ନାଉଗାଁ ,୧୪।୧ (ସ୍ବ.ପ୍ର.):ନାଉଗାଁ ବ୍ଲକ ପରିସରରେ ସୋମବାର ଜିଲାପାଳଙ୍କ ଜନଶୁଣାଣି ଶିବିର ଅନୁଷ୍ଠିତ ହୋଇଥିଲା। ଶିବିରରେ ମୋଟ ୮୯ ଅଭିଯୋଗ ହୋଇଥିବା ବେଳେ ସେଥିରୁ ୮ଟିର ସଙ୍ଗେସଙ୍ଗେ ସମାଧାନ କରାଯାଇଥିଲା। ଅଭିଯୋଗଗୁଡ଼ିକ ମଧ୍ୟରେ ଆଧାର କେନ୍ଦ୍ର ବନ୍ଦ ଥିବାରୁ ଲୋକମାନେ ଅସୁବିଧାର ସମ୍ମୁଖୀନ ହେଉଥିବାରୁ ତୁରନ୍ତ ଏହାକୁ ଖୋଲିବା ପାଇଁ ପୂର୍ବତନ ପଞ୍ଚାୟତ ସମିତି ଉପାଧ୍ୟକ୍ଷ ବେଣୁଧର ସ୍ବାଇଁ ଅଭିଯୋଗ କରିଥିଲେ। ଉକ୍ତ ଅଭିଯୋଗ ଶୁଣିବା ପରେ ଜିଲାପାଳ ସଙ୍ଗେ ସଙ୍ଗେ ଉକ୍ତ ବିଭାଗ ସହ କଥା ହେବା ସହିତ ଯଥାଶୀଘ୍ର ଉକ୍ତ ବ୍ଳକରେ ଆଧାର କେନ୍ଦ୍ର ଖୋଲିବା ପାଇଁ ପଦକ୍ଷେପ ନିଆଯିବ ବୋଲି କହିଥିଲେ। ସେହିପରି ବ୍ଲକ ଛକଠାରେ ଥିବା ଲାଇସେନ୍ସ ପ୍ରାପ୍ତ ମଦ ଦୋକାନରେ ଅଧିକ ଦାମରେ ମଦ ବିକ୍ରି ହେଉଥିବା ନେଇ ଅଭିଯୋଗ କରିଥିଲେ। ନନ୍ଦିଗ୍ରାମରେ ସରକାରୀ ଯୋଜନା ବିଫଳ ପ୍ରସଙ୍ଗରେ ଦିଲ୍ଲୀପ୍ କୁମାର ପାଢୀ ଅଭିଯୋଗ କରିଥିଲେ। ନାଉଗଁା ସ୍ବାସ୍ଥ୍ୟକେନ୍ଦ୍ରରେ ନିର୍ମାଣାଧୀନ ପାଇଖାନା ନିମ୍ନମାନର ହେଉଥିବା ବେଳେ ତୁରନ୍ତ ଏହାର ତଦନ୍ତ କରିବା ପାଇଁ ପ୍ରଦୋଷ ମହାନ୍ତି ଅଭିଯୋଗ କରିଥିଲେ। ସେହିପରି ଅଲଣା ପଞ୍ଚାୟତର ବେଣାପଡ଼ା-ମୁଣ୍ଡାଳ ରାସ୍ତା ଦୀର୍ଘ ଦିନ ହେବ ଖାଲଖମାରେ ଭର୍ତ୍ତି ହୋଇଥିବା ବେଳେ ତୁରନ୍ତ ମରାମତି କରିବା ପାଇଁ ତ୍ରିନାଥ ମହାନ୍ତି, ଫକୀର ମୋହନ ମହାନ୍ତି ପ୍ରମୁଖ ଅଭିଯୋଗ କରିଥିଲେ। ଏହି ଅବସରରେ ଓଷକଣା ଗ୍ରାମର ଭିନ୍ନକ୍ଷମ ତପନ ବାରିକଙ୍କୁ ଜିଲାପାଳ ଟ୍ରାଇସାଇକେଲ ପ୍ରଦାନ କରିଥିଲେ। ଶିବିରରେ ୮ଟି ଅଭିଯୋଗର ତ୍ୱରିତ୍ ସମାଧାନ ହୋଇଥିବା ବେଳେ ଅନ୍ୟ ଗୁଡ଼ିକର ସମାଧାନ ପାଇଁ ସମ୍ପୃକ୍ତ ବିଭାଗୀୟ ଅଧିକାରୀଙ୍କୁ ଜିଲାପାଳ ନିର୍ଦ୍ଦେଶ ଦେଇଥିଲେ। ଅନ୍ୟମାନଙ୍କ ମଧ୍ୟରେ ଜିଲାପାଳ ସଂଗ୍ରାମ କେଶରୀ ମହାପାତ୍ର, ପ୍ରକଳ୍ପ ନିର୍ଦ୍ଦେଶକ ସରୋଜକାନ୍ତ ମହାନ୍ତି, ଉପ ଜିଲାପାଳ ମହେନ୍ଦ୍ର ପ୍ରସାଦ ମହାନ୍ତି, ଏସ୍ଡିପିଓ ବିଶ୍ୱନାଥ ମିଶ୍ର, ବିଡିଓ ରଶ୍ମିରେଖା ମଲିକ, ତହସିଲଦାର ଜେ.କଳ୍ପନା, ବ୍ଲକ ଅଧ୍ୟକ୍ଷ ଜଗନ୍ନାଥ ଦାସଙ୍କ ସମେତ ବିଭିନ୍ନ ବିଭାଗର ଅଧିକାରୀମାନେ ଉପସ୍ଥିତ ଥିଲେ।
