ବରଗଡ଼ ଅଫିସ୍,୨୪।୪: ଲକ୍ ଡାଉନ କଟକଣା ଲାଗୁ ହେବା ପରେ ଦାଦନ ଦୁଃଖ ବଢ଼ି ଯାଇଛି। ଜିଲା ତଥା ରାଜ୍ୟ ବାହାର ଶ୍ରମିକଙ୍କୁ ଦାଦନ ଖଟିବାକୁ ଯାଇଥିବା ଶ୍ରମିକମାନେ ଦୋ ଛକିରେ ପଡ଼ିଯାଇଛନ୍ତି। ସେମାନେ ନିଜ ଘରକୁ ଫେରିପାରୁ ନ ଥିବାବେଳେ ଯେଉଁଠାରେ ଅଛନ୍ତି, ସେଠାରେ ମଧ୍ୟ ଭଲ ଭାବେ ଖାଇବାକୁ ମୁଠାଏ ପାଉ ନାହାନ୍ତି। କେବଳ ସେତିକି ନୁହେଁ, ନିଜ ଆତ୍ମୀୟଙ୍କ ମୃତ୍ୟୁ ପରେ ସେମାନେ ମୃତକଙ୍କ ଶେଷ ଦର୍ଶନ କରିବାରୁ ମଧ୍ୟ ବଞ୍ଚିତ ହୋଇଛନ୍ତି। ବରଗଡ଼ ଜିଲା ପାଇକମାଳ ବ୍ଲକ ଅନ୍ତର୍ଗତ ଛେତଗାଁର ଏକ ପରିବାର କ୍ଷେତ୍ରରେ ଏଭଳି ଅଭାବନୀୟ ପରିସ୍ଥିତି ଉପୁଜିଛି ।
ସୂଚନା ଅନୁଯାୟୀ, ଗତ କିଛି ମାସ ତଳେ ଛେତଗାଁ ଗ୍ରାମର ଭୂମିସୁତା ବରିହା ସ୍ବାମୀ ଅଙ୍ଗଦ ଏବଂ ୩ ଶିଶୁ ସନ୍ତାନଙ୍କୁ ଧରି ଉତ୍ତର ପ୍ରଦେଶ ରାଜ୍ୟ ଆମ୍ବେଦକର ନଗର ଜିଲା ଆହ୍ଲାପୁର ଥାନା ଅସ୍ତି ଅଞ୍ଚଳର ଏକ ଇଟାଭାଟିରେ ନିୟୋଜିତ ଅଛନ୍ତି। ଅନ୍ୟପଟେ ଗତ ୨୨ତାରିଖରେ ନିଜ ଘରେ ଭୂମିସୁତାଙ୍କ ମା’ ନାନୁମତୀଙ୍କ ଦେହାନ୍ତ ହୋଇଛି । ଏହି ଖବର ଭୂମିସୁତା ପାଇଥିଲେ ମଧ୍ୟ ଲକ୍ ଡାଉନ୍ ଯୋଗୁ ସେ ଘରକୁ ଫେରି ପାରି ନ ଥିଲେ ଏବଂ ମା’ଙ୍କ ଶେଷ ଦର୍ଶନରୁ ବଞ୍ଚିତ ହୋଇଥିଲେ।
ତେବେ ଅଞ୍ଚଳର ସାମାଜିକ କର୍ମୀ ଦୀପା ବାରିକ ଏହି ଖବର ପାଇବା ପରେ ଭୂମିସୁତାଙ୍କ ପରିବାର ଲୋକେ କିଭଳି ନିଜ ଘରକୁ ଫେରିବେ ଏବଂ ମା’ଙ୍କ ଶୁଦ୍ଧିକ୍ରିୟାରେ ଯୋଗଦେଇ ପାରିବେ, ସେ ନେଇ ପ୍ରୟାସ ଆରମ୍ଭ କରିଛନ୍ତି । ଏ ନେଇ ଦୀପା ଉତ୍ତର ପ୍ରଦେଶ ସରକାର ତଥା ସେଠାକାର ପ୍ରଶାସନକୁ ଟୁଇଟ୍ କରି ସେହି ପରିବାର ଲୋକଙ୍କୁ ଘରକୁ ଫେରିବାରେ ସହଯୋଗ କରିବାକୁ ନିବେଦନ କରିଛନ୍ତି । ଦୀପାଙ୍କ ଏଭଳି ଉଦ୍ୟମକୁ ବିଭିନ୍ନ ମହଲରେ ପ୍ରଶଂସା କରାଯାଇଛି ।
