ବାଲେଶ୍ୱର ଅଫିସ, ୧।୨-ବାଲେଶ୍ୱର ପୌରାଞ୍ଚଳରେ ସଫେଇ କାର୍ଯ୍ୟ ପାଇଁ ଫେବୃୟାରୀ ପହିଲାରୁ ନୂତନ ଠିକାଦାର ନିଯୁକ୍ତି ହୋଇଛନ୍ତି। ଦୀର୍ଘବର୍ଷ ଧରି ପୌର ପରିଷଦ ଓ ଠିକାଦାରମାନଙ୍କ ଅଧୀନରେ କାର୍ଯ୍ୟ କରିଆସୁଥିବା କେତେକ ସଫେଇ କର୍ମଚାରୀଙ୍କୁ ନିଯୁକ୍ତିରୁ ବାହାର କରିଦେବା ପାଇଁ ନୂତନ ଠିକାଦାର ନିଷ୍ପତ୍ତି ନେଇଥିଲେ। ଏହାର ପ୍ରତିବାଦରେ ଶନିବାର ଠିକା ସଫେଇ କର୍ମଚାରୀମାନେ କାମ ବନ୍ଦ କରି ପୌର କାର୍ଯ୍ୟାଳୟ ପରିସରରେ ଧାରଣାରେ ବସିଥିଲେ। ସଫେଇ କର୍ମଚାରୀଙ୍କ ଦ୍ୱାରା ଉତ୍ତେଜନା ସୃଷ୍ଟି ହେବାରୁ ମାଜିଷ୍ଟ୍ରେଟ ଦାୟିତ୍ୱରେ ସଦର ସହକାରୀ ତହସିଲଦାର ଶତ୍ରୁଘ୍ନ ସେଠୀ ଓ ଏକ ପ୍ଲାଟୁନ୍ ପୋଲିସ୍ ମୁତୟନ ହୋଇଥିଲେ।
କଟକର ଠିକା ସଂସ୍ଥା ମଞ୍ଜୁ ସିକ୍ୟୁରିଟି ସର୍ଭିସ୍ ଓ ସ୍ବର୍ଣ୍ଣଦେବୀ ଏଣ୍ଟରପ୍ରାଇଜେସ୍କୁ ପୌରାଞ୍ଚଳର ୩୧ଟି ୱାର୍ଡ଼କୁ ୫ଟି ଜୋନ୍ରେ ବିଭକ୍ତ କରି ସଫେଇ ଦାୟିତ୍ୱ ଦିଆଯାଇଛି। ସଫେଇ କର୍ମଚାରୀ ସଂଘର ସଭାପତି ଗୌରାଙ୍ଗ ପାଣିଗ୍ରାହୀ ଓ ଏଆଇଟିୟୁସି ଜିଲା ସଭାପତି ଭାଗବତ ପ୍ରତିହାରୀ, ସଂଘର କର୍ମକର୍ତ୍ତା ଓ ଠିକାଦାରଙ୍କ ପ୍ରତିନିଧି ସୌମ୍ୟରଞ୍ଜନ ଦାସ ଓ ଅନୀଲ୍ କୁମାର ମହାରଣା, ପୌର କାର୍ଯ୍ୟନିର୍ବାହୀ ଅଧିକାରୀ ଅମିତ ସରକାର ଏବଂ ଅତିରିକ୍ତ ଜିଲାପାଳ ସମ୍ବିତ କୁମାର ନାୟକ ଯୋଗଦେଇ ସମସ୍ୟାର ସମାଧାନ ସମ୍ପର୍କରେ ଆଲୋଚନା କରିଥିଲେ। ଆଲୋଚନାର ନିଷ୍ପତ୍ତି ଅନୁଯାୟୀ ପୂର୍ବରୁ କାର୍ଯ୍ୟ କରୁଥିବା ସମସ୍ତ ଠିକା ଶ୍ରମିକମାନଙ୍କୁ ନୂତନ ଠିକାଦାରମାନେ ନିଯୁକ୍ତି ଦେବେ। ଶ୍ରମିକମାନେ ସେମାନଙ୍କର ଆବଶ୍ୟକ କାଗଜପତ୍ର ତୁରନ୍ତ ଠିକାଦାରଙ୍କ ନିକଟରେ ଦାଖଲ କରିବେ ଓ ପୂର୍ବପରି କାର୍ଯ୍ୟ କରିବେ। ଅଧିକ ଶ୍ରମିକ ନିଯୁକ୍ତି ଆବଶ୍ୟକ ହେଲେ ଠିକାଦାରମାନେ ନୂତନ ନିଯୁକ୍ତି ଦେଇପାରିବେ। ଠିକାଦାରଙ୍କ ଦ୍ୱାରା ଶ୍ରମିକମାନଙ୍କୁ ପ୍ରଦାନ କରାଯାଉଥିବା ମଜୁରି ଓ ଭବିଷ୍ୟନିଧି ପାଣ୍ଠି ଆଇନ୍ଗତ ପ୍ରାପ୍ୟ ଶ୍ରମିକମାନେ ଠିକ୍ ଭାବେ ପାଉଛନ୍ତି କି ନାହିଁ ସେଥିପାଇଁ କାର୍ଯ୍ୟନିର୍ବାହୀ ଅଧିକାରୀ ଧ୍ୟାନ ଦେବାର ନିଷ୍ପତ୍ତି ହୋଇଥିଲା। ପରେ ସମସ୍ତ ସଫେଇ କର୍ମଚାରୀ କାର୍ଯ୍ୟରେ ଯୋଗଦେଇଥିଲେ। ସଫେଇ କର୍ମଚାରୀ ସଂଘର ସାଧାରଣ ସମ୍ପାଦକ ଭଗବାନ ବେହେରା, ମନୋଜ ବେହେରା, ରାଜେଶ ନାୟକ, ଭଗିରଥ ବେହେରା, ରାମ ବେହେରା ପ୍ରମୁଖ ଆଇନ୍ଗତ ପ୍ରାପ୍ୟ ପ୍ରଦାନ କଲେ ସଫେଇ କାର୍ଯ୍ୟରେ ସମସ୍ତ ପ୍ରକାର ସହଯୋଗ ପାଇଁ ଜିଲା ପ୍ରଶାସନ ଓ ପୌର କର୍ତ୍ତୃପକ୍ଷଙ୍କୁ ସେମାନେ ପ୍ରତିଶ୍ରୁତି ଦେଇଛନ୍ତି।
