ମୁମ୍ବାଇ, ୬।୯- ଓଡ଼ିଆ କ୍ରିକେଟର୍ ପ୍ରଜ୍ଞାନ ଓଝା ଗୁରୁବାର ୩୩ ବର୍ଷରେ ପଦାର୍ପଣ କରିଛନ୍ତି। ଜନ୍ମଦିନ ଅବସରରେ ଓଝା ଏକ ଖୁସି ଖବର ଶେୟାର କରିଛନ୍ତି। ଚଳିତ ମାସରେ ତାଙ୍କ ସ୍ତ୍ରୀ କର୍ବି କୈଳାଶ ପ୍ରଥମ ସନ୍ତାନ ଜନ୍ମଦେବାକୁ ଯାଉଛନ୍ତି। ଏଥିଲାଗି ଉଭୟ ପ୍ରଜ୍ଞାନ ଓ କର୍ବି ବେଶ୍ ଉତ୍ସାହିତ ଥିବା ଜଣାପଡ଼ିଛି। କର୍ବି ଗର୍ଭବତୀ ଥିବା ଜଣାଇ ପ୍ରଜ୍ଞାନ କହିଛନ୍ତି, ‘ମୁଁ ବହୁତ ଉତ୍ସାହିତ ଓ ରୋମାଞ୍ଚତ୍ତ ରହିଛି। ଉଭୟଙ୍କ ଲାଗି ଏହା ବଡ଼ ପରିବର୍ତ୍ତନ ଆଣିବ। ଆମେ ଦୁଇଜଣ ବର୍ତ୍ତମାନ ଉତ୍ସାହିତ ଓ ନର୍ଭସ ମଧ୍ୟ ରହିଛୁ। ଏହା ମୋ ଜୀବନର ସବୁଠୁ ବଡ଼ ପ୍ରତିବଦ୍ଧତା ଓ କଠିନ ସମୟ। ଏହି ନିଷ୍ପତ୍ତି ଲାଗି ଆମ ପରିବାର ସମର୍ଥନ ଦେଇଛି’ ବୋଲି ପ୍ରଜ୍ଞାନ ସୋସିଆଲ ମିଡିଆରେ ଏହା ଉଲ୍ଲେଖ କରିଛନ୍ତି। ୨୦୧୦ରେ କର୍ବିଙ୍କୁ ବିବାହ କରିଥିଲେ ପ୍ରଜ୍ଞାନ।
ଉଲ୍ଲେଖଯୋଗ୍ୟ, ୨୦୦୮ରେ ବାଂଲାଦେଶ ବିପକ୍ଷରେ ପଦାର୍ପଣ କରି ଅନ୍ତର୍ଜାତୀୟ କ୍ୟାରିୟର ଆରମ୍ଭ କରିଥିବା ୩୩ବର୍ଷୀୟ ପ୍ରଜ୍ଞାନ ୧୮ ଦିନିକିଆରୁ ୨୧ ଉଇକେଟ୍ ନେଇଛନ୍ତି। ଟେଷ୍ଟରେ କିନ୍ତୁ ଏହି ବାମହାତୀ ସ୍ପିନର ବେଶ୍ ପ୍ରଭାବୀ ପ୍ରଦର୍ଶନ କରିଥିଲେ। ମୋଟ୍ ୨୪ ଟେଷ୍ଟରୁ ସେ ୧୧୩ ଉଇକେଟ୍ ଅକ୍ତିଆର କରିଛନ୍ତି। ସେହିଭଳି ୬ ଟି୨୦ ମ୍ୟାଚ୍ରୁ ପ୍ରଜ୍ଞାନଙ୍କ ନାମରେ ୧୦ ଉଇକେଟ୍ ରହିଛି। ୨୦୧୩ରେ ସଚିନ ତେନ୍ଦୁଲକରଙ୍କ ବିଦାୟୀ ଟେଷ୍ଟ ମ୍ୟାଚ୍ରେ ଓ୍ବେଷ୍ଟଇଣ୍ଡିଜ ବିପକ୍ଷରେ ପ୍ରଜ୍ଞାନ ୧୦ ଉଇକେଟ୍ ହାସଲ କରି ମ୍ୟାଚ୍ର ଶ୍ରେଷ୍ଠ ଖେଳାଳି ପୁରସ୍କାର ହାସଲ କରିଥିଲେ। ସଫଳ ପ୍ରଦର୍ଶନ ସତ୍ତ୍ୱେ ଏହି ମ୍ୟାଚ୍ ପରଠାରୁ ସେ ଜାତୀୟ ଦଳରୁ ବାଦ୍ ପଡ଼ିଛନ୍ତି।
