ପୁରୀ ଅଫିସ,୧୮ା୫: ମୁଖ୍ୟମନ୍ତ୍ରୀଙ୍କ ଦ୍ୱାରା ପ୍ରଦତ୍ତ ଜିଲାପାଳ କ୍ଷମତାକୁ ପୁରୀ ଜିଲାର ପ୍ରଥମ ସରପଞ୍ଚ ଭାବେ ସଦର ବ୍ଲକ ବାଲିପୁଟର ମଧୁଛନ୍ଦା ଫାରାକ୍ ପ୍ରୟୋଗ କରିଛନ୍ତି। ବାଲିପୁଟ ପଞ୍ଚାୟତକୁ କରୋନାମୁକ୍ତ ରଖିବା ଲାଗି ସେ ରବିବାର ପଞ୍ଚାୟତକୁ ଶଟ୍ଡାଉନ୍ କରିଥିବା ବେଳେ ୬ଟି ୱାର୍ଡ(ବାଲିପୁଟ, ବେତାଳ, ପୋଡ଼ପଡ଼ା, କଣ୍ଟାପଡ଼ା, ବିଲିବେହେରା ସାହି, ପୋଡାପଲ୍ଲୀ)କୁ କଣ୍ଟେନମେଣ୍ଟ ଜୋନ ଘୋଷଣା କରିଛନ୍ତି। ସୋମବାର ସକାଳ ୬ଟାରୁ ଏହା ୩୬ ଘଣ୍ଟା ଅର୍ଥାତ୍ ୧୯ ତାରିଖ ସନ୍ଧ୍ୟା ୬ଟା ପର୍ଯ୍ୟନ୍ତ ଲାଗୁ ହେବ ବୋଲି ସରପଞ୍ଚ ଫାରାକ୍ କହିଛନ୍ତି।
ଫାରାକ୍ଙ୍କ ସୂଚନା ମୁତାବକ, ବାଲିପୁଟ ପଞ୍ଚାୟତ, ସତ୍ୟବାଦୀ ବ୍ଲକର ମହୁରା ପଞ୍ଚାୟତ ଏବଂ ଗୋପ ବ୍ଲକର ଡଭାର ପଞ୍ଚାୟତ ସୀମାନ୍ତରେ ଅବସ୍ଥିତ। ମହୁରା ଓ ଡଭାର ପଞ୍ଚାୟତରୁ ଜଣେ ଲେଖାଏ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ତେଣୁ ବାଲିପୁଟ ପଞ୍ଚାୟତର ପିଏନ୍ବି ବ୍ୟାଙ୍କ, ପୁରୀ ସଦର ବ୍ଲକର ଶାସ୍ତ୍ରୀ ସ୍ମୃତି ମହାବିଦ୍ୟାଳୟ ଏବଂ ସମସ୍ତ ସରକାରୀ ଓ ବେସରକାରୀ ଅନୁଷ୍ଠାନ ଥିବାରୁ କରୋନା ଭାଇରସ୍ ସଂକ୍ରମଣ ପ୍ରଭାବକୁ ଏଡାଇବା ପାଇଁ ବାଲିପୁଟ ପଞ୍ଚାୟତକୁ ୩୬ ଘଣ୍ଟା ପାଇଁ ଶଟ୍ଡାଉନ ଘୋଷଣା କରାଯାଇଛି। ସରପଞ୍ଚ ସାମାଜିକ ଦୂରତ୍ୱ ରକ୍ଷା କରି ଗ୍ରାମସଭା ଆୟୋଜନ କରି ଏହି ନିଷ୍ପତ୍ତି ନେଇଥିବା କହିଛନ୍ତି। ତେବେ ସମ୍ଭାବ୍ୟ ବାତ୍ୟାକୁ ଦୃଷ୍ଟିରେ ରଖି ସମ୍ପୃକ୍ତ ନିଷ୍ପତ୍ତିର ଆବଶ୍ୟକ ପରିବର୍ତ୍ତନ କରାଯାଇପାରେ ବୋଲି ସରପଞ୍ଚ ଜଣାଇଛନ୍ତି। କେବଳ ଅତ୍ୟାବଶ୍ୟକ ସାମଗ୍ରୀ ଦୋକାନ ଏବଂ ଔଷଧ ଦୋକାନ ଖୋଲା ରହିବ। ସମସ୍ତ ସରକାରୀ, ବେସରକାରୀ ଅନୁଷ୍ଠାନ ବନ୍ଦ ରହିବ ବୋଲି ସରପଞ୍ଚ ଫାରାକ କହିଛନ୍ତି।
