ଭବାନୀପାଟଣା, ୧୨ା୫ (ଡି.ଏନ୍.ଏ): ଭବାନୀପାଟଣା ସଦର ବ୍ଲକ ବୋର୍ଡା ମିଲକୀ ଅଂଚଲ ଏହେଦେ ମୁଡ଼ଫଟା ଖରାରେ ସିଝୁଛେ। ୪୬ ଡିଗ୍ରୀ ତାତି ସଂଗେ ଗୁଲଗୁଲିରେ ଲୋକ୍ ଡହକ୍ବିକଲ ହେଉଛନ୍। ଇ ସମିଆରେ ଅଂଚଲର ଗୁରୁଜୁଙ୍ଗ ପଁଚେତର ବାଲିପଦର ଗାଁବାସୀ ପିଇଲା ପାଏନ୍ ସମସିଆ ସଂଗେ ଯୁଝୁଛନ୍। ଗାଁବାସୀକର ପିଇବା ପାଏନ୍ ସୁବିଧା ଲାଗି ୪ଟା ନଲ୍ଚୁଆଁ ରହିଛେ। ହେଲେ ସେ ଭିତରୁ ୨ଟା ନଲ୍ଚୁଆଁରୁ ବୁଁଦେ ପାଏନ୍ ନାଇଁ ବାରବାର। ଗାଁରେ ଥିବାର ଗୁଟେ ବଲି ବଁଧ୍ ଖରାରେ ଶୁଖା ପଡ଼ିଛେ। ଲୋକ୍, ଗାଈଗୋରୁ, ଚରେ ଚିରଗୁନ ପାଏନ୍ ଲାଗି ଡହକ୍ବିକଲ ହେଉଛନ୍। ଗାଁରେ ଯେନ୍ ୨ଟା ନଲ୍ଚୁଅଁା ଚଲୁଛେ ଲୋକ୍ ସେ ପାଏନ୍କେ ଭାଗବଁଟା କରି ଚଲୁଛନ୍। ଗଲା ପଁଚେତ୍ ନିରବାଚନ ଆର ସାଧାରନ ନିରବାଚନରେ ଗାଁକେ ଅନେକ ନେତା, ମନ୍ତ୍ରୀ ଆସି ଗାଁରେ ପିଇବାର ପାଏନ୍ର ସୁବିଧା କରବାକେ ପରତିଶୁରତି ଦେଇ ଯାଇଥିଲେ। ହେଲେ ଭୋଟ ବେଲେ ନେତା, ମନ୍ତ୍ରୀ ଗାଁବାସୀକୁ ଭକୁଆ ଥାବ୍ କରୁଛନ୍, ଭୋଟ ସଏଲେ କାହାରି ଦେଖାଦରଶନ ନାଇଁମିଲବାର ବଲି ଗାଁର ରାଧା ବେହେରା, ଗନ୍ଧର୍ବୀ ମାଝୀ, ସେବତୀ ମାଝୀ, ନେତ୍ରୀ ପୟାସିଂ, ଚଞ୍ଚଳା ମହାନନ୍ଦ, ଝରଣା ବେହେରା, ଡିଲେଶ୍ୱରୀ ବେହେରା, ପାଟ ବେହେରା ପରମୁଖ ଅଭିଯୋଗ କରିଛନ୍। ଯେତେ ଜଲଦି ହେବା ପରଶାସନ ଗାଁକେ ପାଇପ୍ ପାଏନ୍ ଯୁଗେଇ ଦେବାର ବେବସ୍ତା କରବାକେ ସେମାନେ ଦାବି କରିଛନ୍। ସେନ୍ତା ବୋର୍ଡା ପଁଚେତ ଗୋଈକେଲା, ନୂଆପଡ଼ାରେ ବଡ଼ଭାରି ପିଇଲା ପାଏନ୍ ସମସିଆ ଦେଖାଦେଇଛେ। ଗୁରୁଜୁଙ୍ଗ ପଁଚେତର ଗୁରୁଜୁଙଙ୍ଗ, କର୍ଲାପିଟା, ଡୁମୁରିଆ ପଁଚେତର ପୁରୁଣାପଡ଼ା, ମିଡ଼ିଗୁଡ଼ା, ଚିକିଲି, ଲୋହରାଡ଼ାବ୍ରୀ ଗାଁରେ ବି ପିଇଲା ପାଏନ୍ ସମସିଆ ସଂଗେ ଲୋକ ଯୁଝୁଛନ୍। ସୂଚନା ଅନ୍ସାରେ, ଅଂଚଲର ୧୧ଟା ପଁଚେତ୍ର ୧୮୬ଟା ନଲ୍ଚୁଆଁ ଅଚଲ ହେଇ ପଡ଼ିରହିଛେ। ସେନ୍ତା ୫୮ଟା ନଲ୍ଚୁଆଁରୁ ଫ୍ଲୋରାଇଡ ମିଶା ପାଏନ୍ ବାହାରବାର ଲାଗି ଲୋକ୍ ସେ ପାଏନ୍ ବେଭାର ନାଇଁକରବାର। ଇ ସମିଆରେ ଅଚଲ ନଲ୍ଚୁଆଁମାନକୁ ଯେତେ ଜଲଦି ହେବା ସଚଲ କରବାର ସଂଗେ ଭିନେ ଭିନେ ପଁଚେତ୍ର ଗାଁମାନକୁ ପିଇଲା ପାଏନ୍ର ବେବସ୍ତା କରବାକେ ଜନ ସାଧାରନରେ ଦାବି ହେଉଛେ।
