ବାରିପଦା ଅଫିସ, ୧୮ା୨- ଜିଲାର ବିଭିନ୍ନ ସ୍ଥାନରେ ନିଲାମ ନେଇଥିବା ବାଲିଘାଟ ବ୍ୟବସାୟୀମାନେ ସରକାରୀ ନିୟମକୁ ଉଂଲଘନ କରୁଛନ୍ତି। ବାଲି ଖୋଳିବା ପାଇଁ ସରକାରଙ୍କଠାରୁ ପାଇଥିବା ଚୁକ୍ତିଠାରୁ ଅଧିକ ମାତ୍ରାରେ ବାଲି ଉତ୍ତୋଳନ କରୁଛନ୍ତି। ଏ ନେଇ ତହସିଲ କର୍ମଚାରୀମାନେ କୌଣସି ପଦକ୍ଷେପ ନେଉ ନାହାନ୍ତି। ଯାହା ଦ୍ୱାରା ସରକାରଙ୍କ କୋଟି କୋଟି ଟଙ୍କା ରାଜସ୍ବ ହାନି ହେଉଛି । ଏହାର ସମାଧାନ ପାଇଁ ସୋମବାର ଭଞ୍ଜସେନା ଉପଜିଲାପାଳଙ୍କ ଦ୍ୱାରସ୍ଥ ହୋଇଛି। ଭଞ୍ଜସେନାର ଅଭିଯୋଗ ଅନୁଯାୟୀ, ନିଲାମ ହୋଇଥିବା ବାଲିଘାଟର ସମୟସୀମା, ସର୍ତ୍ତାବାଳୀ ସହିତ କେତେ ମାତ୍ରାରେ ବାଲି ଉତ୍ତୋଳନ କରିବା କଥା ସେଗୁଡ଼ିକର ସମ୍ପୂର୍ଣ୍ଣ ଯାଞ୍ଚ କରି ଗାଡ଼ିଗୁଡ଼ିକ ଚେକିଂ କରିବା ପାଇଁ ଭଞ୍ଜସେନା ଦାବି କରିଛି। ସେହିପରି ଭଞ୍ଜସେନା ଅଭିଯୋଗ କରିଛି ଯେ, ରାଜସ୍ବ ମନ୍ତ୍ରୀଙ୍କ ନିର୍ବାଚନମଣ୍ଡଳୀ ସମେତ ଜିଲାର ବଡ଼ସାହି ବ୍ଲକ ଡିଙ୍ଗରାଘାଟ, ଶ୍ୟାମାଖୁଣ୍ଟା ବ୍ଲକର ମହୁଲିଆ ଘାଟଗୁଡ଼ିକରେ ବ୍ୟାପକଭାବେ ବିନା ପରିମିଟରେ ବଡ଼ ବଡ଼ ଟ୍ରକରେ ବାଲି ଚାଲାଣ ହେଉଛି। କେତେକ ସ୍ଥାନରେ କେବଳ ଲୋକ ଦେଖାଣିଆ ଭାବେ ରାଜସ୍ବ ବିଭାଗର ଅଧିକାରୀମାନେ ଗରିବ ଟ୍ରାକ୍ଟର ବାଲାଙ୍କ ଠାରୁ ଚେକିଂ ନାମରେ ଜରିମାନା ଆଦାୟ କରୁଛନ୍ତି। ବଡ଼ ବଡ଼ ଟ୍ରକଗୁଡ଼ିକୁ ଛାଡ଼ି ଦେଉଛନ୍ତି। ଫଳରେ ସରକାରଙ୍କ ତହବିଲ୍କୁ କୋଟି କୋଟି ଟଙ୍କା ଯିବା ବଦଳରେ କିଛି ଅସାଧୁ କର୍ମଚାରୀ ଓ ବାଲି ନିଲମାଧାରୀ ମାଲିକମାନଙ୍କ ପକେଟକୁ ଏହା ଯାଉଛି। ଆଗାମୀ ୩ ଦିନ ମଧ୍ୟରେ ଏହାର ଉପଯୁକ୍ତ ତଦନ୍ତ କରି ସରକାରୀ ଚୁକ୍ତି ଉଲ୍ଲଂଘନ କରୁଥିବା ବାଲିଘାଟଗୁଡ଼ିକ ସିଲ କରିବାକୁ ଭଞ୍ଜସେନା ପକ୍ଷରୁ ଦାବି କରାଯାଇଛି। ଉପଖଣ୍ଡ ସଭାପତି ସାମନ୍ତ ଶେଖର ପାଲ, ସଭାପତି ପିଣ୍ଟୁ ମାଇତି, ଯୁବ ଛାତ୍ର ସଂଯୋଜକ ରାକେଶ ବେହେରା, ଉପାଧ୍ୟକ୍ଷ ଲାଲ ବାହାଦୂର ମହାନ୍ତି, ସୌମ୍ୟରଞ୍ଜନ ମିଶ୍ର, ଏସ୍ କେ ରାଜା ଖାନ୍, ଅମରେଶ ସିଂଙ୍କ ସମେତ ଭଞ୍ଜସେନାର ଏକାଧିକ କର୍ମକର୍ତ୍ତା ଉପଜିଲାପାଳଙ୍କୁ ଦାବିପତ୍ର ପ୍ରଦାନ ବେଳେ ଉପସ୍ଥିତ ଥିଲେ।
