ପୁରୀ ଅଫିସ,୧୯ା୫: ବାତ୍ୟା ‘ଅମ୍ଫନ’ ପ୍ରଭାବରେ ପୁରୀରେ ହାଲ୍କା ବର୍ଷା, ପବନ ଆରମ୍ଭ ହୋଇଛି । ମଙ୍ଗଳବାର ସକାଳୁ ଆକାଶ ମେଘାଛନ୍ନ ରହିଥିବା ବେଳେ ୯ଟା ବେଳକୁ ଝିପିଝିପି ବର୍ଷା ହୋଇଥିଲା। କିଛି ସମୟପରେ ବର୍ଷା ବନ୍ଦ ହୋଇଯାଇଥିଲା। ପୂନର୍ବାର ମଧ୍ୟାହ୍ନ ପ୍ରାୟ ୧୨ଟାରେ ହାଲ୍କା ବର୍ଷା, ପବନ ଆରମ୍ଭ ହୋଇଥିଲା । କିନ୍ତୁ ଅଳ୍ପ କିଛି ସମୟ ପରେ ବର୍ଷା ଓ ପବନ ବନ୍ଦ ହୋଇଯାଇଥିଲା । ଅନ୍ୟପଟେ ଦେଖିଲେ ଅମ୍ଫନ ପ୍ରଭାବରେ ସମୁଦ୍ର ଅଶାନ୍ତ ରହିଛି । ବଡ଼ ବଡ଼ ଜୁଆର ଆସି କୂଳରେ ମାଡ଼ ହେଉଛି । ସେହିପରି ବର୍ଷା, ପବନ ଏତେଟା ନ ଥିବାରୁ ସକାଳୁ ରଥଖଳାରେ କାମ ଚାଲିଛି । ବର୍ଷା ସମୟରେ କିଛି ସମୟ କାମ ବନ୍ଦ ରହିଥିବା ବେଳେ ପୁଣି ସ୍ବାଭାବିକ ହୋଇଛି । ତେବେ ସମ୍ଭାବ୍ୟ ସ୍ଥିତିର ମୁକାବିଲା ଲାଗି ଜିଲା ପ୍ରଶାସନ ମଧ୍ୟ ପ୍ରସ୍ତୁତ ଥିବା ଜଣାପଡିଛି ।
