ନୂଆଦିଲ୍ଲୀ, ୨୩ା୭ (ପି.ଟି.)-କାନାଡାର ଡେଜାନ୍ ପାପିକ୍ ଜାତୀୟ ଟେବୁଲ ଟେନିସ (ଟିଟି) ଦଳର ନୂଆ ମୁଖ୍ୟ କୋଚ୍ ହେବେ। ମଙ୍ଗଳବାର ତାହା ସ୍ପଷ୍ଟ ହୋଇଛି। ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ) ତରଫରୁ ତାଙ୍କୁ ଦିଆଯାଇଥିବା ବର୍ଷିକିଆ ଚୁକ୍ତିପତ୍ରକୁ ସେ ଗ୍ରହଣ କରିଛନ୍ତି। ଗତବର୍ଷ ଏସିଆନ ଗେମ୍ସ ପରଠାରୁ ଖେଳାଳିମାନେ ମୁଖ୍ୟ କୋଚ୍ ସେବାରୁ ବଞ୍ଚିତ ହୋଇଛନ୍ତି। ଆଗକୁ ୨୦୨୦ ଜୁଲାଇ-ଅଗଷ୍ଟରେ ଟୋକିଓ ଅଲିମ୍ପିକ୍ସ ହେବାକୁଥିବାବେଳେ ସେମାନେ ବହୁମୂଲ୍ୟ ସମୟ ହରାଇସାରିଛନ୍ତି। ଟେବୁଲ ଟେନିସ ଫେଡେରେଶନ ଅଫ୍ ଇଣ୍ଡିଆ (ଟିଟିଏଫ୍ଆଇ) ପାପିକ୍ଙ୍କୁ ଗତ ମାର୍ଚ୍ଚରେ ଭାରତୀୟ ଟେବୁଲ ଟେନିସର ମୁଖ୍ୟ କୋଚ ଭାବେ ମନୋନୀତ କରିିଥିଲା। ମାତ୍ର ସାଇ ଦୁଇ ସପ୍ତାହ ତଳେ ତାଙ୍କ ନିକଟକୁୁ ଚୁକ୍ତିପତ୍ର ପଠାଇଛି। ପାପିକ୍ ବର୍ତ୍ତମାନ ଭ୍ରମଣରେ ଅଛନ୍ତି। ତେଣୁ ଚୁକ୍ତି ସ୍ବାକ୍ଷରରେ ବିଳମ୍ବ ଘଟୁଛି। ଆସନ୍ତାମାସ ପ୍ରଥମ ସପ୍ତାହରେ ସେ ଭାରତରେ ପହଞ୍ଚିବେ ବୋଲି ଆଶା କରାଯାଉଛି ବୋଲି ଟିଟିଏଫ୍ଆଇ ସମ୍ପାଦକ ଏମ.ପି. ସିଂ କହିଛନ୍ତି। କୋଚ୍ ନିଯୁକ୍ତିରେ ବିଳମ୍ବ ପାଇଁ ସରଥ କମଲ ଏବଂ ଜି. ସାଥିୟାଁଙ୍କ ଭଳି ଖେଳାଳି ନୈରାଶ୍ୟ ପ୍ରକାଶ କରିସାରିଛନ୍ତି। ପାପିକ୍ ମାସକୁ ବେତନ ବାବଦରେ ୭୦୦୦ ଆମେରିକୀୟ ଡଲାର ପାଇବେ। ଅଲିମ୍ପିକ୍ସ ପରେ ତାଙ୍କ ଚୁକ୍ତି ନବୀକରଣ କରାଯିବ।
