ପୁରୀ ଅଫିସ, ୫ା୯: ଶ୍ରୀମନ୍ଦିର ଚତୁଃପାର୍ଶ୍ୱରୁ ୭୫ ମିଟର ପର୍ଯ୍ୟନ୍ତ ନିର୍ମାଣ ଉଚ୍ଛେଦ ଲାଗି ରାଜ୍ୟ ସରକାରଙ୍କ ନିଷ୍ପତ୍ତି ପରେ ଅଶାନ୍ତ ହୋଇପଡ଼ିଛି ଶ୍ରୀକ୍ଷେତ୍ର। ପ୍ରଶାସନର ଉଚ୍ଛେଦ ଅଭିଯାନକୁ ବିରୋଧ କରି ମେଳି ବାନ୍ଧୁଛନ୍ତି ମଠ ମହନ୍ତ, ଦୋକାନୀ ଏବଂ କ୍ଷତିଗ୍ରସ୍ତ। ପ୍ରାଥମିକ ପର୍ଯ୍ୟାୟରେ ୭୫ ମିଟର ପରିଧି ମଧ୍ୟରେ ଥିବା ମଠ ଉଚ୍ଛେଦ କରାଯାଉଛି। ବର୍ତ୍ତମାନ ସୁଦ୍ଧା ଲଙ୍ଗୁଳି ମଠ ଏବଂ ଏମାର ମଠ ଭଙ୍ଗାଯାଇଥିବା ବେଳେ ଏବେ ବଡ଼ ଆଖଡ଼ା ଉଚ୍ଛେଦକୁ ନେଇ ପ୍ରତିବାଦ ତୀବ୍ର ହୋଇଛି। ଆଗକୁ ଘର, ବ୍ୟବସାୟିକ ପ୍ରତିଷ୍ଠାନ ଏବଂ ଅନ୍ୟାନ୍ୟ ମଠ, ମନ୍ଦିର ଭଙ୍ଗାଯିବା ନେଇ ସର୍ଭେ ଚାଲିଛି। ଏହି ଉଚ୍ଛେଦକୁ ବିରୋଧ କରିଛି ପୁରୀ ସୁରକ୍ଷା ମଞ୍ଚ। ବୁଧବାର ସୁରକ୍ଷା ମଞ୍ଚର ୧୫ଜଣିଆ ପ୍ରତିନିଧି ଦଳ ଏବଂ ପ୍ରଶାସନ ମଧ୍ୟରେ ଆଲୋଚନା ହୋଇଥିଲା। ତେବେ ଏହି ଆଲୋଚନା ବିଫଳ ହୋଇଛି। ଉଚ୍ଛେଦ ବନ୍ଦ କରିବା ଲାଗି ସୁରକ୍ଷା ମଞ୍ଚର ଦାବିକୁ ଜିଲାପାଳ ବଲୱନ୍ତ ସିଂ ପ୍ରତ୍ୟାଖ୍ୟାନ କରିଛନ୍ତି। ଫଳରେ ଆଗକୁ ଏହି ଅସନ୍ତୋଷ ଅଡୁଆ ପରିସ୍ଥିତି ସୃଷ୍ଟି କରିପାରେ ବୋଲି କୁହାଯାଉଛି। ତେବେ ପୁରୀ ସହରବାସୀଙ୍କ ସ୍ବାର୍ଥ, ଐତିହ୍ୟ ଓ ପରମ୍ପରାର ସୁରକ୍ଷା ପାଇଁ ମଞ୍ଚ କର୍ମକର୍ତ୍ତା ମୁଖ୍ୟମନ୍ତ୍ରୀଙ୍କୁ ଭେଟିବା ଲାଗି ନିଷ୍ପତ୍ତି ନେଇଛନ୍ତି । ଏପରି କି ଆବଶ୍ୟକ ପଡ଼ିଲେ ସେମାନେ ବୁଲ୍ଡୋଜର ଆଗରେ ଧାରଣା ଦେବେ ବୋଲି କହିଛନ୍ତି।
ଉଚ୍ଛେଦ ନିଷ୍ପତ୍ତି ବିରୋଧରେ ବିଧାୟକ ଜୟନ୍ତ କୁମାର ଷଡ଼ଙ୍ଗୀଙ୍କ ନେତୃତ୍ୱରେ ଏକ ୧୫ଜଣିଆ ପ୍ରତିନିଧି ଦଳ ବୁଧବାର ପୂର୍ବାହ୍ନରେ ଜିଲାପାଳଙ୍କୁ ଭେଟି ଆଲୋଚନା କରିଥିଲେ। ବର୍ତ୍ତମାନର ଉଚ୍ଛେଦ ପ୍ରକ୍ରିୟା ବନ୍ଦ କରିବା ଲାଗି ସେମାନେ ପ୍ରଥମ ଦାବି ରଖିଥିଲେ। ଏଥିସହ ଆଗ ଥଇଥାନ ପରେ ଉଚ୍ଛେଦ ଭଳି ଏକାଧିକ ଦାବି ଉପସ୍ଥାପନ କରିଥିଲେ। କେତେକ ସଦସ୍ୟ କହିଥିଲେ ପୁରୀର ଅଧିକାଂଶ ପରିବାରର ଜମିପଟ୍ଟା ତାଙ୍କ ନାମରେ ନାହିଁ। ସେମାନେ ମଠ ମହନ୍ତଙ୍କଠାରୁ ଦଲିଲ କରି ଜାଗା କିଣି ଘର କରିଥିଲେ। ପରବର୍ତ୍ତୀ ସମୟରେ ସୁପ୍ରିମ୍କୋର୍ଟ ମଠ ସମ୍ପତ୍ତି ମହାପ୍ରଭୁ ଶ୍ରୀଜଗନ୍ନାଥଙ୍କର ବୋଲି ରାୟ ଦେବା ପରେ ସମ୍ପୃକ୍ତ ବ୍ୟକ୍ତିମାନେ ଏ ପର୍ଯ୍ୟନ୍ତ ଜମିପଟ୍ଟା ପାଇପାରିନାହାନ୍ତି। ଯେଉଁଥିପାଇଁ ପୁରୀ ସହରରେ ଭୂ ସମ୍ପତ୍ତି ସୁରକ୍ଷା ପରିଷଦ ଏବଂ ସଦରରେ ଆଞ୍ଚଳିକ ଭୂ ସମ୍ପତ୍ତି ସୁରକ୍ଷା ପରିଷଦ ଆନ୍ଦୋଳନ ଚଳାଇଛି। ତେଣୁ ୭୫ ମିଟର ମଧ୍ୟରେ ଏମିତି ପରିବାର ଥିଲେ କ୍ଷତିପୂରଣ ଟଙ୍କା କିଏ ପାଇବ ବୋଲି ପ୍ରଶ୍ନ କରିଥିଲେ। ଅନ୍ୟ ଜଣେ ସଦସ୍ୟ କହିଥିଲେ, ନବକଳେବର ସମୟରେ ଶ୍ରୀମନ୍ଦିର କାର୍ଯ୍ୟାଳୟକୁ ଲାଗି ଥିବା ମୋର ଘର ଭାଙ୍ଗିଦିଆଗଲା। ସେତେବେଳେ ପ୍ରଶାସନ ଥଇଥାନ କରିବା ପାଇଁ ପ୍ରତିଶ୍ରୁତି ଦେଇଥିଲା। ମାତ୍ର ଏ ପର୍ଯ୍ୟନ୍ତ ମୋତେ ଥଇଥାନ କରାଗଲାନାହିଁ। ବର୍ତ୍ତମାନ କିପରି ପ୍ରଶାସନକୁ ଆଉ ଭରସା କରିବୁ ବୋଲି ସେ ଜିଲାପାଳଙ୍କୁ ପ୍ରଶ୍ନ କରିଥିଲେ। ସେହିପରି ଘୋଷଣା ହୋଇଥିବା ପ୍ୟାକେଜକୁ ନେଇ କେତେଜଣ ଅଭିଯୋଗ ଉଠାଇଥିଲେ। ଜିଲାପାଳ ସମସ୍ତଙ୍କ କଥା ଶୁଣିଥିଲେ ମଧ୍ୟ ଉଚ୍ଛେଦ ବନ୍ଦ ଦାବିକୁ ଅଗ୍ରାହ୍ୟ କରିଦେଇଥିଲେ। ବିଧାୟକ ଷଡ଼ଙ୍ଗୀ କହିଛନ୍ତି, ଜିଲାପାଳ ପର୍ଯ୍ୟାୟକ୍ରମେ କ୍ଷତିଗ୍ରସ୍ତ ଜନସାଧାରଣ, ମଠ ମହନ୍ତ, ବ୍ୟବସାୟୀ ସମସ୍ତଙ୍କ ଅଭିଯୋଗ ଶୁଣିବେ। ସମସ୍ତଙ୍କୁ ସୁହାଇଲା ଭଳି ଯାହା ପଦକ୍ଷେପ ନେବେ। ମଞ୍ଚ ଆବାହକ ଦାମୋଦର ପ୍ରଧାନୀ କହିଛନ୍ତି, ଆମେ ପ୍ରଥମେ ଉଚ୍ଛେଦ ବନ୍ଦ ପାଇଁ ଦାବି କରିଥିଲୁ। କିନ୍ତୁ ଜିଲାପାଳ ଏହାକୁ ଅଗ୍ରାହ୍ୟ କରି
ଉଚ୍ଛେଦ…
ଦେଇଛନ୍ତି। କେବଳ ମଠର ବିଜେସ୍ଥଳୀ ଓ ଗାଦିଘରକୁ ବାଦ୍ ଦେଇ ମଠର ବ୍ୟବସାୟିକ କୋଠାକୁ ଭଙ୍ଗାଯିବ। ଏଥିରେ ଆମେ ସନ୍ତୁଷ୍ଟ ହୋଇନାହୁଁ। ୨୦୧୫ରେ ଉଚ୍ଛେଦ ସମୟରେ ଯେଉଁମାନଙ୍କର ଜାଗା ଯାଇଥିଲା ସେମାନେ ଏ ପର୍ଯ୍ୟନ୍ତ ଜାଗା ପାଇନାହାନ୍ତି। ତେଣୁ ପୁନର୍ବାର ବୈଠକ କରି ଦରକାର ପଡ଼ିିଲେ ମୁଖ୍ୟମନ୍ତ୍ରୀଙ୍କୁ ଭେଟିବୁ। ଯଦି ପ୍ରଶାସନ ଉଚ୍ଛେଦ ଜାରି ରଖେ ତେବେ ବୁଲ୍ଡୋଜର ଆଗରେ ଶାନ୍ତିପୂର୍ଣ୍ଣ ଭାବେ ଧାରଣା ଦେବୁ।
ଅନ୍ୟପକ୍ଷରେ ଜିଲାପାଳ ବଲୱନ୍ତ ସିଂ କହିଛନ୍ତି, ଆଲୋଚନା ବେଳେ ୭୫ ମିଟର ଭିତରେ କ’ଣ କ’ଣ କରାଯିବ ତା’ର ବ୍ଲୁ ପ୍ରିଣ୍ଟ ସମ୍ପର୍କରେ ଏବଂ ଜମି ଅଧିଗ୍ରହଣ ପ୍ରକ୍ରିୟା କିପରି ରହିଛି ତାହା ପ୍ରତିନିଧି ଦଳ ବୁଝିଥିଲେ। ୨୦୧୫ରେ ଅନେକ ଲୋକଙ୍କ ଜମି ସରକାର ନେଇଥିଲେ ମଧ୍ୟ ଏ ପର୍ଯ୍ୟନ୍ତ ସେମାନେ ଟଙ୍କା ପାଇ ନ ଥିବା କେତେକ ଲୋକ ଅଭିଯୋଗ କରିଥିଲେ। ତେବେ ବର୍ତ୍ତମାନ ଯେଉଁ ଉଚ୍ଛେଦ ଚାଲିଛି ତାହାକୁ ବନ୍ଦ କରିବା ଲାଗି ସେମାନେ କହିଥିଲେ। କିନ୍ତୁ ଏହା ସମ୍ଭବ ନୁହେଁ, ଶ୍ରୀମନ୍ଦିର ସୁରକ୍ଷା ପାଇଁ ଏହା କରାଯାଉଛି। ୭୫ ମିଟର ପରିଧି ମଧ୍ୟରେ ଯେତେ ମଠ ଆସିବ ସେ ସବୁର ବିଜେସ୍ଥଳୀ, ଗାଦିଘରକୁ ସଂରକ୍ଷଣ, ସୌନ୍ଦର୍ଯ୍ୟକରଣ କରାଯିବ। କିନ୍ତୁ ମଠରେ ବ୍ୟବସାୟିକ ଉଦ୍ଦେଶ୍ୟରେ ଥିବା ନିର୍ମାଣ ଭଙ୍ଗାଯିବ। ବର୍ତ୍ତମାନ ଅସୁରକ୍ଷିତ କୋଠା ଭଙ୍ଗାଯାଉଛି, ଭବିଷ୍ୟତରେ ଅନ୍ୟଗୁଡ଼ିକ ଭଙ୍ଗାଯିବ। ୭୫ ମିଟର ମଧ୍ୟରେ ଅସୁରକ୍ଷିତ ନିର୍ମାଣ ଉଚ୍ଛେଦ ପ୍ରକ୍ରିୟା ଜାରି ରହିବ।
