ଝୁମ୍ପୁରା, ୨୦।୪(ଡି.ଏନ.ଏ.): ଝୁମ୍ପୁରା ବଜାର ତଥା ବ୍ଲକ କାର୍ଯ୍ୟାଳୟ, ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର, ତହସିଲ ଆଦିକୁ ଯାତାୟାତ ପାଇଁ ଥିବା ୨ ମୁଖ୍ୟ ରାସ୍ତା ଉପରେ କାନପୁର କେନାଲର ପୋଲ ନିର୍ମାଣାଧୀନ ରହିଛି। ଝୁମ୍ପୁରା-ଉଖୁଣ୍ଡା ରାସ୍ତାର ଅଗ୍ନିଶମ ସେବାକେନ୍ଦ୍ର ପାଖରେ ଏବଂ ଝୁମ୍ପୁରା-କେନ୍ଦୁଝର ରାସ୍ତାର ଝୁମ୍ପୁରା ବଡବନ୍ଧ ପାର୍ଶ୍ୱରେ ପୋଲ ନିର୍ମାଣାଧୀନ ରହିଛି। ୨ ପୋଲ ପୂର୍ତ ବିଭାଗ ଦ୍ୱାରା ଟେଣ୍ଡର ପ୍ରକ୍ରିୟାରେ ୫ କୋଟି ଟଙ୍କାରୁ ଊର୍ଦ୍ଧ୍ୱ ବ୍ୟୟ ଅଟକଳ କରାଯାଇ ନିର୍ମାଣାଧୀନ ରହିଛି। ପୋଲ ନିର୍ମାଣ କାମ କଚ୍ଛପ ଗତିରେ ଚାଲିଛି। ଡାଇଭରସନ ରାସ୍ତାରେ ଗାଡି, ବାଇକ୍, ପଥଚାରୀ ଯାତାୟାତ କରୁଛି। ବାଇପାସ ରାସ୍ତା ଦ୍ୱୟ ଉଚ୍ଚା ଏବଂ ଲମ୍ବ ରହିଛି। କେବଳ ମାଟି ଢଳାଯାଇ ରାସ୍ତା ନିର୍ମାଣ ହୋଇଛି। ବିପଦଶଙ୍କୁଳ ହୋଇ ପଡିଛି। ଡାଇଭର୍ସନ ରାସ୍ତା ଉପରେ ମେଟାଲ, ବାଲି, ଚିପସ୍ ପକାଇବା ନିୟମ ରହିଥିଲେ ହେଁ ଆଦୌ ପକାଯାଇ ନାହିଁ। ଡାଇଭର୍ସନ ମାଟି ରାସ୍ତା ଉପରେ ଗାଡି ଚଳାଚଳ ସମୟରେ ୨ପାର୍ଶ୍ୱ ମାଟି ଦବି ଯାଉଛି।
ପ୍ରବଳ ଧୂଳି ଉଡୁଥିବାରୁ ଯାତାୟାତରେ ଲୋକେ ହଇରାଣ ହେଉଛନ୍ତି। ବର୍ଷା ହେଲେ ରାସ୍ତା କାଦୁଅ ପଚପଚ ହେଉଛି। ବାଇକ୍ ଆରୋହୀ, ସାଧାରଣ ପଥଚାରୀଙ୍କ ଯାତାୟାତ ଏକଦମ ଠପ ହୋଇଯାଉଛି। ଝୁମ୍ପୁରା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର, ବଜାର, ସରକାରୀ କାର୍ଯ୍ୟାଳୟଗୁଡିକୁ ଆସୁଥିବା ଲୋକେ ଦୁର୍ଦ୍ଦଶା ଭୋଗୁଛନ୍ତି। ଅନ୍ୟ ପକ୍ଷରେ ପୋଲ ନିର୍ମାଣ କାମ ମଧ୍ୟ କଚ୍ଛପ ଗତିରେ ଚାଲିଛି। ସାଧାରଣରେ ଅସନ୍ତୋଷ ପ୍ରକାଶ ପାଇଛି। ପୋଲ ନିର୍ମାଣ କାମ ବିଳମ୍ବ ହେଉଛି। ନିର୍ମାଣରେ ଅନିୟମିତତା ହୋଇଥିବା ଅଭିଯୋଗ ହେଉଛି। ଏ ନେଇ ଗ୍ରାମବାସୀ ପୂର୍ତ୍ତ ବିଭାଗର ଦୃଷ୍ଟି ଆକର୍ଷଣ କରିଛନ୍ତି। କେନ୍ଦୁଝରସ୍ଥିତ ପୂର୍ତ୍ତ ବିଭାଗ ନିର୍ବାହୀ ଯନ୍ତ୍ରୀ ପ୍ରମୋଦ ରଥଙ୍କୁ ପଚାରିବାରୁ କାର୍ଯ୍ୟର ତଦାରଖ କରାଯିବ ବୋଲି ସେ କହିଛନ୍ତି।
