କେନ୍ଦୁଝର, ୨୩ା୫ (ସ୍ବ.ପ୍ର.)-କେନ୍ଦୁଝର ଜିଲାରୁ ପାରଦୀପକୁ ଲୁହାପଥର ପରିବହନକୁ ନେଇ କେନ୍ଦୁଝର ଓ ପାରାଦୀପ ଟ୍ରକ ମାଲିକ ସଂଘ ମଧ୍ୟରେ ବିବାଦ ଗୁରୁତର ରୂପ ଧାରଣ କରିଛି। କେନ୍ଦୁଝର ଜିଲାରୁ ଲୁହାପଥର ନେଇ ଯାଉଥିବା ଟ୍ରକ ଗୁଡିକୁ ପାରାଦୀପ, ଜଗତସିଂହପୁର, କେନ୍ଦ୍ରାପଡା ଅଞ୍ଚଳର ଟ୍ରକ ମାଲିକ ମାନେ ହଇରାଣ କରୁଥିବାରୁ ଏହାର ପ୍ରତିବାଦରେ କେନ୍ଦୁଝର ଜିଲା ଟ୍ରକ ମାଲିକ ସଂଘ ପକ୍ଷରୁ ଗତ ଶୁକ୍ରବାର ସନ୍ଧ୍ୟାରେ ଉକ୍ତ ଅଞ୍ଚଳର ଟ୍ରକ ଗୁଡିକୁ ଏନଏଚ ୨୦ ରାଙ୍କି ନିକଟରେ ଅଟକାଇ ରଖିଛନ୍ତି। ଏହାକୁ ନେଇ ବିବାଦ ବଢୁଥିବାରୁ ଉଭୟ ଜିଲା ପ୍ରଶାସନ ହସ୍ତକ୍ଷେପ କରି ସମାଧାନ କରିବାକୁ ଦାବି ହେଉଛି। ଏନେଇ କେନ୍ଦୁଝର ଜିଲା ଟ୍ରକ ମାଲିକ ସଂଘ ପକ୍ଷରୁ ପାରାଦୀପ ଟ୍ରକ ମାଲିକ ସଂଘକୁ ଜଣାଇଥିଲେ ହେଁ କରୋନା କଟକଣା ଆଳରେ ସମାଧାନ ନ କରି ଦିନ ଗଡାଇବାରେ ଲାଗିଛନ୍ତି। ଏଣୁ ବାଧ୍ୟ ହୋଇ ଆମେ ଏଠାରେ ସାମାଜିକ ଦୂରତ୍ୱ ରକ୍ଷା କରି ତାଙ୍କ ଅଞ୍ଚଳର ଟ୍ରକ ଗୁଡିକୁ ଅଟକାଇ ପ୍ରତିବାଦ କରୁଛୁ ବୋଲି କେନ୍ଦୁଝର ଟ୍ରକ ମାଲିକ ସଂଘର ସାଧାରଣ ସମ୍ପାଦକ ସୂର୍ଯ୍ୟନାରାୟଣ କର କହିଛନ୍ତି। ଏଣୁ ଏହାର ତୁରନ୍ତ ସମାଧାନ ନ ହେବା ପର୍ଯ୍ୟନ୍ତ ଟ୍ରକ ଗୁଡ଼ିକ ଛଡାଯିବ ନାହିଁ ବୋଲି ଟ୍ରକ ମାଲିକ ମାନେ କହିଛନ୍ତି।
