କରାଚି,୨୫।୪(ପି.ଟି.): ପାକିସ୍ତାନ ପୂର୍ବତନ ମହିଳା ଦଳ ଅଧିନାୟିକା ସାନା ମୀର ଅବସର ନେଇଛନ୍ତି। ଶନିବାର ସେ ଅନ୍ତର୍ଜାତୀୟ କ୍ରିକେଟରୁ ଅବସର ନେଇଛନ୍ତି ବୋଲି ଘୋଷଣା କରିଛନ୍ତି। ଫଳରେ ଦୀର୍ଘ ୧୫ ବର୍ଷର ସଫଳ କ୍ୟାରିୟରର ଅନ୍ତ ଘଟିଛି। କ୍ୟାରିୟରରେ ୩୪ ବର୍ଷୀୟ ସାନା ୨୨୬ଟି ଅନ୍ତର୍ଜାତୀୟ ମ୍ୟାଚ୍ ଖେଳିଛନ୍ତି। ଏଥିମଧ୍ୟରୁ ସେ ୧୩୭ଟି ମ୍ୟାଚ୍ର ନେତୃତ୍ୱ ନେଇଥିଲେ। ୨୦୦୯ରୁ ୨୦୧୭ ମଧ୍ୟରେ ସେ ପାକିସ୍ତାନ ମହିଳା ଦଳର ନେତୃତ୍ୱ ନେଇଥିଲେ। ଏବେ ଅବସର ନେବାର ପ୍ରକୃତ ସମୟ। କ୍ରିକେଟ ଓ ପାକିସ୍ତାନ ପାଇଁ ଶ୍ରେଷ୍ଠ ପ୍ରଦର୍ଶନ କରିବାକୁ ଚେଷ୍ଟା କରିଆସିଛି। ପାକିସ୍ତାନ ପାଇଁ ଖେଳିବା ଓ ନେତୃତ୍ୱ ନେବା ସମ୍ମାନର ବଷୟ ବୋଲି ସେ କହିଛନ୍ତି। ଏହି ଅବସରରେ ସେ ସପୋର୍ଟ ଷ୍ଟାଫ୍, ଖେଳାଳି, ଗ୍ରାଉଣ୍ଡ ଷ୍ଟାଫ୍ ଓ ସମସ୍ତଙ୍କୁ କୃତଜ୍ଞତା ଜଣାଇଛନ୍ତି। ମୋର ସଫଳ କ୍ୟାରିୟର ପଛରେ ଏମାନଙ୍କର ହାତ ରହିଛି ବୋଲି ସେ କହିଛନ୍ତି। ନିଜ ପରିବାର, ପ୍ରଶଂସକ, ମେଣ୍ଟର ଓ ଅନ୍ୟମାନଙ୍କୁ ମଧ୍ୟ ସେ ଧନ୍ୟବାଦ ଜଣାଇଛନ୍ତି।
ଜଣେ ଅଫ୍ ସ୍ପିନର ଭାବେ ସାନା ଦିନିକିଆରେ ୧୨୦ଟି ମ୍ୟାଚ୍ ଖେଳି ୨୪.୨୭ ହାରରେ ଦଳ ପାଇଁ ସର୍ବାଧିକ ୧୫୧ଟି ଉଇକେଟ ହାସଲ କରିଛନ୍ତି। ସେହିପରି ସେ ୧୦୬ଟି ଅନ୍ତର୍ଜାତୀୟ ଟି୨୦ ମ୍ୟାଚ୍ ଖେଳି ୮୯ ଉଇକେଟ ହାସଲ କରିଛନ୍ତି। ତେବେ ଅନ୍ୟତମ ପାକ୍ ମହିଳା ବୋଲର ୯୮ ଉଇକେଟ ନେଇ ଆଗରେ ରହିଛନ୍ତି। ସେ ମଧ୍ୟ ଦିନିକିଆରେ ପାକିସ୍ତାନର ତୃତୀୟ ସର୍ବାଧିକ ରନ୍ ସ୍କୋର ସାବ୍ୟସ୍ତ ହୋଇଛନ୍ତି। ସେ ଦିନିକିଆରେ ୧, ୬୩୦ ରନ ସଂଗ୍ରହ କରିଛନ୍ତି। ଦିନିକିଆରେ ୧୦୦୦ ରନ ସଂଗ୍ରହ କରିବା ସହ ୧୦୦ ଉଇକେଟ ନେଇ ସେ ଏକ ବିରଳ ସଫଳତା ଅର୍ଜନ କରିଛନ୍ତି। ସେ ଅନ୍ତର୍ଜାତୀୟ କ୍ରିକେଟ କାଉନ୍ସିଲ (ଆଇସିସି) ଓ ପାକିସ୍ତାନ କ୍ରିକେଟ ବୋର୍ଡ (ପିସିବି)କୁ ମଧ୍ୟ ଧନ୍ୟବାଦ ଜଣାଇଛନ୍ତି। ସଫଳ କ୍ୟାରିୟର ପାଇଁ ପିସିବି ମୁଖ୍ୟ କାର୍ଯ୍ୟ ନିର୍ବାହୀ ଓ୍ବାସିମ ଖାନ୍ ମଧ୍ୟ ସାନାଙ୍କୁ ଅଭିନନ୍ଦନ ଜଣାଇଛନ୍ତି।
