ଆନନ୍ଦପୁର,୩୦। ୯(ସ୍ବ.ପ୍ର.)- କେନ୍ଦୁଝର ଜିଲା ଆନନ୍ଦପୁର ବୈତରଣୀ ନଦୀ ସେତୁର ଗୋଟିଏ ପିଲର ଯୋଡେଇ ସ୍ଥାନ ପୁନର୍ବାର ଦବିଯିବା ପରିଲକ୍ଷିତ ହୋଇଛି। ପିଲର ଉପରେ ଥିବା ୨ଟି ସ୍ପାନ୍ର ଜଏଣ୍ଟ ସ୍ଥାନ ଏବେ ପ୍ରାୟ ୨ ଇଞ୍ଚ ଉପର ତଳ ହୋଇ ରହିଛି। ରବିବାର ସ୍ଥାନୀୟ ଲୋକେ ଏହା ଦେଖିବା ପରେ ପୋଲର ସ୍ଥାୟିତ୍ୱ ନେଇ ଆଶଙ୍କା ବ୍ୟକ୍ତ କରିଛନ୍ତି।
୨୦ ନମ୍ବର ଜାତୀୟ ରାଜପଥ ଏବଂ ୫୩ ନଂ. ରାଜ୍ୟପଥକୁ ସଂଯୋଗ କରୁଥିବା ଏହି ସେତୁ ୧୯୮୬ ମସିହାରେ ନିର୍ମିତ ହୋଇଥିଲା। କେନ୍ଦୁଝର ଓ ଭଦ୍ରକ ଜିଲାକୁ ଗମନାଗମନ କ୍ଷେତ୍ରରେ ଏହି ସେତୁ ସଂଯୋଗ କରଥିବାରୁ ଏହାର ଯଥେଷ୍ଟ ଗୁରୁତ୍ୱ ରହିଛି। ୨୦୧୮ ଜୁଲାଇ ମାସରେ ସେତୁର ଏହି ପିଲରରୁ ପ୍ରଥମେ ଏକ ବେରିଂ ଖସିପଡିଥିଲା । ସେତୁ ମଝିଭାଗରେ ଥିବା ପିଲରର ଏଭଳି ସ୍ଥିତି ପୋଲର ସ୍ଥାୟିତ୍ୱ ନେଇ ଆଶଙ୍କା ସୃଷ୍ଟି କରିଥିଲା। ବେରିଂ ଖସିଥିବା ସ୍ଥାନରେ ବିଭାଗ ତରଫରୁ କାଠ ଗୋଲା ଢିରା ଦିଆଯାଇ ସାମୟିକ ଭାବେ ଏହାକୁ ମରାମତି କରାଯାଇଥିଲା। ପରେ ଚଳିତବର୍ଷ ଗତ ଜୁନ୍ ୧୨ ତାରିଖରୁ ୧୬ ତାରିଖ ପର୍ଯ୍ୟନ୍ତ ସେତୁ ଉପରେ ସମସ୍ତ ଯାନ ଚଳାଚଳ ବନ୍ଦ ରଖାଯାଇ ଏହାର ମରାମତି କରାଯାଇଥିଲା। ମରାମତି ପରେ ସେତୁ ଉପରେ ଜଏଣ୍ଟ ସ୍ଥାନଗୁଡିକ ଠିକ ହୋଇଥିଲା। ଏବେ ସାଢେ ୩ ମାସ ପରେ ପୁନଶ୍ଚ ସେହି ପିଲର ଯୋଡେଇ ସ୍ଥାନ ଦବିଯିବା ନାନା ଆଶଙ୍କା ସୃଷ୍ଟିର କାରଣ ହୋଇଛି। ଘଟଣା ସମ୍ପର୍କରେ ସ୍ଥାନୀୟ ପୂତ୍ତର୍ର୍ ବିଭାଗ ସହକାରୀ ଅଧିକାରୀ ସମୀର କୁମାର ଅଧିକାରୀଙ୍କୁ ପଚାରିବାରୁ ସେ ଏ ନେଇ ଅବଗତ ଥିବା କହିବା ସହିତ ଖୁବ ଶୀଘ୍ର ଏକ ଟେକ୍ନିକାଲ ଟିମର ସହାୟତା ନିଆଯାଇ ମରାମତି କାମ କରାଯିବ ବୋଲି କହିଛନ୍ତି।
