କରାଚୀ/ଇସ୍ଲାମାବାଦ, ୨୪।୫(ପି.ଟି.): ପାକିସ୍ତାନର କରାଚୀଠାରେ ଶୁକ୍ରବାର ଦୁର୍ଘଟଣାଗ୍ରସ୍ତ ହୋଇଥିବା ବିମାନର ୯୯ ଯାତ୍ରୀଙ୍କ ମଧ୍ୟରୁ ୯୭ ଜଣ ପ୍ରାଣ ହରାଇଥିବାବେଳେ ଆଶ୍ଚର୍ଯ୍ୟଜନକ ଭାବେ ୨ ଜଣ ବଞ୍ଚତ୍ୟାଇଛନ୍ତି। ଜିନ୍ନା ଅନ୍ତର୍ଜାତୀୟ ବିମାନବନ୍ଦର ନିକଟବର୍ତ୍ତୀ ଏକ ଘନ ଜନବସତି ଅଞ୍ଚଳରେ ବିମାନଟି ଖସିପଡ଼ିବା ସହ ଜଳିଯାଇଥିଲା। ଏହି ଦୁର୍ଘଟଣାରେ ସ୍ଥାନୀୟ ଅଞ୍ଚଳର ୧୧ ଜଣ ଆହତ ହୋଇଛନ୍ତି। ୯୭ଟି ମୃତଦେହ ମିଳିବା ସହ ୨ ଜଣଙ୍କୁ ଜୀବନ୍ତ ଅବସ୍ଥାରେ ଉଦ୍ଧାର କରାଯାଇଥିବା ପାକ୍ ସେନା ପକ୍ଷରୁ କୁହାଯାଇଛି। ୨୫ଟି ଘର କ୍ଷତିଗ୍ରସ୍ତ ହୋଇଛି।
ତିନିଥର ଝଟକା ଦେବାରୁ ପାଇଲଟ ଦକ୍ଷତାର ସହିତ ବିମାନକୁ ଉପରକୁ ଉଠାଇଥିଲେ। ଉପରେ ୧୦ରୁ ୧୫ ମିନିଟ ଉଡ଼ିବା ପରେ ପାଇଲଟ ଅବତରଣ ସମ୍ପର୍କରେ ପୁଣିଥରେ ଘୋଷଣା କରିଥିଲେ। ଏହାର ମୁହୂର୍ତ୍ତକ ପରେ ବିମାନଟି ଦୁର୍ଘଟଣାଗ୍ରସ୍ତ ହୋଇଥିଲା ବୋଲି ଯାତ୍ରୀ ମୁହମ୍ମଦ ଜୁବୈର କହିଛନ୍ତି। ଦୁର୍ଘଟଣାରେ ପୋଡ଼ିଯାଇଥିବା ଜୁବୈର କରାଚୀ ହସ୍ପିଟାଲରେ ଚିକିତ୍ସିତ ହେଉଛନ୍ତି। ସେହିପରି ଦୁର୍ଘଟଣାରୁ ବର୍ତ୍ତିଥିବା ଅନ୍ୟ ଯାତ୍ରୀ ଜଣକ ହେଲେ ବ୍ୟାଙ୍କ ଅଫ୍ ପଞ୍ଜାବର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଜଫର ମାସୁଦ। ତାଙ୍କର ଅଣ୍ଟା ଓ କଲାର ହାଡ଼ ଭାଙ୍ଗିଯାଇଛି। ସେ ଦାରୁଲ ସେହାତ ହସ୍ପିଟାଲରେ ଚିକିତ୍ସିତ ହେଉଛନ୍ତି।
ସୂଚନା ଅନୁଯାୟୀ ଦୁର୍ଘଟଣାଗ୍ରସ୍ତ ଏୟାରବସ୍ ଏ-୩୨୦ ୨ ମାସ ପୂର୍ବରୁ ଯାଞ୍ଚ ହୋଇଥିଲା। ଦୁର୍ଘଟଣାର ଦିନକ ପୂର୍ବରୁ ଏହା ମୁସ୍କାଟରୁ ଲାହୋର ଫେରିଥିଲା। ବିମାନ ଇଞ୍ଜିନ, ଲ୍ୟାଣ୍ଡିଂ ଗିଅର ଓ ପ୍ରମୁଖ ସିଷ୍ଟମରେ କୌଣସି ତ୍ରୁଟି ନ ଥିଲା ବୋଲି ଏୟାରଲାଇନ୍ସ ପକ୍ଷରୁ କୁହାଯାଇଛି। ମାର୍ଚ୍ଚ ୨୧ରେ ବିମାନକୁ ଯାଞ୍ଚ କରାଯାଇ ଏହା ନଭେମ୍ବର ୫ ପର୍ଯ୍ୟନ୍ତ ଉଡ଼ାଣ ଲାଗି ଉପଯୁକ୍ତ ବୋଲି ବେସାମରିକ ବିମାନ ଚଳାଚଳ କର୍ତ୍ତୃପକ୍ଷ (ସିଏଏ) ପକ୍ଷରୁ ଘୋଷଣା କରାଯାଇଥିଲା। ବିମାନର ବ୍ଲାକ୍ବକ୍ସ ଉଦ୍ଧାର ହେବା ସହ ଦୁର୍ଘଟଣାର କାରଣ ସମ୍ପର୍କରେ ତଦନ୍ତ ଚାଲିଛି।
