ଜଟଣୀ, ୫।୧(ଡି.ଏନ.ଏ.): ବନ୍ଧୁକ ଦେଖାଇ ଅନ୍ୟ ଯାତ୍ରୀଙ୍କୁ ଭୟଭୀତ କରିବା ସହ ଟ୍ରେନ୍ ମଧ୍ୟରେ ଆତଙ୍କ ସୃଷ୍ଟି ଘଟଣାରେ ଖୋର୍ଦ୍ଧାରୋଡ ରେଲୱେ ପୋଲିସ ସୋମନାଥ ପାଢୀ(୩୮)ଙ୍କୁ ଗିରଫକରି ଶନିବାର କୋର୍ଟଚାଲାଣ କରିଛି। ଅଭିଯୁକ୍ତଙ୍କ ଘର ସୁନ୍ଦରଗଡ ଜିଲା ରଘୁନାଥପାଲ୍ଲୀ ଥାନା ଅନ୍ତର୍ଗତ ଦେଓଗାଁ ଅଞ୍ଚଳରେ। ହେଲେ ୩ ମାସ ହେବ ସେ ପୁରୀ ସମୁଦ୍ରକୂଳରେ ଚା’ ଦୋକାନ କରି ରହୁଥିଲେ। ସୋମନାଥଙ୍କଠାରୁ ଗୋଟିଏ ବନ୍ଧୁକ, ୩ ଗୁଳି ଓ ୨ ମୋବାଇଲ ପୋଲିସ ଜବତ କରିଛି। ପୁରୀ-ସମ୍ବଲପୁର ଇଣ୍ଟରସିଟି ଏକ୍ସପ୍ରେସ୍ରେ ସମ୍ବଲପୁର ଯାତ୍ରା କରିବା ସମୟରେ ଟ୍ରେନ୍ ମଧ୍ୟରେ ଶୁକ୍ରବାର ଏହା ଘଟିଥିଲା। ପୁରୀରୁ ଟ୍ରେନ୍ ଛାଡିବା ପରେ ଅନ୍ୟ ଯାତ୍ରୀମାନଙ୍କୁ ବଗି ମଧ୍ୟରେ ସୋମନାଥ ଗାଳିଗୁଲଜ କରିବା ସହ ବନ୍ଧୁକ ବାହାର କରି ଭୟଭୀତ କରାଇଥିଲେ। ଟ୍ରେନ୍ଟି ଖୋର୍ଦ୍ଧାରୋଡ ଷ୍ଟେଶନରେ ପହଞ୍ଚତ୍ବା ପରେ ଖବରପାଇ ପୂର୍ବରୁ ପ୍ରସ୍ତୁତ ଥିବା ଜିଆର୍ପି ଓ ଆର୍ପିଏଫ୍ ଯବାନମାନେ ବନ୍ଧୁକଧାରୀ ଏହି ଯୁବକଙ୍କୁ ଧରିବା ପାଇଁ ଚେଷ୍ଟା କରିଥିଲେ। ତେବେ ପୋଲିସକୁ ମଧ୍ୟ ଅଭିଯୁକ୍ତ ସୋମନାଥ ବନ୍ଧୁକ ଦେଖାଇ ଗୁଳି ମାରି ଦେବାକୁ ଧମକ ଦେଇଥିଲେ। ଏପରି କିଛି ସମୟ ଛକାପଞ୍ଝା ଚାଲିବା ପରେ ସତର୍କତାର ସହ ଇନ୍ସପେକ୍ଟର ବିଦ୍ୟାଧର ବାରିକଙ୍କ ସମେତ ଆର୍ପିଏଫ୍ ଯବାନମାନେ ସାଦା ପୋଷାକରେ ସୋମନାଥଙ୍କୁ କାବୁ କରିବାରେ ସକ୍ଷମ ହୋଇଥିଲେ। ସୂଚନାଯୋଗ୍ୟ, ଗିରଫ ଅଭିଯୁକ୍ତଙ୍କ ସହ ତାଙ୍କ ସ୍ତ୍ରୀ ଓ ଶିଶୁପୁତ୍ର ମଧ୍ୟ ଟ୍ରେନ୍ରେ ଯାତ୍ରା କରୁଥିଲେ। ଜବତ ବନ୍ଧୁକଟି ସେ ରାଜଗାଙ୍ଗପୁର ଅଞ୍ଚଳରୁ ଆଣିଥିବା ପୋଲିସ ସମ୍ମୁଖରେ କହିଛନ୍ତି। ଏ ନେଇ ତଦନ୍ତ ଚାଲିଥିବା ଜିଆର୍ପି ଥାନା ଅଧିକାରୀ ସନ୍ତୋଷ ବାହିନୀପତି କହିଛନ୍ତି। ଖୋର୍ଦ୍ଧାରୋଡ୍ ଜିଆର୍ପି ଥାନାରେ ଦଫା ୨୯୪, ୩୫୩, ୩୦୭, ୫୦୬ ଆଇପିସି ୨୫(୧-ଏ),୧-ବି) (ଏ) ଆମ୍ସର୍ର୍ ଆକ୍ଟ, ୧୪୬ ରେଲଓ୍ବେ ଆକ୍ଟ, ନଂ. ୩/୨୦ରେ ମାମଲା ରୁଜୁ ହୋଇଛି।
