ବାରିପଦା ଅଫିସ, ୨୭ା୪- ଅକ୍ଷୟ ତୃତୀୟା ଅବସରରେ ଦ୍ୱିତୀୟ ଶ୍ରୀକ୍ଷେତ୍ର ମୟୂରଭଞ୍ଜ ଜିଲା ବାରିପଦାସ୍ଥିତ ଶ୍ରୀ ଶ୍ରୀ ହରିବଳଦେବଜୀଉ ବିଜେ ମହାପ୍ରଭୁଙ୍କ ଘୋଷଯାତ୍ରା ନିମନ୍ତେ ରଥ ନିର୍ମାଣ କାର୍ଯ୍ୟର ଅନୁକୂଳ ହୋଇଛି। ରବିବାର ରଥର ଅଖ ଓ ଚକ କାର୍ଯ୍ୟ ଆରମ୍ଭ ହୋଇଛି। ବର୍ତ୍ତମାନ କରୋନା ମହାମାରୀଙ୍କୁ ନେଇ ଲକ୍ଡାଉନ କାରଣରୁ ଅନୁକୂଳ କାର୍ଯ୍ୟକ୍ରମ ଓ ଏହା ସହିତ ଜଡ଼ିତ ଅନ୍ୟାନ୍ୟ ସମସ୍ତ ରୀତିନୀତି ଶ୍ରୀ ଜୀଉଙ୍କ ମନ୍ଦିର ବେଢ଼ା ଭିତରେ ହୋଇଥିଲା। ଦେବୋତ୍ତର ବିଭାଗ ଓ ମନ୍ଦିର ସେବାୟତମାନଙ୍କ ଉପସ୍ଥିତିରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ୩ ରଥ ନିମନ୍ତେ ରଥ ମହାପାତ୍ରଙ୍କ ଦ୍ୱାରା ନିର୍ମିତ ଅଖ ଗୁଡ଼ିକ ମନ୍ଦିରର ଦକ୍ଷିଣ ଦ୍ୱାର ଦେଇ ଭିତରକୁ ନିଆଯାଇଥିଲା। ଏହା ପରେ ମନ୍ଦିରରେ ମହାପ୍ରଭୁଙ୍କ ନିକଟରେ ସନ୍ଧ୍ୟା ଆଳତୀ କରାଯାଇଥିଲା। ସନ୍ଧ୍ୟା ଆଳତୀ ପରେ ମୁଖ୍ୟ ସେବାୟତ ମହାପ୍ରଭୁ ବାସୁଦେବଙ୍କ ସହ ଆସି ପହଞ୍ଚିବା ପରେ ଅଖକୁ ପୂର୍ଜାଚ୍ଚନା କରାଯାଇଥିଲା। ଏହା ସହିତ ରବିବାରଠାରୁ ମହାପ୍ରଭୁଙ୍କ ୨୧ ଦିନିଆ ଚନ୍ଦନଯାତ୍ରା ଆରମ୍ଭ ହୋଇଥିଲା। ଚନ୍ଦନଯାତ୍ରାର ଶେଷ ୩ ଦିନ ହେମସାଗର ପୋଖରୀଠାରେ ଚାପଖେଳ ହେଉଥିବା ବେଳେ ମଦନମୋହନ ମନ୍ଦିର ବାହାରକୁ ଆସିବେ ନାହିଁ ବୋଲି ମୁଖ୍ୟ ପୂଜକ ଅରୁଣ କୁମାର ମିଶ୍ର କହିଛନ୍ତି। ପୋଖରୀ ଅବସ୍ଥା ଭଲ ନ ଥିବା ଓ ୩ ତାରିଖ ପରେ ଚାପ ଖେଳିବା ପାଇଁ ଯଦି ପ୍ରଶାସନ ଅନୁମତି ଦିଅନ୍ତି ତେବେ ପୋଖରୀରେ ଚାପ ଖେଳ କରାଯିବ ବୋଲି ସେ କହିଛନ୍ତି। ସାମାଜିକ ଦୂରତ୍ୱ ରକ୍ଷା କରି ପୂର୍ଜାଚ୍ଚନା କରାଯାଉଥିବା ସେ ପ୍ରକାଶ କରିଥିଲେ।
