ଚନ୍ଦ୍ରଗିରି,୧୯ା୯(ଡି.ଏନ.ଏ.)-ମୋହନା ବ୍ଲକର ଅତି ଦୁର୍ଗମ ଇଲାକାରେ ଅବସ୍ଥିତ ଗରଡମା ପଞ୍ଚାୟତର ରାଜଖମା ଗ୍ରାମ ନିକଟସ୍ଥ ଗଦାପୁର ନଦୀ। ଏହି ନଦୀରେ ପୋଲ ନାହିଁ। ଖରାଦିନେ ଏହା ଶୁଖିଲା ଥିବାରୁ ଲୋକେ ଚାଲି ଯାଇଥାନ୍ତି। ମାତ୍ର ବର୍ଷାଦିନ ଜଳସ୍ତର ବୃଦ୍ଧି ପାଏ। ପ୍ରାୟ ୮ରୁ ୧୦ ଫୁଟ ପାଣି ଓ ପ୍ରଖର ସ୍ରୋତରେ ଜୀବନକୁ ବାଜି ଲଗାଇ ଦୈନିକ ବିଦ୍ୟୁତ୍ ତାର ସାହାରା ନେଇ ଅଞ୍ଚଳବାସୀ ଉକ୍ତ ନଦୀ ପାର ହେଇଥାନ୍ତି। ନଦୀ ପାର ଘଟଣା ପ୍ରଥମେ ଗତ ୧୧ ତାରିଖରେ ଧରିତ୍ରୀ ଲାଇଭ୍ ଏବଂ ୧୨ରେ ଧରିତ୍ରୀ କାଗଜରେ ପ୍ରକାଶ ପାଇବା ପରେ ଏବେ ପ୍ରଶାସନ ପକ୍ଷରୁ ତତ୍ପରତା ଦେଖାଦେଇଛି। ଜିଲା ପ୍ରଶାସନର ନିର୍ଦ୍ଦେଶରେ ସୋମବାର ମୋହନା ବିଡିଓ ବଂଶୀଧର ଖୋସଲା ଏବଂ ବ୍ଲକର ସହକାରୀ ଯନ୍ତ୍ରୀ ଜଗବନ୍ଧୁ ଆଚାର୍ଯ୍ୟ ଘଟଣାସ୍ଥଳରେ ପହଞ୍ଚତ୍ ସ୍ଥିତି ଅନୁଧ୍ୟାନ କରି ଅଞ୍ଚଳବାସୀଙ୍କ ସହ ଆଲୋଚନା କରିଛନ୍ତି। ନଦୀ ଉପରେ ପୋଲ ନିର୍ମାଣ କରିବା ନିହାତି ଜରୁରୀ। ପୋଲ ନିର୍ମାଣ ହେଲେ ନଦୀ ଆରପଟେ ଥିବା ରାଜଖମା, ବେତାଗଣ୍ଡା, କୁଟ୍ରୀପଦର, ଗାଙ୍ଗୁଡିପଙ୍କା ଭଳି କେତେ ଖଣ୍ଡ ଆଦିବାସୀ ବହୁଳ ଗଁ।କୁ ଯାତାୟାତର ସୁବିଧା ହୋଇପାରିବ ବୋଲି କହିଥିଲେ। ଏଥିସହ ପଞ୍ଚାୟତର ଢେପାଗୁଡାରୁ ଗମ୍ଭାରୀ ଓ ରାଜଖମା ଗାଁ ରାସ୍ତା ଅତି ଦୟନୀୟ ଥିବାରୁ ଏଠାରେ ୮ କିମି ଥିବା ମାଟି ରାସ୍ତାକୁ ପକ୍କାରାସ୍ତା କିଭଳି ହେବ ସେ ନେଇ ସମିତି ବୈଠକରେ ଆଲୋଚନା କରାଯିବ ବୋଲି ବିଡିଓ କହିଥିଲେ। ଉକ୍ତ ନଦୀରେ ଗୋଟିଏ ପୋଲର ଆବଶ୍ୟକତା ରହିଥିବା ନେଇ ଉପରିସ୍ଥ ଅଧିକାରୀଙ୍କୁ ଜଣାଇ ଦିଆଯିବା ସହ ଅଞ୍ଚଳର ବିଭିନ୍ନ ସମସ୍ୟାକୁ ମଧ୍ୟ ସମାଧାନ କରାଯିବ ବୋଲି ସେ ଲୋକଙ୍କୁ ପ୍ରତିଶ୍ରୁତି ଦେଇଛନ୍ତି।
