ଭୁବନେଶ୍ୱର,୧।୫(ବ୍ୟୁରୋ): ବାତ୍ୟା ‘ଫନୀ’କୁ ବର୍ଷେ ପୁରିବାକୁ ଆଉ ଦୁଇ ଦିନ ବାକି। ୨୦୧୯ ମେ’ ୩ ତାରିଖରେ ଓଡ଼ିଶା ଉପକୂଳରେ ମାଡ଼ ହୋଇଥିଲା ଏହି ସାମୁଦ୍ରିକ ଝଡ଼। ବିଗତ ଦୁଇ ଦଶନ୍ଧି ମଧ୍ୟରେ ଦେଖାଯାଇଥିବା ପ୍ରାକୃତିକ ବିପର୍ଯ୍ୟୟଗୁଡ଼ିକ ମଧ୍ୟରୁ ‘ଫନୀ’ ବ୍ୟାପକ କ୍ଷତି କରିଥିଲା। ଏହାଦ୍ୱାରା ଉପକୂଳ ଓଡ଼ିଶାରେ ନାହିଁ ନ ଥିବା କ୍ଷୟକ୍ଷତି ହୋଇଥିଲା। ବିଶେଷକରି ଅଞ୍ଚଳଗୁଡ଼ିକରେ କଚ୍ଚାଘର ଭାଙ୍ଗି ଯାଇଥିବା ବେଳେ ରାସ୍ତାଘାଟ, ବିଦ୍ୟୁତ୍ ସେବା, ଏଟିଏମ୍, ମୋବାଇଲ, ପେଟ୍ରୋଲ ପମ୍ପ ସବୁକିଛି ଅଚଳ ହୋଇପଡ଼ିଥିଲା।
ପ୍ରଥମେ ତାମିଲନାଡ଼ୁ ଉପକୂଳରେ ‘ଫନୀ’ ମାଡ଼ ହେବ ବୋଲି କୁହାଯାଉଥିବା ବେଳେ ପରେ ଏହା ଗତିପଥ ବଦଳାଇଥିଲା। ଶେଷରେ ଏହା ଓଡ଼ିଶା ଉପକୂଳ ପୁରୀରେ ଲ୍ୟାଣ୍ଡଫଲ କରିଥିଲା। ଫଳରେ ପୁରୀ ବାତ୍ୟାଦ୍ୱାରା ସର୍ବାଧିକ କ୍ଷତିଗ୍ରସ୍ତ ଜିଲା ହୋଇଥିଲା। ଏହାର ପ୍ରଭାବରେ ୬୪ଜଣଙ୍କ ମୃତ୍ୟୁ ଘଟିଥିବା ବେଳେ ୫.୫୬ ଲକ୍ଷ ଘର ଭାଙ୍ଗିଯାଇଥିଲା। ସେହିଭଳି ୧,୪୮,୬୬୩ ହେକ୍ଟର ଚାଷଜମି ପ୍ରଭାବିତ ହୋଇଥିଲା। ୫ ସହରରେ ୧ ଲକ୍ଷ ୭୩ହଜାର ୯୫୭ ଗଛ ନଷ୍ଟ ହୋଇଥିଲା। ଏସବୁ ମଧ୍ୟରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟଙ୍କ ପ୍ରଚେଷ୍ଟା ଯୋଗୁ ୧୨ ଲକ୍ଷ ଲୋକଙ୍କୁ ଉଦ୍ଧାର କରାଯାଇଥିଲା।
ଦୁଇ ଦିନ ପରେ ‘ଫନୀ’କୁ ବର୍ଷେ ପୁରିବାକୁ ଯାଉଥିଲେ ହେଁ ଏଯାଏ ସେ ଦେଇଯାଇଥିବା କ୍ଷତ ପୁରିନାହିଁ। ଏଥିଯୋଗୁ ଉପକୂଳ ଓଡ଼ିଶା ବିବର୍ଣ୍ଣ ହୋଇଯାଇଥିବା ବେଳେ ଲୋକମାନେ ଅଣ୍ଟା ସଳଖି ପାରି ନାହାନ୍ତି।
