ନୂଆଦିଲ୍ଲୀ,୨।୫(ପି.ଟି.): ପୂର୍ବତନ ଅଧିନାୟକ ମହେନ୍ଦ୍ର ସିଂ ଧୋନୀ ମୋର ଗୁରୁ ଭଳି। ସବୁବେଳେ ସେ ସାହାଯ୍ୟ କରିବା ପାଇଁ ଉପସ୍ଥିତ ଥାଆନ୍ତି। ତେବେ ସେ କୌଣସି ସମସ୍ୟାର ସମ୍ପୂର୍ଣ୍ଣ ସମାଧାନ କରି ନ ଥାନ୍ତି। ଯାହା ଫଳରେ ଯୁବ ଖେଳାଳିମାନେ ତାଙ୍କ ଠାରୁ ସବୁବେଳେ ଉତ୍ତର ବା ସମାଧାନ ପାଇଁ ଚାହିଁ ବସିଥାନ୍ତି। ପଡିଆ ଭିତରେ ହେଉ କି ବାହାରେ ଧୋନୀ ମୋର ପରାମର୍ଶଦାତା ରହିଆସିଥାନ୍ତି। ଯେକୌଣସି ପ୍ରକାର ସମସ୍ୟା ପାଇଁ ତାଙ୍କଠାରୁ ପରାମର୍ଶ ଲୋଡିଥାଏ। ତେବେ ସେ ଏହାର ସମ୍ପୂର୍ଣ୍ଣ ସମାଧାନ ରାସ୍ତା ଦେଖାଇ ନ ଥାନ୍ତି ବୋଲି ପନ୍ତ ଇଣ୍ଡିଆନ ପ୍ରିମିୟର ଲିଗ (ଆଇପିଏଲ) ଟିମ୍ ଦିଲ୍ଲୀ କ୍ୟାପିଟାଲ୍ ସହ ଇନ୍ଷ୍ଟାଗ୍ରାମ ଲାଇଭ୍ ସେସନରେ ଭାଗ ନେଇ କହିଛନ୍ତି। ଫଳରେ ତାଙ୍କ ଉପରେ ସମ୍ପୂର୍ଣ୍ଣ ରୂପେ ନିର୍ଭରଶୀଳ ହୋଇ ନ ଥାଏ। କେବଳ ନିଜର ସମସ୍ୟାର ସମାଧାନ ପାଇଁ ଅବଶ୍ୟ ଏହା ପର୍ଯ୍ୟାପ୍ତ ହୋଇଥାଏ। ସେ ମଧ୍ୟ ମୋର ଫେଭରାଇଟ ବ୍ୟାଟିଂ ପାର୍ଟନର। ଯଦିଓ ଆମେ ଏକାଠି ବ୍ୟାଟିଂ କରିବାର ସୁଯୋଗ ସବୁବେଳେ ପାଇନାହୁଁ ବୋଲି ପନ୍ତ କହିଛନ୍ତି।
କ୍ରିଜ୍ରେ ଥିବା ବେଳେ ଧୋନୀଙ୍କର ନିର୍ଦ୍ଦିଷ୍ଟ ଯୋଜନା ଥାଏ ଓ ତାହାକୁ ଅନୁସରଣ କରିବା ସମସ୍ତଙ୍କର କାମ ହୋଇଥାଏ। ଗତ ଜୁଲାଇରେ ଅନୁଷ୍ଠିତ ବିଶ୍ୱକପ୍ରେ ନ୍ୟୁଜିଲାଣ୍ଡ ବିପକ୍ଷ ସେମିଫାଇନାଲ ମ୍ୟାଚ୍ ଖେଳିବା ପରେ ଧୋନୀ ଏପର୍ଯ୍ୟନ୍ତ କୌଣସି ଅନ୍ତର୍ଜାତୀୟ ମ୍ୟାଚ୍ ଖେଳିନାହାନ୍ତି। ତେବେ ଆଇପିଏଲ୍ ମାଧ୍ୟମରେ ପ୍ରତ୍ୟାବର୍ତ୍ତନ କରିବାକୁ ଲକ୍ଷ୍ୟ ରଖିଥିବା ଧୋନୀ ପୁଣି ନିରାଶ ହୋଇଛନ୍ତି। କୋଭିଡ-୧୯ ସଂକ୍ରମଣ କାରଣରୁ ଆଇପିଏଲ୍କୁ ଅନିର୍ଦ୍ଦିଷ୍ଟ କାଳ ପାଇ ଘୁଞ୍ଚାଇ ଦିଆଯାଇଛି।
ପୂର୍ବତନ ଅଧିନାୟକ ତଥା ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସଭାପତି ସୌରଭ ଗାଙ୍ଗୁଲିଙ୍କ ମଧ୍ୟ ପନ୍ତ ତାରିଫ କରିଛନ୍ତି। ଗାଙ୍ଗୁଲି ପୂର୍ବରୁ ଦିଲ୍ଲୀ କ୍ୟାପିଟାଲ୍ସର ମେଣ୍ଟର ଥିଲେ ଓ ବ୍ୟାଟିଂରେ ସୁଧାର ପାଇଁ ସେ ପନ୍ତଙ୍କୁ କେତୋଟି ଗୁରୁତ୍ୱପୂର୍ଣ୍ଣ ଟିପ୍ସ ଦେଇଥିଲେ। ଯାହା ଅବଶ୍ୟ କାମରେ ଆସିଥିଲା ବୋଲି ପନ୍ତ କହିଛନ୍ତି। ପ୍ରଥମେ କ୍ରିଜ୍ରେ କିଛି ସମୟ ବିତାଇବାକୁ ଓ ପରେ ଯାହା ଚାହିଁବ ତାହା କରିପାରିବ ବୋଲି ସେ ପରାମର୍ଶ ଦେଇଥିଲେ। ଆଇପିଏଲ ୨୦୧୮ ସଂସ୍କରଣ ମୋର ଭାଗ୍ୟ ବଦଳାଇ ଦେଇଥିଲା। ୧୪ଟି ମ୍ୟାଚ୍ରୁ ୫୨.୬୧ ରନ ହାରରେ ପନ୍ତ ୬୮୪ ରନ ସଂଗ୍ରହ କରିଥିଲେ। ଏଥିରେ ୬ଟି ଅର୍ଦ୍ଧଶତକ ସାମିଲ ରହିଥିଲା। ଏହି ସଂସ୍କରଣରେ ଦିଲ୍ଲୀ ତରଫରୁ ସେ ସର୍ବାଧିକ ରନ ସଂଗ୍ରହ କରି ନିଜ ଦକ୍ଷତାର ପ୍ରମାଣ ଦେବା ସହ ଚୟନକର୍ତ୍ତାଙ୍କୁ ପ୍ରଭାବିତ କରିଥିଲେ ଓ ତାଙ୍କୁ ଶେଷରେ ଭାରତୀୟ ଦଳରେ ସ୍ଥାନ ମିଳିଥିଲା।
