ଖୋର୍ଦ୍ଧା ଅଫିସ,୨୭ା୪ : ଲକ୍ଡାଉନ ଖଟକଣାକୁ ଫୁ କରି ବେଆଇନ ଭାବେ ପାହାଡରେ ପଥର ବ୍ଲାଷ୍ଟିଂ ସାଙ୍ଗକୁ କ୍ରଶର ୟୁନିଟ ଚାଲିଛି। ଅନ୍ୟପକ୍ଷେ ପଥର ମାଫିଆମାନେ ପାହାଡରୁ ଦିନରାତି ବ୍ଲାଷ୍ଟିଂ କରି ଚାଲିଛନ୍ତି। ଖୋର୍ଦ୍ଧା ଜିଲା ବେଗୁନିଆ ବ୍ଲକ ଅନ୍ତର୍ଗତ ଦେଉଳି ପଞ୍ଚାୟତରେ ଥିବା ପାହାଡରେ ପଥର ବ୍ଲାଷ୍ଟିଂ ଯୋଗୁ ଗାଁ ଥରି ଉଠିଥିଲା। କେତେଜଣ ଲୋକଙ୍କ ଘରର କାନ୍ଥ ଫାଟି ଯାଇଛି। ରବିବାର ରାତିରେ ଉତ୍ତେଜିତ ଗ୍ରାମବାସୀ ପାହାଡ ପାଖରେ ପହଞ୍ଚି ବ୍ଲାଷ୍ଟିଂକୁ ବନ୍ଦ କରିଥିଲେ। ସୋମବାର ପୁଣି ଅପରାହ୍ନରେ ପଥର ବ୍ଲାଷ୍ଟିଂକୁ ନେଇ ଗ୍ରାମରେ ଉତ୍ତେଜନା ପ୍ରକାଶ ପାଇଛି। ଗ୍ରାମବାସୀ ଏଡାକୁ ପୁଣି ବନ୍ଦ କରିଛନ୍ତି। ଏ ନେଇ ତହସିଲଦାର ବିବେକାନନ୍ଦ ପରିଡାଙ୍କୁ ପଚାରିବାରେ ଜାତୀୟ ରାଜପଥ ନିର୍ମାଣ କାର୍ଯ୍ୟ ଚାଲିଥିବା ଠିକାଦାରଙ୍କୁ ୩ ମାସ ପାଇଁ ପଥର ଖନନ ଲାଗି ଅନୁମତି ଦିଆଯାଇଥିଲା। ଏଥିମଧ୍ୟରେ ୨ ମାସ ବିତି ଯାଇଛି। ଏବେ ଲକ୍ଡାଉନ ଯୋଗୁ ଏହା ଉପରେ ରୋକ ଲଗାଯାଇଛି। ଯଦି ପାହାଡ ବ୍ଲାଷ୍ଟିଂ ନେଇ ସ୍ଥାନୀୟ ଲୋକଙ୍କ ଅଭିଯୋଗ ଆସେ ତେବେ ତାଙ୍କ ଲିଜ୍କୁ ରଦ୍ଦ ଲାଗି ଜିଲାପାଳଙ୍କ ସହ ଆଲୋଚନା କରାଯିବ ବୋଲି ସେ କହିଛନ୍ତି। ଅନ୍ୟପକ୍ଷେ ସ୍ଥାନୀୟ ସରପଞ୍ଚ ନିରୁପମା ସାମଲଙ୍କ ଅଗୋଚରରେ ପଥର ବ୍ଲାଷ୍ଟିଂକୁ କିପରି ଅନୁମତି ଦିଆଯାଇଛି ଏ ନେଇ ସେ ପ୍ରଶ୍ନ କରିଛନ୍ତି। ଦେଉଳି ପଞ୍ଚାୟତରେ ଏହି ପାହଡ ରହିଛି। ଏ ନେଇ ସେ ତହସିଲଦାରଙ୍କ ସହ ଆଲୋଚନା କରିବେ ବୋଲି କହିଛନ୍ତି। ପାହାଡ ଖନନ ପାଇଁ କେଉଁ ଆଧାରରେ ଲିଜ୍ ଦିଆଯାଇଛି। କେତେ ପରିମାଣର ପଥର ଖନନ କରାଯିବ ତାହାର ସୂଚନା ମଧ୍ୟ ସରପଞ୍ଚ ଜଣାଯାଇନାହିଁ। ସେନେଇ ସ୍ଥାନୀୟ ଗ୍ରାମବାସୀ ପ୍ରଶ୍ନ କରିଛନ୍ତି। ଏଥିରେ ମୋଟା ଅଙ୍କର ଟଙ୍କା କାରବାର ହୋଇଥିବା କେତେଜଣ ଗ୍ରାମବାସୀ ଅଭିଯୋଗ ବାଢିଛନ୍ତି।
