ବ୍ରହ୍ମପୁର ଅଫିସ,୪।୯: ମଣିଷର ମୃତ୍ୟୁ ହୁଏ, ମାତ୍ର ଚକ୍ଷୁର ନୁହେଁ। ମୃତ୍ୟୁର ୪ ରୁ ୬ ଘଣ୍ଟା ପର୍ଯ୍ୟନ୍ତ ଚକ୍ଷୁ ଜୀବିତ ଥାଏ। ଏହାକୁ ଅନ୍ୟ ଜଣଙ୍କଠାରେ ପ୍ରତିରୋପଣ କରାଯିବା ଫଳରେ ଏକଦୃଷ୍ଟିହୀନ ଏସୁନ୍ଦର ସଂସାରକୁ ଦେଖିପାରେ । ସେଥିପାଇଁ ମୃୃତ୍ୟୁ ପରେ ଚକ୍ଷୁକୁ ଜାଳିଦେବା କି ପୋତିଦେବା ବଦଳରେ ତାକୁ ଦାନ କରିବା ଉଚିତ। ଭାରତର ପ୍ରାୟ ୩୦ ଲକ୍ଷ ଲୋକ ସ୍ବଚ୍ଛ ପଟଳ ଅନ୍ଧତ୍ୱର ଶିକାର ଅଟନ୍ତି । ସେମାନଙ୍କ ମଧ୍ୟରେ ପ୍ରାୟ ୬୦ ପ୍ରତିଶତ ହେଉଛନ୍ତି ଯୁବକ ଏବଂ ୧୨ ବର୍ଷରୁ କମ୍ ବୟସ୍କ । ଏଣୁ ସମସ୍ତେ ଚକ୍ଷୁଦାନ କରି ଦେଶରୁ ଅନ୍ଧତ୍ୱ ଦୂର କରିବା ଆବଶ୍ୟକ ବୋଲି ବୁଧବାର ଜାତୀୟ ଚକ୍ଷୁଦାନ ପକ୍ଷ ପାଳନ ଅବସରରେ ମତ ପ୍ରକାଶ ପାଇଛି।
ଏହି ଅବସରରେ ସକାଳେ ଜଞ୍ଜାମ ଜିଲା ସ୍ଥାନୀୟ ଗାନ୍ଧି ମାର୍କେଟ୍ଠାରୁ ଏକ ସଚେତନତା ଶୋଭାଯାତ୍ରା ବାହାରିଥିଲା। ଏସ୍ଏନ୍ଟି ରୋଡ୍, ଗିରିଜା ଛକ, ବିଏମ୍ସି କାର୍ଯ୍ୟାଳୟ, ଡାଇମଣ୍ଡଟ୍ୟାଙ୍କ୍ ରୋଡ୍, ସାନବଜାର, ହନୁମାନ ବଜାର ଛକ ହୋଇ ପୁଣି ଥରେ ଗାନ୍ଧି ମାର୍କେଟ୍ ଠାରେ ପହଞ୍ଚିଥିଲା । ଏହାକୁ ଫୋରମ୍ ଫର୍ ଗଞ୍ଜାମର ସୁଧୀର ରାଉତ ଏବଂ ବ୍ରହ୍ମପୁର ମହାରାଜା କୃଷ୍ଣଚନ୍ଦ୍ର ଗଜପତି ଭେଷଜ ମହାବିଦ୍ୟାଳୟ ଏବଂ ଚିକିତ୍ସାଳୟର ଚକ୍ଷୁ ବିଭାଗର ମୁଖ୍ୟ ଡା. ସୁଚିତ୍ରା ଦାସ ପତାକା ଦେଖାଇ ଶୁଭାରମ୍ଭ କରିଥିଲେ ।
