶିନ ଚଲେଇ ଦୁଇ ପଏସା କମଉଥିଲେ। ହେଲେ ୨୦୧୭ ସାଲେ କେହେନ୍ସି କାରନ୍ରୁ ଆଦିତ୍ୟକଁର ଡେବ୍ରି ଗୋଡ଼ରେ ବହୁତ୍ ଦରଦ୍ ହେଲା। ଘରର ଲୋକ୍ ଆସର ପାସର ଡାକ୍ତରଖାନାରେ ଦେଖେଇ ଉଷୋକଷା କଲେ, ହେଲେ କିଛି ଲାଭ ନାଇଁହେଲା। ପରିବାର ଲୋକ୍ ତାହାକୁ ୨୦୧୭ ସେପ୍ଟେମ୍ବରରେ ବୁର୍ଲା ଡାକ୍ତରଖାନାରେ ଦେଖାଲେ। ସେଠାନେ ପରୀକ୍ଷା ନିରୀକ୍ଷାରୁ ଜନାପଡ଼ଲା ଯେ ଆଦିତ୍ୟକଁର ଗୁଡ଼େ କ୍ୟାନସର ହେଇଛେ। ଇ କଥା ଶୁନି ମା’ବାପ୍ ମୁଡ଼େ ଚଡକ୍ ପଡ଼ିଥିଲା। ଶେଷେ ପରିବାର ଲୋକ୍ ଧାରଉଧାର କରି ଆଦିତ୍ୟକେ ଚିକିଛା ଲାଗି ଭୁବନେଶ୍ୱରର ଗୁଟେ ଘରୋଇ ଡାକ୍ତରଖାନାରେ ଭରତି କଲେ। ହେଲେ ସେଠାନେ ଆଦିତ୍ୟକଁର ଜୀବନ୍ ବଁଚାବାର ଲାଗି ଡାକ୍ତର ଜୁଲାଇ ୧୨, ୨୦୧୮ରେ ତାକର ଗୋଡ଼୍ ଜଂଘ୍ଠାନୁ ଅପରେଶନ କରି କାଟିଦେଲେ। ଏହେଦେ ସେ ଆଶାବାଡ଼ି ଧରି ଚାଲବୁଲ କରୁଛନ୍, ଭିନ୍ନକ୍ଷମ ଭତା ବାବ୍ଦେ ୫ଶହ ଟଁକା ପାଉଛନ୍। ଏତେ ହେଲା ଉତାରୁ ବି ଆଦିତ୍ୟ ତାକର ମନ୍ବଲ ନାଇଁ ହରେଇ। ଏଭେ ବି ସେ କମେଇ ଖାଏବାର ମଜବୁତ୍ ମନ୍ବଲ ରଖିଛନ୍। ଏହେଦେ ସେ ଭିନ୍ନକ୍ଷମ ହେବାର ଲାଗି ତାହାକୁ ଗାଡ଼ିଚଲା ଲାଇସେନ୍ସ ନାଇଁ ମିଲିପାରବାର। ଯଦି ମୋତେ ଲାଇସେନ୍ସ ମିଲିପାରତା ତ ମୁଇଁ ଗାଡ଼ି ଚଲେଇ ଫେନ୍ ଦୁଇ ପଏସା କମେଇ ପାରତି ବଲି କହିଛନ୍। ଇଥିରଲାଗି ସେ ଗୁଟେ ପ୍ଲାଷ୍ଟିକ୍ ଗୋଡ଼୍ ଲଗାବାକେ ଚାହୁଁଛନ୍। ହେଲେ ଟଁକା ପଏସାର ବଡ଼ଭାରି ଅଭାବ ଲାଗି ସେ ପ୍ଲାଷ୍ଟିକ୍ ଗୋଡ଼୍ ଖଁଜି ନାଇଁପାରବାର। ଯଦି କେହେନ୍ସି ସରକାରୀ, ବେସରକାରୀ ସଂସ୍ଥା କି ସହୁରୁଦ୍ ଲୋକ୍ ସାହାଯ୍ର ହାତ୍ ବଢ଼ାଲେ ମୁଇଁ ଆଘର ଲେଖେଁ ଚାଲବୁଲ କରିପାରବାର ସଂଗେ କମେଇ ଖାଇପାରତି ବଲି ସେ କହିଛନ୍।
