କଟକ ଅଫିସ,୨୪ା୭: କଟକ ମହାନଗର ନିଗମ (ସିଏମ୍ସି)ରେ ଦିନକୁଦିନ ଆବର୍ଜନା ବଢିବାରେ ଲାଗିଛି। ଯାହାଫଳରେ ପରିବେଶ ପ୍ରଦୂଷିତ ହେଉଛି। ଏହା ସିଏମ୍ସିର ମୁଣ୍ଡବିନ୍ଧାର କାରଣ ପାଲଟିଛି। ଅନ୍ୟପକ୍ଷେ ସହରରେ କୁଢ କୁଢ ଆବର୍ଜନା ଗଦା ନ କରିବାକୁ ଏନ୍ଜିଟି ପକ୍ଷରୁ ନିର୍ଦ୍ଦେଶ ରହିଛି। ଯାହାପାଇଁ ସିଏମ୍ସିର ନିଦ ହଜିଯାଇଛି। ଏହାକୁ ଦୃଷ୍ଟିରେ ରଖି ତାମିଲନାଡୁ ଢାଞ୍ଚାରେ ବର୍ଜ୍ୟବସ୍ତୁ ପରିଚାଳନା କରିବାକୁ ସିଏମ୍ସି ବ୍ଲୁପ୍ରିଣ୍ଟ ପ୍ରସ୍ତୁତ କରୁଛି। ସହରରେ ଏବେ ଦିନକୁ ୧୫୦ ମେଟ୍ରିକ ଟନ ଆବର୍ଜନା ବାହାରୁଛି। ସେହି ହିସାବରେ ମାସକୁ ୪୫୦୦ ମେଟ୍ରିକ ଟନ ଆବର୍ଜନା ବାହାରୁଛି। ଏଣିକି ଆଉ ଆବର୍ଜନା ପଡ଼ି ରହିବାକୁ ଦିଆଯିବନାହିଁ। ଏହାକୁ ଜୈବିକ ଖତରେ ପରିଣତ କରାଯାଇ ସିଏମ୍ସିର ବିଭିନ୍ନ ପାର୍କରେ ଉପଯୋଗ କରାଯିବ। ଏଥିସହ ଅବଶିଷ୍ଟ ଖତକୁ ବିକ୍ରି କରାଯିବା ପାଇଁ ସିଏମ୍ସି ପକ୍ଷରୁ ନିଷ୍ପତ୍ତି ନିଆଯାଇଛି।
ସହରରେ ପ୍ରତି ୱାର୍ଡରୁ କୁଢ କୁଢ ଆବର୍ଜନା ବାହାରୁଛି। ଏହି ଆବର୍ଜନାକୁ ଛତ୍ରବଜାର ଦାସସାହିରେ ନିର୍ମାଣ ହୋଇଥିବା କମ୍ପୋଷ୍ଟ ପ୍ଲାଣ୍ଟରେ ଭର୍ତ୍ତି କରାଯାଇ ଜୈବିକ ଖତ ପ୍ରସ୍ତୁତ କରାଯିବ। ମୁଖ୍ୟତଃ ଛତ୍ରବଜାରରୁ ଅଧିକ ଜୈବିକ ଆବର୍ଜନା ବାହାରୁଥିବା ଯୋଗୁ ଏହି ଅଞ୍ଚଳ ଅଧିକ ପ୍ରଦୂଷିତ ହୋଇଥାଏ। ତେଣୁ ପଚା ପରିବାପତ୍ରଠାରୁ ଆରମ୍ଭ କରି ଆମଦାନୀ ହେଉଥିବା ଫଳ ଆଦିରେ ପାଳ, କଦଳୀପତ୍ର ବ୍ୟାପକ ପରିମାଣରେ ଆସିଥାଏ। ଯାହାକି ଟ୍ରକରୁ ଅନ୍ଲୋଡ ବେଳେ ଏହି ଆବର୍ଜନାଗୁଡ଼ିକ ରାସ୍ତା କିମ୍ବା ତାଳଦଣ୍ଡା କେନାଲ ନିକଟରେ ଫିଙ୍ଗି ଦିଆଯାଏ। ଯାହାର ପ୍ରଭାବରେ ଛତ୍ରବଜାର ଅଞ୍ଚଳ ସର୍ବଦା ଆବର୍ଜନାମୟ ରହିଥାଏ। ତେଣୁ ପ୍ରଥମେ ଏହି ଆବର୍ଜନାକୁ ଜୈବିକ ଖତରେ ପରିଣତ କରାଗଲେ ସିଏମ୍ସିର ଆବର୍ଜନାଗୁଡ଼ିକ ପୁଣି ବ୍ୟବହାର କରାଯିବା ସହ ରାଜସ୍ବ ବୃଦ୍ଧି ପାଇବ। ଏହି ଖତକୁ ସିଏମ୍ସିରେ ଥିବା ଛୋଟ ବଡ଼ ୪୫ଟି ପାର୍କ ସମେତ ସିଡିଏର ୬ଟି ପାର୍କରେ ଜୈବିକ ଖତ ବ୍ୟବହାର କରାଯାଇ ଏଥିରେ ଲାଗିଥିବା ଗଛଗୁଡିକୁ ଉନ୍ନତ କରାଯିବା ସହ ପାର୍କ ସବୁଜିମା କରାଯାଇ ପାରିବ। ଏହି ଆବର୍ଜନାଗୁଡ଼ିକୁ କମ୍ପୋଷ୍ଟରେ ପରିଣତ କରି ବ୍ୟବହାର କରାଗଲେ ଖତ ବାବଦରେ ଖର୍ଚ୍ଚ ହେଉଥିବା ସିଏମ୍ସିର ପାଖାପାଖି ୫୦ ହଜାର ଟଙ୍କା ସଞ୍ଚୟ ହେବା ସହ ବଳକା ରହୁଥିବା ଖତକୁ ବିଭିନ୍ନ ସ୍ବୟଂ ସହାୟକ ଗୋଷ୍ଠୀ ମାଧ୍ୟମରେ ପ୍ୟାକେଟ କରି ବଜାରରେ ବିକ୍ରି କରାଯାଇ ସିଏମ୍ସିର ଆୟ ବୃଦ୍ଧି କରାଯିବ। ସ୍ବୟଂ ସହାୟକ ଗୋଷ୍ଠୀର କର୍ମକର୍ତ୍ତା ମଧ୍ୟ ଏହାଦ୍ୱାରା ରୋଜଗାରର ବାଟ ପାଇ ପାରିବେ। ଯାହାଫଳରେ ଆବର୍ଜନା ପରିଚାଳନା ସହଜରେ ହୋଇପାରିବା ସହ ସିଏମ୍ସି ଏବଂ ଏସ୍ଏଚ୍ଜିର ରୋଜଗାର ମଧ୍ୟ ବୃଦ୍ଧି ପାଇବ ବୋଲି ସିଏମ୍ସି ସେକ୍ରେଟାରୀ ଲତାଶ୍ରୀ ବାଗ୍ ସୂଚନା ଦେଇଛନ୍ତି।
