ଯୋଡ଼ା, ୮।୮(ଡି.ଏନ.ଏ.)-କେନ୍ଦୁଝର ଜିଲା ଯୋଡ଼ା ଥାନା ବିଲେଇପଦାସ୍ଥିତ ଟାଟାସ୍ପଞ୍ଜ କାରଖାନା ଫାଟକ ସମ୍ମୁଖରେ ଗତ ୮୩ ଦିନ ଧରି ଧାରଣାରେ ବସିଛନ୍ତି ବିଳାସୀ କାରୁଆ। ପୁଅ ଦୀପକ କାରୁଆ ବି ମାଆଙ୍କ ସହିତ ଏହି ଧାରଣାରେ ସାମିଲ ହୋଇଛନ୍ତି ା ହେଲେ ତାଙ୍କୁ ଏ ଯାଏ ନ୍ୟାୟ ମିଳିନି ା କମ୍ପାନୀରେ କାର୍ଯ୍ୟରତ ସ୍ବାମୀଙ୍କ ମୃତ୍ୟୁଜନିତ କ୍ଷତିପୂରଣ ଓ ପରିବାରର ସଦସ୍ୟଙ୍କୁ ନିଯୁକ୍ତି ଦାବି କରି ବିଳାସୀ ଏହି ଆନ୍ଦୋଳନ ଚଳାଇ ଆସିଛନ୍ତି। ଏହାପରେ ବି କମ୍ପାନୀ କର୍ତ୍ତୃପକ୍ଷ କୌଣସି ପଦକ୍ଷେପ ନେଇ ନାହାନ୍ତି। ଏହାକୁ ନେଇ ଦୁଃଖରେ ଭାଙ୍ଗିପଡିଛନ୍ତି ବିଳାସୀ ା ମଙ୍ଗଳବାର ଥିଲା ସ୍ବାମୀ ମହାନ୍ତି କାରୁଆଙ୍କ ୧୬ତମ ଶ୍ରାଦ୍ଧ ବାର୍ଷିକୀ ା ଏଥିପାଇଁ ସେ ଧାରଣାସ୍ଥଳରେ ହିଁ ପୁଅ ଦୀପକଙ୍କ ସହିତ ସ୍ବାମୀଙ୍କୁ ଶ୍ରାଦ୍ଧ ଅର୍ପଣ କରିବା ସହିତ କମ୍ପାନୀ କର୍ତ୍ତୃପକ୍ଷଙ୍କ ପାଇଁ ପିଣ୍ଡ ପକାଇ ନିଜର ଅଭିମାନକୁ ପ୍ରକାଶ କରିଛନ୍ତି ା
ବିଲେଇପଦାସ୍ଥିତ ଟାଟାସ୍ପଞ୍ଜ ଲୌହ କାରଖାନାରେ ଯୋଡ଼ା ପୌରାଞ୍ଚଳ ଅନ୍ତର୍ଗତ ଗୋପ ମହାନ୍ତି ହଟିଂ ବାସିନ୍ଦା ମହାନ୍ତି କାରୁଆ ଜଣେ ବରିଷ୍ଠ ସଫେଇ କର୍ମଚାରୀ ଭାବେ କାମ କରୁଥିଲେ ା ୨୦୦୪ ଅଗଷ୍ଟ ୬ରେ ସେ କମ୍ପାନୀକୁ ଆସି ଆଉ ଘରକୁ ଫେରି ନ ଥିଲେ ା କମ୍ପାନୀରେ କୁଆଡ଼େ ତାଙ୍କର ସନ୍ଦେହଜନକ ମୃତ୍ୟୁ ହୋଇଥିଲା। କମ୍ପାନୀ କର୍ତ୍ତୃପକ୍ଷ ପରିବାରର ସଦସ୍ୟଙ୍କୁ ନ ଜଣାଇ ମୃତଦେହ ବ୍ୟବଚ୍ଛେଦ କରାଇ କାରଖାନାର କେତେଜଣ ଶ୍ରମିକଙ୍କ ସାହାଯ୍ୟରେ ମୃତଦେହ ତାଙ୍କ ପରିବାରକୁ ହସ୍ତାନ୍ତର କରିଥିଲେ। ଏହାର କିଛିଦିନ ପରେ କମ୍ପାନୀ ପକ୍ଷରୁ ବିଳାସୀଙ୍କୁ କ୍ଷତିପୂରଣ ଦିଆଯିବାର ପ୍ରତିଶ୍ରୁତି ମିଳିଥିଲା ା ମାତ୍ର କମ୍ପାନୀ କର୍ତ୍ତୃପକ୍ଷଙ୍କ ସେହି ପ୍ରତିଶ୍ରୁତି ପ୍ରତାରଣାରେ ପରିଣତ ହୋଇଥିଲା। ବିଳାସୀ ଓ ପୁଅ ଦୀପକ ବାରମ୍ବାର କାରଖାନା କର୍ତ୍ତୃପକ୍ଷଙ୍କୁ ସମସ୍ୟା ସମ୍ପର୍କରେ ଦୃଷ୍ଟି ଆକର୍ଷଣ କରିଥିଲେ ହେଁ କୌଣସି ପଦକ୍ଷେପ ଗ୍ରହଣ କରାଯାଇ ନ ଥିଲା ା ଶ୍ରମ ଆଇନ୍ ଅନୁଯାୟୀ କ୍ଷତିଗ୍ରସ୍ତ ପରିବାରକୁ ମୃତ୍ୟୁଜନିତ କ୍ଷତିପୂରଣ ପ୍ରଦାନ ଓ ଶ୍ରମିକ ସାମାଜିକ ସୁରକ୍ଷା ବ୍ୟବସ୍ଥା ଅନୁଯାୟୀ ପରିବାରର ଜଣେ ସଦସ୍ୟଙ୍କୁ କମ୍ପାନୀରେ ନିଯୁକ୍ତି ଦାବି କରି ବିଳାସୀ, ପୁଅ ଦୀପକ ଓ ତାଙ୍କ ପରିବାର ସଦସ୍ୟମାନେ ଗତ ମେ ୧୬ରୁ କାରଖାନା ଫାଟକ ସମ୍ମୁଖରେ ଧାରଣାରେ ବସିଥିଲେ ା ମଙ୍ଗଳବାର ମହାନ୍ତି କାରୁଆଙ୍କ ୧୬ତମ ଶ୍ରାଦ୍ଧ ଦିବସ ଥିବାରୁ ଧାରଣା ସ୍ଥଳରେ ସ୍ବାମୀଙ୍କ ନାମରେ ବିଳାସୀ ଓ ଦୀପକ ଶ୍ରାଦ୍ଧ ଦେବା ସହିତ କମ୍ପାନୀ ପରିଚାଳନା ନିର୍ଦ୍ଦେଶକଙ୍କ ସମେତ ଅନ୍ୟ ଅଧିକାରୀଙ୍କ ନାମରେ ମଧ୍ୟ ପିଣ୍ଡ ପକାଇ ନିଜ ଦୀର୍ଘ ଦିନର ଅଭିମାନକୁ ଜାହିର କରିଛନ୍ତି ା ଏହି ଘଟଣା ଏଠାରେ ଚର୍ଚ୍ଚାର ବିଷୟ ପାଲଟିଛି ା କମ୍ପାନୀ କର୍ପୋରେଟ କମ୍ୟୁନିକେଶନ ଅଧିକାରୀ ଶୀତଳ ସ୍ବାଇଁଙ୍କୁ ପଚାରିବାରୁ ମୃତ ମହାନ୍ତି କାରୁଆଙ୍କର କମ୍ପାନୀରେ ଥିବା ପ୍ରାପ୍ୟ ସୁଧ ସହିତ ଦେବାକୁ ପ୍ରସ୍ତୁତ ବୋଲି କମ୍ପାନୀ ତରଫରୁ ତାଙ୍କ ପତ୍ନୀଙ୍କୁ ଚିଠି ଦିଆଯାଉଥିଲେ ମଧ୍ୟ ସେ ଏକ ଚାକିରି ଦେବା ଲାଗି ଧାରଣା ଦେଉଛନ୍ତି। ତେବେ ଚାକିରି ଦେବା ବର୍ତ୍ତମାନ କମ୍ପାନୀ ପକ୍ଷେ ସମ୍ଭବରପର ନୁହେଁ ପରବର୍ତ୍ତୀ ସମୟରେ କମ୍ପାନୀ ଏବିଷୟରେ ବିସ୍ତୃତ ଭାବେ ଆଲୋଚନା କରି ନିଷ୍ପତ୍ତି ନେବ ବୋଲି କମ୍ପାନୀ ଅଧିକାରୀ ତାଙ୍କ ପ୍ରତିକ୍ରିୟାରେ ଜଣାଇଛନ୍ତି।
