ଖୁଣ୍ଟା, ୫।୬(ଡି.ଏନ.ଏ.): ମୟୂରଭଞ୍ଜ ଜିଲା ଖୁଣ୍ଟା ବ୍ଲକ ଅଧୀନ ବାହାନଡ଼ା ଲ୍ୟାମ୍ପରେ ଚାଷୀଙ୍କ ଠାରୁ ଧାନ କିଣାରେ ଅନିୟମିତତା କରାଯାଇଥିବା ନେଇ ଚାଷୀମାନେ ଜିଲାପାଳଙ୍କ ଠାରେ ଅଭିଯୋଗ କରିଛନ୍ତି। ଏହାର ତଦନ୍ତ ସହ କାର୍ଯ୍ୟାନୁଷ୍ଠାନ ଗ୍ରହଣ କରା ନ ଗଲେ ଆନ୍ଦୋଳନ ହେବ ବୋଲି ସେମାନେ ଚେତାବନୀ ଦେଇଛନ୍ତି।
ଅଭିଯୋଗ ଅନୁଯାୟୀ, ବାହାନଡ଼ା ଲ୍ୟାମ୍ପରେ ଖରିଫ ଋତୁର ଧାନ କିଣା ପ୍ରକ୍ରିୟା ଜାରି ରହିଥିବା ବେଳେ ମାର୍ଚ୍ଚ ୧୧ ତାରିଖରେ ମଣ୍ଡିରେ ଧାନ ପକାଇବା ପାଇଁ ଚାଷୀଙ୍କ ମୋବାଇଲକୁ ସୂଚନା (ଟୋକନ) ମିଳିଥିଲା। ସେହି ଅନୁଯାଇ ଲ୍ୟାମ୍ପର ଏମ୍ଡି ମଧୁସ୍ମିତା ଦେ କେତେଜଣ ଚାଷୀଙ୍କୁ ସେହିଦିନ ଧାନ ପକାଇବା ପାଇଁ କହିଥିବା ବେଳେ ଅନ୍ୟ କେତେକ ଚାଷୀଙ୍କୁ ୧୭ ତାରିଖରେ ଧାନ ପକାଇବା କହିଥିଲେ। ୧୧ ଓ ୧୭ ତାରିଖରେ ୧୨ ଜଣ ଚାଷୀ ମୋଟ ୩୫୦ କୁଇଣ୍ଟାଲ ଧାନ ମଣ୍ଡିରେ ପକାଇଥିଲେ। ଏତଦ୍ ବ୍ୟତୀତ ୧୮ ତାରିଖରେ ମୋବାଇଲ ଯୋଗେ କେତେକ ଚାଷୀ ଟୋକନ ପାଇଥିବା ବେଳେ ଏମ୍ଡି ସେମାନଙ୍କୁ ଧାନ ପକାଇବା ପାଇଁ ମନା କରିବା ସହିତ ପୂର୍ବରୁ ଧାନ ପକାଇଥିବା ୧୨ ଜଣ ଚାଷୀଙ୍କଠାରୁ ଆଉ ଧାନ କିଣାଯିବ ନାହିଁ ବୋଲି କହିଥିଲେ। ଚାଷୀମାନେ ଏମ୍ଡିଙ୍କୁ ବାରମ୍ବାର ଅନୁରୋଧ କରିଥିବା ବେଳେ ସରକାର ଧାନ କିଣା ପ୍ରକ୍ରିୟା ବନ୍ଦ କରିଛନ୍ତି କହିବା ସହିତ ଯଦି ୧୪୩୦ ଟଙ୍କାରେ ଧାନ ବିକିବ ତେବେ ସେ ମିଲରଙ୍କୁ କହି ଧାନ ଗୁଡିକୁ ଉଠାଇ ନେବାର ବ୍ୟବସ୍ଥା କରିବେ ବୋଲି ଏମ୍ଡି କହିଥିବା ନେଇ ଉକ୍ତ ଅଭିଯୋଗରେ ଦର୍ଶାଯାଇଛି। ଏହି ଘଟଣାକୁ ନେଇ ଚାଷୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଥିବା ବେଳେ ଧାନ କିଣାରେ ୮ କେ.ଜିରୁ ୧୦ କେ.ଜି କଟିଂ କରିବା, ଧାନ ନ ପକାଇଥିବା ଚାଷୀମାନଙ୍କର ଆଖି ସ୍କାନ କରି ଧାନ ପକାଇଲେ ବୋଲି କାଗଜ ପତ୍ର କରିବା ଇତ୍ୟାଦି ଅନ୍ୟ କେତେକ ଅନିୟମିତତା ଦର୍ଶାଇ ଜିଲାପାଳଙ୍କ ଠାରେ ଅଭିଯୋଗ କରାଯାଇଛି। ଏ ସମ୍ପର୍କରେ ଏମ୍ଡି ମଧୁସ୍ମିତାଙ୍କୁ ପଚାରିବାରୁ ସରକାର ଖରିଫ ଧାନ କିଣା ବନ୍ଦ କରିଛନ୍ତି । ଯଦି ଧାନ କିଣା ପ୍ରକ୍ରିୟା ପୁନଃ କାର୍ଯ୍ୟକାରୀ ହୁଏ ତେବେ ଉକ୍ତ ଧାନ କିଣି ନେବାରେ କୌଣସି ଅସୁବିଧା ନାହିଁ ବୋଲି କହିଥିଲେ। ଅପରପକ୍ଷେ ଚଳିତ ଖରିଫ ଚାଷରେ ୩୨ ହଜାର କୁଇଣ୍ଟାଲ ଧାନ କିଣା ଯିବାର ଲକ୍ଷ୍ୟ ଧାର୍ଯ୍ୟ ଥିବାବେଳେ ସରକାରଙ୍କ ପକ୍ଷରୁ ୨୩ ହଜାର କୁଇଣ୍ଟାଲ ଧାନ କିଣିବା ପାଇଁ ଅର୍ଥ ଆସିଥିଲା। ସେହି ଅର୍ଥରେ ଧାନ କିଣା ଯାଇଥିବା ବେଳେ ଶେଷ ବେଳକୁ କରୋନା ପାଇଁ ଲକ୍ଡାଉନ ଯୋଗୁ ପରିବହନ ବନ୍ଦ ହୋଇଗଲା ଏବଂ ସେହି ଅର୍ଥରୁ ୫ ଶହ କୁଇଣ୍ଟାଲ ଧାନର ଟଙ୍କା ବଳକା ହୋଇଗଲା। ଏହା ପରେ ସରକାରଙ୍କ ପକ୍ଷରୁ ଧାନ କିଣା ପ୍ରକ୍ରିୟା ମଧ୍ୟ ବନ୍ଦ କରିଦିଆଗଲା ବୋଲି ଏମ୍ଡି କହିବା ସହ ଅନିୟମିତତା ଓ ଅନ୍ୟ କେତେକ ଅଭିଯୋଗକୁ ଖଣ୍ଡନ କରିଥିଲେ।
