ଓ୍ବେଲିଂଟନ,୧୭।୭(ପି.ଟି.)- ଆଇସିସି ବିଶ୍ୱକପ୍ରେ ରନର୍ସଅପ୍ ବିବେଚିତ ହୋଇଥିବା ନ୍ୟୁଜିଲାଣ୍ଡ ଦଳର ପ୍ରତ୍ୟାବର୍ତ୍ତନ ସମାରୋହକୁ ଘୁଞ୍ଚାଇ ଦିଆଯାଇଛି। ଦଳର ସଦସ୍ୟମାନେ ଅଲଗା ଅଲଗା ସ୍ବଦେଶ ପ୍ରତ୍ୟାବର୍ତ୍ତନ କରିଥିବାରୁ ବର୍ତ୍ତମାନ ଏହି ସମାରୋହ ଆୟୋଜନକୁ ଘୁଞ୍ଚାଇ ଦିଆଯାଇଛି ବୋଲି ନ୍ୟୁଜିଲାଣ୍ଡ କ୍ରିକେଟ ତରଫରୁ କୁହାଯାଇଛି। ଫାଇନାଲରେ ସମାନ ସ୍କୋର ଯୋଗୁ ମ୍ୟାଚ ଟାଇ ହୋଇଥିଲା। ଫଳରେ ସୁପର ଓଭରର ସହାୟତା ନିଆଯାଇଥିଲା। ଏଥିରେ ମଧ୍ୟ ସମାନ ସ୍କୋର କରି ନ୍ୟୁଜିଲାଣ୍ଡ ମ୍ୟାଚ୍ ଟାଇ ରଖିଥିଲା। ତେବେ ଅପେକ୍ଷାକୃତ ଅଧିକ ବାଉଣ୍ଡରି ମାରିଥିବାରୁ ଇଂଲଣ୍ଡ ବିଜୟୀ ଘୋଷିତ ହୋଇଥିଲା। ଫଳରେ ଇଂଲଣ୍ଡ ଚାମ୍ପିୟନ ହୋଇ ଇତିହାସ ସୃଷ୍ଟି କରିଥିଲା। ଫାଇନାଲ ମୁକାବିଲାରେ ଇଂଲଣ୍ଡ ୨୨ଟି ଚୌକା ଓ ଦୁଇ ଛକା ମାରିଥିଲା। ଅନ୍ୟପଟେ ନ୍ୟୁଜିଲାଣ୍ଡ ୧୭ଟି ବାଉଣ୍ଡରି ମାରିଥିଲା।
ସମାରୋହ ଆୟୋଜନ ସଂକ୍ରାନ୍ତରେ ଦେଶର କ୍ରୀଡ଼ାମନ୍ତ୍ରୀ ଗ୍ରାଣ୍ଟ ରବର୍ଟସନଙ୍କ ସହ ଆଲୋଚନା ଓ ପ୍ରଧାନମନ୍ତ୍ରୀ ଜାକିଣ୍ଡା ଆର୍ଡେରନଙ୍କୁ ମଧ୍ୟ ଏନେଇ ଅବଗତ କରିଛୁ ବୋଲି ନ୍ୟୁଜିଲାଣ୍ଡ କ୍ରିକେଟ ମୁଖ୍ୟ କାର୍ଯ୍ୟନିର୍ବାହୀ ଡେଭିଡ ହ୍ବାଇଟ୍ କହିଛନ୍ତି। ଖେଳାଳିମାନେ ଭିନ୍ନ ସମୟ ତଥା ବିମାନରେ ଘରକୁ ଫେରୁଛନ୍ତି। ଏପରିକି କେତେଜଣ କ୍ରିକେଟର ଏପର୍ଯ୍ୟନ୍ତ ଘରକୁ ଫେରିନାହାନ୍ତି। ଆଉ କେତେକେ ଅନ୍ୟାନ୍ୟ ଚୁକ୍ତି ଅନୁସାରେ ଖେଳିବାର କାର୍ଯ୍ୟକ୍ରମ ରଖିଛନ୍ତି। ତେଣୁ ଏପରିସ୍ଥଳେ ପ୍ରତ୍ୟାବର୍ତ୍ତନ ସମାରୋହ ଆୟୋଜନ କରିବା ସମ୍ଭବ ନୁହେଁ ବୋଲି ସେ କହିଛନ୍ତି। ସାରା ବିଶ୍ୱକପ୍ ଓ ଖାସ୍ କରି ଫାଇନାଲରେ ଜବରଦସ୍ତ ପ୍ରଦର୍ଶନ କରିଥିବା କାରଣରୁ ନ୍ୟୁଜିଲାଣ୍ଡ ଜନସାଧାରଣ ଏହି ସମାରୋହ ଆୟୋଜନ କରିବାକୁ ଉତ୍ସୁକ ରହିଛନ୍ତି। ଆମେ ମଧ୍ୟ ପ୍ରଶଂସକଙ୍କ ଇଚ୍ଛାକୁ ସମ୍ମାନ ଦେବାକୁ ଚାହୁଁଛୁ ବୋଲି ହ୍ବାଇଟ୍ କହିଛନ୍ତି।
