ଅନୁଗୋଳ ଅଫିସ, ୧୦।୫ – ଗ୍ରୀନ୍ ଜୋନ୍ରେ ଥିବା ଅନୁଗୋଳ ଜିଲାରେ କଟକଣାକୁ କୋହଳ କରାଯାଇଛି। ଦୋକାନ ବଜାର ଖୋଲିଥିବାରୁ ଗ୍ରାମାଞ୍ଚଳରୁ ଲୋକେ ବଜାରକୁ ଆସି ବିଭିନ୍ନ ସାମଗ୍ରୀ କିଣି ନେଉଛନ୍ତି। ଏଥିପାଇଁ ଭିଡ଼ ବଢ଼ୁଥିବା ବେଳେ ଅନୁଗୋଳ ପୋଲିସ ନିୟମ ପାଳନ ଆଳରେ ବ୍ୟବସାୟୀଙ୍କ ସହ ପାତରଅନ୍ତର କରୁଥିବା ଅଭିଯୋଗ ହେଉଛି।
କେତେଜଣ ବ୍ୟବସାୟୀଙ୍କ କହିବା ଅନୁଯାୟୀ, ଅନୁଗୋଳ ସହରର ବହୁ ଦୋକାନୀ କଟକଣା ନ ମାନି ବ୍ୟବସାୟ କରୁଛନ୍ତି। ଏକାଧିକ ଲୋକଙ୍କୁ ଦୋକାନରେ ପାଖାପାଖି ବସାଇ କିଏ ବେପାର କରୁଛନ୍ତି ତ ଆଉ କିଏ ମାସ୍କ ପିନ୍ଧି ନ ଥିବା ଗ୍ରାହକଙ୍କୁ ସାମାଜିକ ଦୂରତ୍ୱ ରଖିବାକୁ ନ କହି ସାମଗ୍ରୀ ପ୍ରଦାନ କରୁଛନ୍ତି। ଅନୁଗୋଳ ପୋଲିସ ସମ୍ମୁଖରେ ଏପରି ଘଟଣା ଘଟୁଥିଲେ ବି ଅନେକ ସମୟରେ ସେପରି ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ ନାହିଁ। ମାତ୍ର ହାତଗଣତି କେତୋଟି ଦୋକାନ ସିଲ୍ କରାଯାଇଛି। କଟକଣା ଉଲ୍ଲଂଘନ କରୁଥିବା ବଡ଼ ବ୍ୟବସାୟୀଙ୍କୁ ପୋଲିସ ତାଗିଦ୍ କରି ଛାଡ଼ିଦେଉଥିବା ଦେଖାଯାଉଛି। ହେଲେ ଛୋଟ ଛୋଟ ବ୍ୟବସାୟୀଙ୍କ ଉପରେ ପୋଲିସ ଅଧିକ କାର୍ଯ୍ୟାନୁଷ୍ଠାନ ନେଉଛି। ଶନିବାର ସହରର କଲେଜ ଛକରେ ଥିବା ଜଣେ ବ୍ୟବସାୟୀ ବାହାରେ କିଛି ଚଟପଟା ଖାଦ୍ୟ ସାମଗ୍ରୀ ରଖିଥିବାବେଳେ ତାଙ୍କ ଦୋକାନକୁ ସିଲ୍ କରାଯାଇଥିଲା। ତାଙ୍କ ନାମରେ ମାମଲା ରୁଜୁ କରାଯାଇଥିଲା। ଆଉ ଭୁଲ ହେବ ନାହିଁ ବୋଲି ବ୍ୟବସାୟୀ ଜଣକ ପୋଲିସକୁ ବିଶ୍ୱାସ ଦେଇଥିଲେ ମଧ୍ୟ ପୋଲିସ ଦୋକାନ ବନ୍ଦ କରି ଚାବି ନେଇ ପଳାଇ ଯାଇଥିଲା। ଛୋଟ ଦୋକାନୀଙ୍କ କ୍ଷେତ୍ରରେ ଏପରି କାର୍ଯ୍ୟାନୁଷ୍ଠନ ନେଉଥିବା ପୋଲିସ ସହରର ବଡ଼ ବଡ଼ ବ୍ୟବସାୟୀଙ୍କ କ୍ଷେତ୍ରରେ କାହିଁକି କୋହଳ ହେଉଛି ବୋଲି ସମ୍ପୃକ୍ତ ଦୋକାନୀମାନେ ପ୍ରଶ୍ନ କରିଛନ୍ତି। ଅପରପକ୍ଷରେ କଟକଣା ମାନୁ ନ ଥିବା ୫ଟି ଦୋକାନକୁ ଶନିବାର ଅନୁଗୋଳ ପୋଲିସ ସିଲ୍ କରିବା ସହ ବାଇକ୍ରେ ବୁଲୁଥିବା କେତେଜଣ ଅମାନିଆଙ୍କୁ ଥାନାକୁ ଉଠାଇ ନେଇଥିବା ଥାନା ଅଧିକାରୀ ରମେଶ ଚନ୍ଦ୍ର ବିଶୋଇ ସୂଚନା ଦେଇଛନ୍ତି।
