ନୂଆଦିଲ୍ଲୀ,୩୦-୧୦: ମଙ୍ଗଳବାର ଶେୟାର ବଜାରରେ ଉତ୍ସାହ ପରିଲକ୍ଷିତ ହେବା ସହ ନିବେଶକଙ୍କ ସମ୍ପତ୍ତିରେ ୨.୭୩ ଲକ୍ଷ କୋଟି ବୃଦ୍ଧି ଘଟିଛି। ଏହି ସମୟରେ ବମ୍ବେ ଷ୍ଟକ ଏକ୍ସଚେଞ୍ଜର ସୂଚକାଙ୍କ ୫୮୧.୬୪ ପଏଣ୍ଟ ବଢିଥିବା ଜଣାପଡିଛି। କମ୍ପାନୀଗୁଡ଼ିକର ତ୍ରୈମାସିକ ଫଳାଫଳରେ ଉନ୍ନତି ଏବଂ ଆମେରିକା-ଚାଇନା ବାଣିଜ୍ୟ ଚୁକ୍ତି ନେଇ ରହିଥିବା ସମ୍ଭାବନା ନିବେଶକଙ୍କ ମନୋଭାବ ଉପରେ ଭଲ ପ୍ରଭାବ ପକାଇଛି। ମଙ୍ଗଳବାର ସେନସେକ୍ସ ୫୮୧.୬୪ ବଢି ୩୯,୮୩୧.୮୪ ପଏଣ୍ଟରେ କାରବାର ବନ୍ଦ ହୋଇଛି। ଦିନ ସମୟର କାରବାରରେ ସୂୂଚକାଙ୍କ ୬୬୬.୮୧ ପଏଣ୍ଟ ବଢି ୩୯,୯୧୭.୦୧ ପଏଣ୍ଟ ଛୁଇଁଥିବା ଷ୍ଟକ ବଜାର ସୂତ୍ରରୁ ସୂଚନା ରହିଛି। ଏହି ସମୟରେ ବିଏସ୍ଇ ସୂଚୀଭୁକ୍ତ କମ୍ପାନୀଗୁଡିକର ବଜାର ପୁଞ୍ଜିକରଣ ୨.୭୩ ଲକ୍ଷ କୋଟି ଟଙ୍କା ବଢି ୧,୫୨,୦୪,୬୯୩.୩୪ କୋଟି ଟଙ୍କା ଛୁଇଁଛି। ବଡ ବଡ କର୍ପୋରେଟଗୁଡିକ ଚଳିତ ବର୍ଷ ଦ୍ୱିତୀୟ ତ୍ରୈମାସରେ ଭଲ ଫଳାଫଳ ହାସଲ କରିଥିବା ବେଳେ ମିଡ ଏବଂ ସ୍ମଲ କ୍ୟାପ୍ରେ ଆକର୍ଷଣୀୟ ଭାଲ୍ୟୁଏଶନ ନିବେଶକଙ୍କ ସପକ୍ଷରେ ରହିଛି।
ବାଣିଜ୍ୟ ଚୁକ୍ତି ଦ୍ୱାରା ବିଶ୍ୱ ବଜାରକୁ ନେଇ ରହିଥିବା ଅନିଶ୍ଚିତତା ହ୍ରାସ ହେବାକୁ ଯାଉଥିବା ବେଳେ, ବ୍ରେକଜିଟ, ଆମେରିକା ଫେଡେରାଲ ରିଜର୍ଭର ସୁଧହାର ହ୍ରାସ ଆଶା ଭାରତ ଭଳି ଅଭିବୃଦ୍ଧିଶୀଳ ବଜାରଗୁଡିକ ଉପରେ ଭଲ ପ୍ରଭାବ ପକାଇଥିବା ଜିଓଜିତ ଫାଇନାସିଆଲ ସର୍ଭିସେସ ଲିମିଟେଡର ରିସର୍ଚ୍ଚ ମୁଖ୍ୟ ବିନୋଦ ନାୟାର କହିଛନ୍ତି। ସେହିଭଳି ରେଲିଗାରେ ବ୍ରୋକିଙ୍ଗ ଲିମିଟେଡର ରିସର୍ଚ୍ଚ ଉପସଭାପତି ଅଜିତ ମିଶ୍ର କହିଛନ୍ତି ଯେ, ଅଟୋଶିଳ୍ପରେ ଉନ୍ନତି ଏବଂ ଆମେରିକା ଫେଡେରାଲ ରିଜର୍ଭର ସୁଧହାର ହ୍ରାସ ଆଶା ବଜାର ଟ୍ରେଣ୍ଡ ଉପରେ ପ୍ରଭାବ ପକାଇଥିବା ସେ କହିଛନ୍ତି। ୩୦ ଶେୟାର ବିଶିଷ୍ଟ ସେନସେକ୍ସ ମଧ୍ୟରୁ ପ୍ରାୟ ୨୬ ଭଲ କାରବାର କରିବାକୁ ସକ୍ଷମ ହୋଇଥିଲା। ସେପ୍ଟେମ୍ବର ତ୍ରୈମାସରରେ ଟାଟା ମୋଟର୍ସ ଏହାର କ୍ଷତି କମାଇବାକୁ ସକ୍ଷମ ହେବାରୁ ଏହାର ଶେୟାର କାରବାର ୧୬.୬୩% ବଢି ଘଟିଛି। ବମ୍ବେ ଷ୍ଟକ ଏକ୍ସଚେଞ୍ଜରେ ୧୪୩୫ କମ୍ପାନୀର କାରବାର ଅତି ଭଲ ରହିଥିବା ବେଳେ ୧୦୨୯ର କାରବାର ହ୍ରାସ ଏବଂ ୨୧୩ର ସ୍ଥିତି ଅପରିବର୍ତ୍ତିତ ରହିଥିଲା।
