ଶ୍ରୀନଗର,୨୫-୧୦(ଆଇଏଏନ୍ଏସ୍):ଜମ୍ମୁ-କଶ୍ମୀର ବ୍ଲକ ଉନ୍ନୟନ ପରିଷଦ (ବିଡିସି) ନିର୍ବାଚନ ଗୁରୁବାର ଅନୁଷ୍ଠିତ ହୋଇଯାଇଛି। ୩୧୬ ବ୍ଲକ ପାଇଁ ନିର୍ବାଚନ ହୋଇଥିଲାବେଳେ ୮୧ରେ ଭାଜପା ବିଜୟୀ ହୋଇଛି। ସ୍ବାଧୀନ ପ୍ରାର୍ଥୀ ୨୧୭ ବ୍ଲକକୁ କବ୍ଜା କରିଛନ୍ତି। କଂଗ୍ରେସ ଗୋଟିଏ ବ୍ଲକ୍ରେ ଜିତିଥିଲାବେଳେ ପାନ୍ଥର୍ସ ପାର୍ଟି ୮ଟିରେ ବିଜୟୀ ହୋଇଛି। ଜମ୍ମୁ-କଶ୍ମୀରରୁ ସମ୍ବିଧାନର ଅନୁଚ୍ଛେଦ ୩୭୦ ଉଚ୍ଛେଦ ହେବା ପରେ ଏହା ଥିଲା ପ୍ରଥମ ନିର୍ବାଚନ। କଡ଼ା ସୁରକ୍ଷା ମଧ୍ୟରେ ନିର୍ବାଚିତ ସରପଞ୍ଚ ଓ ଓ୍ବାର୍ଡମେମ୍ବରମାନେ ଭୋଟ ଦେଇଥିଲେ। କଂଗ୍ରେସ, ନ୍ୟାଶନାଲ କନ୍ଫରେନ୍ସ (ଏନ୍ସି) ଏବଂ ପିପୁଲ୍ସ ଡେମୋକ୍ରାଟିକ୍ ପାର୍ଟି (ପିଡିପି) ନିର୍ବାଚନକୁ ବର୍ଜନ କରିଥିଲେ। କଶ୍ମୀର ଉପତ୍ୟକାର ୧୩୭ ବ୍ଲକ୍ ମଧ୍ୟରୁ ୧୨୮ଟିରେ ଭୋଟଗ୍ରହଣ ହୋଇଥିଲା। ସେଥିରୁ ୧୮ଟିରେ ଭାଜପା ଓ ୧୦୯ଟି ବ୍ଲକରେ ସ୍ବାଧୀନ ପ୍ରାର୍ଥୀ ଜିତିଛନ୍ତି। ଶୋପିଆନରୁ ୬, ପୁଲଓ୍ବାମାରୁ ୨, ଅନନ୍ତନାଗ ଓ ବଡଗାମ ଜିଲାରୁ ଜଣେ ଲେଖାଏ ଭାଜପା ପ୍ରାର୍ଥୀ ନିର୍ଦ୍ୱନ୍ଦ୍ୱରେ ନିର୍ବାଚିତ ହୋଇଥିଲେ। ସେହିପରି ବାରମୁଲା ଜିଲାରେ ୪, ପୁଲଓ୍ବାମା, ବଡଗାମ୍ ଓ ବନ୍ଦିପୋରାରୁ ୨ ଜଣ ଲେଖାଏ ଏବଂ ଅନନ୍ତନାଗ, କୁପଓ୍ବାଡା, ଗଣ୍ଡେରବାଲ ଓ ଶ୍ରୀନଗର ଜିଲାରୁ ଜଣେ ଲେଖାଏ ସ୍ବାଧୀନ ପ୍ରାର୍ଥୀ ନିର୍ଦ୍ୱନ୍ଦ୍ୱରେ ଜିତିଥିଲେ। ଲଦାଖରେ ସର୍ବାଧିକ ୨୦ ବ୍ଲକରେ ସ୍ବାଧୀନ ପ୍ରାର୍ଥୀ ବିଜୟୀ ହୋଇଥିଲାବେଳେ ୧୧ଟି ବ୍ଲକ ଭାଜପା ହାତକୁ ଯାଇଛି।
