ଭୁବନେଶ୍ୱର,୨୫।୩(ବ୍ୟୁରୋ): ବୁଧବାର ଅପରାହ୍ନ ୩ଟା ସୁଦ୍ଧା ବିଶ୍ୱରେ ୪ଲକ୍ଷ ୨୨ହଜାର ୮୨୯ଜଣ କରୋନାରେ ଆକ୍ରାନ୍ତ ହୋଇଛନ୍ତି। ମଙ୍ଗଳବାର ଏହି ସଂଖ୍ୟା ୩ ଲକ୍ଷ ୮୨ ହଜାର ୮ ଥିଲା। ସେହିଭଳି ମଙ୍ଗଳବାର ୧୬,୫୫୮ଜଣଙ୍କ ମୃତ୍ୟୁ ଘଟିଥିବା ବେଳେ ବୁଧବାର ୧୮,୯୦୭ଜଣଙ୍କ ମୃତ୍ୟୁ ଘଟିଛି। ସମଗ୍ର ବିଶ୍ୱରେ ୨ ଲକ୍ଷ ୯୪ହଜାର ୮୨୦ ଆକ୍ଟିଭ କେସ୍(ଚିକିତ୍ସାଧିନ) ରହିଛି। ସେମାନଙ୍କ ମଧ୍ୟରୁ ୧ଲକ୍ଷ ୯ହଜାର ୧୦୨ଜଣ ସୁସ୍ଥ ହୋଇ ଫେରିଛନ୍ତି। ତେବେ ସୁସ୍ଥ ହୋଇ ଫେରିବା ତୁଳନାରେ ଆକ୍ରାନ୍ତରେ ୩ ଗୁଣ। ଭାରତରେ ମଙ୍ଗଳବାର ୫୧୧ ଆକ୍ରାନ୍ତ ଥିବା ବେଳେ ବୁଧବାର ଏହା ୫୬୨ ହୋଇଛି। ସେଥିରୁ ୧୧ ଜଣଙ୍କ ମୃତ୍ୟୁ ଘଟିଛି। ରାଜ୍ୟରେ ଚିହ୍ନଟ ହୋଇଥିବା ୨ ରୋଗୀଙ୍କ ସ୍ବାସ୍ଥ୍ୟବସ୍ଥା ଠିକ୍ ରହିଛି ବୋଲି ବୁଧବାର ଗୀତଗୋବିନ୍ଦ ସଦନରେ ଆୟୋଜିତ ଖବରଦାତା ସମ୍ମିଳନୀରେ ରାଜ୍ୟ ସରକାରଙ୍କ କରୋନା ଭୂତାଣୁ ସଂକ୍ରମଣ ସଚେତନତା କମିଟି ମୁଖ୍ୟ ପ୍ରବକ୍ତା ସୁବ୍ରତୋ ବାଗ୍ଚୀ ସୂଚନା ଦେଇ କହିଛନ୍ତି।
ଏହାଛଡ଼ା ବାଗ୍ଚୀ କହିଛନ୍ତି, ସରକାର ଦେଇଥିବା ନଂ ଯୋଗେ ୪୦୧୫ଜଣ ରେଜିଷ୍ଟ୍ରେଶନ କରିଛନ୍ତି। ଇତିମଧ୍ୟରେ ମୋଟ ୧୩୩ଜଣଙ୍କ ନମୂନା ପରୀକ୍ଷଣ ପାଇଁ ପଠାଯାଇଛି। ୧୨୯ଙ୍କ ମିଳିଥିବା ବେଳେ ୪ଜଣଙ୍କ ରିପୋର୍ଟକୁ ଅପେକ୍ଷା ରହିଛି। ୩୬ଜଣ ଆଇସୋଲେଶନରେ ଅଛନ୍ତି। ଆକ୍ରାନ୍ତଙ୍କ ସଂସ୍ପର୍ଶରେ ଆସିଥିବା ୫୭ଜଣ କ୍ୱାରେଣ୍ଟାଇନ୍ରେ ରହିଛନ୍ତି। ସେହିଭଳି ବାକି ୩ଜଣଙ୍କୁ ଯୋଗାଯୋଗ କରାଯାଇ ପାରି ନ ଥିବା ସେ କହିଛନ୍ତି।
