ଭୁବନେଶ୍ୱର,୫।୧(ବ୍ୟୁରୋ): କେନ୍ଦୁଝର ସଦର ହସ୍ପିଟାଲରେ ଭୁଲ୍ ରକ୍ତ ନେବାଦ୍ୱାରା ସୁକାନ୍ତି ନାୟକ ନାମ୍ନୀ ମହିଳାଙ୍କର ୨୦୧୬ରେ ମୃତ୍ୟୁ ଘଟିଥିଲା। ଏହି ମାମଲାର ଶୁଣାଣି କରି ଶନିବାର ରାଜ୍ୟ ମାନବାଧିକାର କମିଶନ (ଓଏଚ୍ଆର୍ସି) ଗୁରୁତ୍ୱପୂର୍ଣ୍ଣ ରାୟ ଶୁଣାଇଛନ୍ତି। ମୃତ ମହିଳାଙ୍କ ସ୍ବାମୀ ଚନ୍ଦା ନାୟକଙ୍କୁ ୩ଲକ୍ଷ ଟଙ୍କା ଦେବା ପାଇଁ ରାଜ୍ୟ ସ୍ବାସ୍ଥ୍ୟ ବିଭାଗ ସଚିବଙ୍କୁ ନିର୍ଦ୍ଦେଶ ଦେଇଛନ୍ତି। ଏହାସହ ମାର୍ଚ୍ଚ ୨୦ ସୁଦ୍ଧା କ୍ଷତିପୂରଣ ସଂକ୍ରାନ୍ତ ରିପୋର୍ଟ ଦେବାକୁ କୁହାଯାଇଛି। ଏସ୍ପି, ସିଡିଏମ୍ଓଙ୍କ ରିପୋର୍ଟ ଆଧାରରେ ଓଏଚ୍ଆର୍ସି ଅଧ୍ୟକ୍ଷ ଜଷ୍ଟିସ ବିମଳ ପ୍ରସାଦ ଦାଶ ଓ ସଦସ୍ୟ ଜଷ୍ଟିସ ରଘୁବୀର ଦାଶ ଏହି ନିର୍ଦ୍ଦେଶ ଦେଇଛନ୍ତି।
୨୦୧୬ ଏପ୍ରିଲ ୧୪ରେ ରକ୍ତହୀନତାର ଶିକାରହୋଇ କେନ୍ଦୁଝର ହାଡ଼ବନ୍ଧ ସାହିର ଚନ୍ଦା ନାୟକଙ୍କ ସ୍ତ୍ରୀ ସୁକାନ୍ତି କେନ୍ଦୁଝର ସଦର ହସ୍ପିଟାଲର ମେଡିସିନ୍ ଓ୍ବାର୍ଡରେ ଭର୍ତ୍ତି ହୋଇଥିଲେ। ସେହି ସମୟରେ ସମାନ ନାମରେ କେନ୍ଦୁଝର ଚମ୍ପୁଆ ଅଞ୍ଚଳର ଉଦୟ ସିଂଙ୍କ ସ୍ତ୍ରୀ ସୁକାନ୍ତି ନାୟକ ଗାଇନିଂ ଓ୍ବାର୍ଡରେ ଚିକିତ୍ସିତ ହେଉଥିଲେ। ଚନ୍ଦା ନାକୟଙ୍କ ସ୍ତ୍ରୀ ସୁକାନ୍ତିଙ୍କ ବ୍ଲଡ୍ ଗ୍ରୁପ (୦+) ହୋଇଥିବାବେଳେ ଗାଇନିଂ ଓ୍ବାର୍ଡରେ ଥିବା ସୁକାନ୍ତିଙ୍କ ବ୍ଲଡ୍ ଗ୍ରୁପ୍ (ଏ+) ଥିଲା। ଦୁହେଁ ରକ୍ତ ଆବଶ୍ୟକ କରୁଥିଲେ। ହେଲେ ଚନ୍ଦାଙ୍କ ସ୍ତ୍ରୀ ସୁକାନ୍ତିଙ୍କୁ ୦+ ବଦଳରେ ଏ+ ରକ୍ତ ଦିଆଯାଇଥିଲା। ଭୁଲ୍ ରକ୍ତ ଦିଆଯିବା ଫଳରେ ସୁକାନ୍ତିଙ୍କର ମୃତ୍ୟୁ ଘଟିଥିଲା। ଏନେଇ ଗଣମାଧ୍ୟମରେ ଖବର ପ୍ରକାଶ ପାଇବା ପରେ କମିଶନ ନିଜ ଆଡୁ ମାମଲା ରୁଜୁ କରିଥିଲେ। ଏହାପରେ କେନ୍ଦୁଝର ଏସ୍ପି ଏବଂ ସିଡିଏମ୍ଓଙ୍କୁ ଏନେଇ ରିପୋର୍ଟ ମାଗିଥିଲେ। ଏସ୍ପି ତଦନ୍ତ କରି ଦୋଷୀଙ୍କ ନାମରେ ୩୦୪ରେ ଏକ ମାମଲା ରୁଜୁ କରାଯାଇଥିବା ରିପୋର୍ଟରେ ଦର୍ଶାଇଥିଲେ। ଏହାସହ ସିଡିଏମ୍ଓ ତାଙ୍କ ରିପୋର୍ଟରେ ଷ୍ଟାଫ୍ ନର୍ସ, ବ୍ଲଡ୍ ବ୍ୟାଙ୍କ୍ ସମେତ ଡାକ୍ତରଙ୍କ ଭୁଲ୍ ଥିବା ଦର୍ଶାଇବା ସହ ସେମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଇଥିବା ରିପୋର୍ଟରେ ଉଲ୍ଲେଖ କରିଥିଲେ। ଏହି ମାମଲାକୁ ନେଇ ଓଏଚ୍ଆର୍ସିରେ ପ୍ରବୀର ଦାଶ, ଅପୂର୍ବ ରଞ୍ଜନ ମଲିକ, ବିଜୟ କୁମାର ପଣ୍ଡା ଓ ବିଶ୍ୱପ୍ରିୟ କାନୁନ୍ଗୋଙ୍କ ଅଭିଯୋଗକ୍ରମେ ମଧ୍ୟ ୪ ମାମଲା ହୋଇଥିଲା।
