ଖଇରା, ୬।୧୦(ଡି.ଏନ.ଏ.)-ବାଲେଶ୍ୱର ଜିଲା ଖଇରା ତହସିଲର ଶାରୀଶୁଆ ପାହାଡ଼ରେ ବେଆଇନ ଭାବେ ଚାଲିଥିବା ୧୦ ଖଣିରେ ତହସିଲଦାର ପ୍ରଦୀପ କୁମାର ସାହୁ ଶୁକ୍ରବାର ୧୪୪ ଧାରା ଜାରି କରିଛନ୍ତି। ତହସିଲଦାର ସାହୁ ଖାତା ନମ୍ବର ୨୪୫ ଏବଂ ପ୍ଲଟ ନମ୍ବର ୫୨୦ରେ ଥିବା ୧୦ଟି ଖଣିରେ ପଥର ଉତ୍ତୋଳନକୁ ନିଷିଦ୍ଧ କରିଛନ୍ତି। ଏହାପରଠାରୁ ଖଣିଗୁଡ଼ିକରେ ପୋଲିସ ପଇଁତରା ମାରିବେ। ଯେଉଁମାନେ ଖଣି ବ୍ୟବହାର କରିବେ ସେମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ତହସିଲଦାର ସାହୁ କହିଛନ୍ତି। ତେବେ ଏଭଳି ଆଇନ କାର୍ଯ୍ୟକାରିତାକୁ ନେଇ ପ୍ରଶ୍ନ ଉଠିଛି। ଶୁକ୍ରବାର ପୂର୍ବାହ୍ନରେ ଖଣିଗୁଡ଼ିକରେ ତହସିଲଦାର ସାହୁ ଓ ଅତିରିକ୍ତ ତହସିଲଦାର ବିଭାସ ରଞ୍ଜନ ପାଣିଗ୍ରାହୀ ଧାରା ଲାଗୁ କରିବାର କିଛି ଘଣ୍ଟା ମଧ୍ୟରେ ଖଣି ମାଫିଆମାନେ ଏହି ଖଣିଗୁଡ଼ିକରେ ବ୍ଲାଷ୍ଟିଂ କରିବା ସହ ପଥର ଉତ୍ତୋଳନ କରିଛନ୍ତି। ବିଶେଷ କରି ୮୯ ନମ୍ବର ଖଣିରେ ଏଭଳି ନିୟମ ଉଲ୍ଲଂଘନ କରାଯାଇଥିବା ନେଇ ପାହାଡ଼ ତଳ ବାସିନ୍ଦାମାନେ ଅଭିଯୋଗ କରିଛନ୍ତି।
ଗତ ସେପ୍ଟେମ୍ବର ୨୪ ତାରିଖରେ ବେଆଇନ ଖଣି କାରବାର ସମ୍ପର୍କରେ ‘ଧରିତ୍ରୀ’ରେ ଏକ ରିପୋର୍ଟ ପ୍ରକାଶ ପାଇବା ପରେ ୨୫ ତାରିଖରେ ଉପଜିଲାପାଳ ନିଲୁ ମହାପାତ୍ରଙ୍କ ନେତୃତ୍ୱରେ ଜଙ୍ଗଲ ପରିବେଶ ବିଭାଗର ଏକ ଟିମ୍ ଶାରୀଶୁଆ ପାହାଡ଼ର ବିଭିନ୍ନ ଖଣି ଏବଂ ପାହାଡ଼ ପାଦଦେଶରେ ଚାଲୁଥିବା ବିଭିନ୍ନ କ୍ରଶର ଯାଞ୍ଚ କରିଥିଲେ। ଖଣିଜ ପଦାର୍ଥ ଉତ୍ତୋଳନ ବେଳେ ଖଣି ମାଲିକମାନେ ଖୁଲମଖୁଲା ଖଣି ଆଇନ ଉଲ୍ଲଂଘନ କରୁଥିବା ନେଇ ଏହି ଟିମ୍ ହୃଦୟଙ୍ଗମ କରିଥିଲେ। ଖଣି ମାଲିକମାନଙ୍କ ସହ କେତେକ ରାଜସ୍ବ କର୍ମଚାରୀଙ୍କ ସାଲିସ୍ରେ ଏହା ଚାଲୁଥିବା ନେଇ ଖବରଦାତାଙ୍କୁ ସୂଚନା ମଧ୍ୟ ଦେଇଥିଲେ। କାର୍ଯ୍ୟାନୁଷ୍ଠାନ ସ୍ବରୂପ ବେଆଇନ ଭାବେ ଚାଲୁଥିବା ଖଣିଗୁଡ଼ିକରେ ୧୪୪ ଧାରା ଲାଗୁ କରାଯାଇଥିଲା। ଶୁକ୍ରବାର ରାତିରେ ୧୪୪ ଧାରା ଲାଗିଥିବା ଖଣିଗୁଡ଼ିକରେ ବ୍ଲାଷ୍ଟିଂ ହୋଇଥିବା ଅଭିଯୋଗ ସମ୍ପର୍କରେ ଅତିରିକ୍ତ ତହସିଲଦାର ପାଣିଗ୍ରାହୀଙ୍କ ମତାମତ ନେବାରେ ଏଭଳି ଅଭିଯୋଗ ତାଙ୍କ ନିକଟକୁ ଆସିନାହଁି ବୋଲି କହିଛନ୍ତି।
